........  ஒவ்வொரு மாதமும் மாதமிருமுறை   1 மற்றும் 15 ம் தேதிகளில் புதுப்பிக்கப்படுகிறது .......

a

 Your Advertisement  Here / உங்கள் விளம்பரம் இங்கு இடம் பெற

a

குறுந்தகவல்-5

கள் இறக்க அனுமதி தேவை...

தமிழகத்தில் பிராந்தி, விஸ்கி, பீர் போன்ற மதுபானங்களை தமிழக அரசின் டாஸ்மாக் நிறுவனத்தின் மூலம் மதுபானக் கடைகள் நிறுவி விற்பனை செய்து வரும் நிலையில் பனை மரங்களில் இருந்து இயற்கையான கள்ளை இறக்கி விற்பனை செய்யும் உரிமையை தங்களுக்கு வழங்க வேண்டும் அல்லது அரசே இந்த கள்ளை பனைத் தொழிலாளர்களிடம் பெற்று மதுபானக் கடைகளில் விற்பனை செய்ய முன் வர வேண்டும் என்பதை தமிழ்நாட்டிலுள்ள பனைத் தொழிலாளர்கள் பல ஆண்டுகளாக தமிழக அரசிடம் கோரி வருகின்றனர்.

இந்நிலையில் தமிழக சமதா கட்சியினர் தமிழ்நாடு பனைத் தொழிலாளர்கள் நலச் சங்கம் மற்றும் தமிழ்நாடு நாடார் சமுதாயப் பேரவை ஆகியவற்றுடன் இணைந்து இந்தக் கோரிக்கையை வலியுறுத்தி கடந்த 29.05.2007 முதல் 31.05.2007 முடிய மூன்று நாட்கள் தூத்துக்குடியில் உண்ணா விரதப் போராட்டத்தை நடத்தினர்.

இந்தப் உண்ணாவிரதப் பேராட்டத்தை பதநீர் கொடுத்து முடித்து வைத்த இந்திய அரசின் முன்னாள் பாதுகாப்புத்துறை அமைச்சரும், தேசிய ஜனநாயகக் கூட்டணியின் ஒருங்கிணைப்பாளருமான ஜார்ஜ் பெர்ணாண்டஸ், தமிழகத்திற்கு அருகிலுள்ள கேரளா, ஆந்திரா போன்ற மாநிலங்களில் கள் இறக்கி விற்பனை செய்ய அனுமதிக்கப்படும் போது தமிழகத்தில் மட்டும் அனுமதி மறுக்கப்படுவது இந்தப் பனை மரத் தொழிலில் ஈடுபட்டுள்ளவர்களுக்கு பெரும் இழப்பை ஏற்படுத்தி வருகிறது. மேலும் உடல் நலக் கேடு விளைவிக்கும் பிராந்தி, விஸ்கி, பீர் போன்ற மதுபானங்களை விற்பனை செய்து வரும் தமிழக அரசு இயற்கையான அதிகம் கெடுதலில்லாத கள்ளை இறக்கி விற்பனை செய்ய பனைத் தொழிலாளர்களுக்கு தமிழக அரசு அனுமதி வழங்கிட முன்வர வேண்டும். மேலும் பதநீர், பனங்கருப்பட்டி, பனங்கற்கண்டு போன்ற மருத்துவ குணமுடைய பனைப் பொருட்களை வாங்கிடவும் பனை மரத்தின் ஓலையிலிருந்து செய்யப்படும் விசிறி, கைப்பை, கூடைகள் போன்ற கைவினைப் பொருட்களை தமிழகம் மட்டுமின்றி இந்தியா முழுவதும் விற்பனைக்குக் கொண்டு செல்ல தமிழக அரசு நடவடிக்கை எடுக்க வேண்டும். மேலும் புதிதாக துவங்கப்பட்டுள்ள தமிழ்நாடு பனைத் தொழிலாளர்கள் நல வாரியத்தின் மூலம் இந்த பனைமரத் தொழிலை நம்பி உள்ள பல ஆயிரம் குடும்பங்களின் வளர்ச்சிக்கு உதவிட தமிழக அரசு புதிய திட்டங்களை உருவாக்க வேண்டும் என்றும் இது குறித்து தமிழக அரசின் முதலமைச்சர் கருணாநிதியிடம் பேச இருப்பதாகவும் தெரிவித்தார்.

இந்தப் போரட்த்தை முடித்து வைத்த ஜார்ஜ் பெர்ணாண்டஸ் மாலையில் தூத்துக்குடிக்கு அருகிலுள்ள காயல் பட்டினத்தில் பனை மரத்திலிருந்து கிடைக்கும் பதநீரில் தயாரிக்கப்படும் பனங்கருப்பட்டி, பனங்கற்கண்டு, சில்லுக் கருப்பட்டி போன்றவைகளையும், பனை ஓலையிலிருந்து செய்யப்படும் கைவினைப் பொருட்களையும் குடிசைத் தொழிலாகச் செய்து வரும் பனைத் தொழிலாளர்களுடன் பேசி அவர்களுடைய நிலையை அறிந்தார். அவர்களுக்கு மத்திய ,மாநில அரசின் உதவி கிடைக்க உதவுவதாகவும் உறுதியளித்தார்.
 

 தூத்துக்குடி வந்திருந்த  ஜார்ஜ் பெர்ணாண்டஸை முத்துக்கமலம் இணைய இதழ் ஆசிரியர் எம்.சுப்பிரமணி (இடமிருந்து மூன்றாவதாக) சந்தித்துப் பேசியபோது எடுத்த படம்

அவருடன் சமதா கட்சியின் மாநிலத் தலைவரும், தமிழ்நாடு மெர்க்கண்டைல் வங்கியின் இயக்குனர்களில் ஒருவருமான பாஸ்கரன், சமதாக் கட்சியின் முதன்மைப் பொதுச் செயலாளர் கோன், முத்துக்கமலம் இணைய இதழின் ஆசிரியர் எம்.சுப்பிரமணி, நாடார் சமுதாயப் பேரவையின் சட்ட ஆலோசகர் வழக்கறிஞர் வெற்றிவேல் மற்றும் சமதாக் கட்சியைச் சேர்ந்த தூத்துக்குடி அலங்காரராஜ்,  தேனி ரவிக்குமார், பாண்டியராஜன், ராஜ்குமரேஷ் மற்றும் பலர் சென்றிருந்தனர்.

                                                                                                                                                                                                -தாமரைச் செல்வி.

முந்தைய குறுந்தகவல் காண