புத்தாண்டுத் தீர்மானம் என்பது புத்தாண்டின் போது, புதிய ஆண்டில் ஒருவர் ஏதாவது ஒன்றைச் செய்வதாகவோ, கடைப்பிடிப்பதாகவோ உறுதி எடுத்துக் கொள்வதைக் குறிக்கிறது. பொதுவாக, மேற்கு நாடுகளில் இது ஒரு மரபாக வழங்கி வந்தது எனினும், தற்காலத்தில் உலகின் அனைத்துப் பகுதிகளிலும் புத்தாண்டுத் தீர்மானம் எடுத்துக் கொள்வது பரவலாகி இருக்கிறது.

புத்தாண்டுத் தீர்மானங்களை எடுக்கும் வழக்கம் எப்போது தோன்றியது என்று உறுதியாகக் கூற முடியவில்லை. பல ஆயிரம் ஆண்டுகளுக்கு முன்பே பாபிலோனியாவில் தமது கடவுளுக்கு முன் இவ்வாறான உறுதி மொழிகளை எடுத்துக் கொள்ளும் வழக்கம் இருந்தது. அவர்களுடைய தீர்மானங்கள், இரவலாக வாங்கிய பொருட்களைத் திரும்பக் கொடுப்பது, வாங்கிய கடன்களைத் திருப்பிச் செலுத்துவது போன்றவையாக அமைந்திருந்தன.

உரோமர்கள், புத்தாண்டின் முதல் மாதமான ஜனவரிக்கு உரிய சானுசு என்னும் கடவுளுக்கு இவ்வாறான உறுதிமொழிகளைக் கொடுத்தனர். ஐரோப்பாவின் நடுக்காலத்தில், பிரபுக்கள் ஒவ்வொரு கிறிஸ்துமஸ் பண்டிகைக்குப் பின்னரும், பிரபுகளுக்கு உரிய நெறிமுறைகளின்படி நடப்பதாக உறுதி எடுத்துக் கொள்வது வழக்கமாக இருந்தது.

பொதுவாக, புத்தாண்டுத் தீர்மானங்கள் என்பது, உறுதி எடுத்துக் கொள்பவர் தனது பழக்க வழக்கங்களையோ, இயல்புகளையோ மேம்படுத்திக் கொள்வது, ஏதாவது நல்ல செயல்களில் ஈடுபடுவது போன்றவற்றோடு தொடர்புடையனவாகவே அமைகின்றன.


தற்காலத்தில் பெரும்பாலான புத்தாண்டுத் தீர்மானங்கள் கீழ்க்காணும் சில வகைகளுக்குள் அடங்குகின்றன.

* உடல் நலத்துக்கு உகந்த உணவு வகைகளை உட்கொள்ளல், நிறையைக் குறைத்தல், உடற்பயிற்சியில் ஈடுபடல், மது குடித்தலைக் குறைத்தல், புகை பிடிப்பதை நிறுத்துதல் போன்ற உடல் நலத்தைப் பேணுதல்.

* ஆக்க வழியில் சிந்தித்தல், கூடுதலாகச் சிரித்தல், வாழ்க்கையைச் சிறப்பாக அனுபவித்தல் போன்ற உள நலத்தை மேம்படுத்தல்.

* கடன்களில் இருந்து மீளுதல், சேமித்தல், சிறிய முதலீடுகளைச் செய்தல் போன்ற நிதி நிலைமையை மேம்படுத்தல்.

* தற்போதைய வேலையை மேலும் திறம்படச் செய்தல், மேம்பட்ட புதிய வேலையில் சேருதல், சொந்தமாகத் தொழில் தொடங்குதல் போன்ற தொழில் மேம்பாடு.

* கூடிய புள்ளிகள் பெறுதல், புதிதாக ஏதாவது கற்றுக்கொள்ளல், அடிக்கடி படித்தல், நூல்கள் வாசித்தல், திறன்களை வளர்த்துக்கொள்ளல் போன்ற கல்வி மேம்பாடு.

* தன்னை ஒழுங்குபடுத்திக் கொள்ளல், நேர மேலாண்மை, கூடிய அளவு பிறரில் தங்கியிருப்பதைத் தவிர்த்தல், தொலைக்காட்சி பார்ப்பதைக் குறைத்தல் போன்ற தனிப்பட்ட மேம்பாடு.

* தேவையானவர்களுக்கு வேண்டியவற்றை வழங்குதல், சமூகத் தொண்டில் ஈடுபடல் போன்ற பிறருக்கு உதவுதல்.

* பிறருடன் சிறந்த முறையில் பழகுதல், சமுதாய அறிவாண்மையை மேம்படுத்துதல் போன்ற சமுதாயத் திறன்களை வளர்த்துக் கொள்ளல்.

* புதிய நண்பர்களைப் பெற்றுக் கொள்ளல்.

* குடும்பத்தினருடன் அதிக நேரம் செலவு செய்தல்.

* சொந்த வாழ்க்கையை நிலைப்படுத்திக் கொள்ளல்.

* புதிய பண்பாடுகளை அறிதல்.

* இறைவனை அதிக மாக வணங்குதல்.

என்ன? இந்தப் புத்தாண்டில் நீங்களும் ஒரு நல்ல தீர்மானத்தை எடுத்துக் கொண்டு, தங்கள் நிலையினை மேம்படுத்திக் கொள்ளுங்கள்.

*****

இது முத்துக்கமலம் இணைய இதழின் படைப்பு.