மனிதத்தேவைகளையும், விருப்பங்களையும் பூர்த்தி செய்வதற்காக மேற்கொள்ளப்படும் அனைத்து நடவடிக்கைகளும் வணிகம் எனப்படும். வணிகத்தின் ஊடாக மனிதன் நாளாந்தம் பல கொடுக்கல் வாங்கல்களை மேற்கொள்கிறான். இந்த வணிக நடவடிக்கைகளானது, பண்டைய காலத்திலேயேப் பண்டமாற்று முறையின் ஊடாக வளர்ச்சி பெற்றன. இவ்வாறு வளர்ச்சி பெற்ற வணிக நடவடிக்கைகளில் பிரதான அங்கமாக அடையாளப்படுத்தப்படுபவை விளம்பரங்கள் ஆகும். விளம்பரம் என்பது ஒரு பொருளின் அறிமுகத்துக்காக அந்தத் துறை சார்ந்த நிறுவனங்களால் அல்லது ஊடகங்களினால் மேற்கொள்ளப்படும் நடவடிக்கைகளைக் குறிக்கின்றன. சமகால வணிக நடவடிக்கைகளில் விளம்பரமானது மிகவும் முக்கியத்துவம் வாய்ந்ததாக உள்ளது. விளம்பரம் ஊடாக, ஒரு பொருளின் அறிமுகம், தரம், என்பவற்றை நுகர்வோர் அறிந்து கொள்ளுகின்றனர். தற்காலப் போட்டிமிகுச் சந்தையில் வணிக நிறுவனங்கள் இலாப நோக்கத்துடனும், தமது உற்பத்திப் பொருட்களின் தரத்தை மேம்படுத்திக் காட்டும் வகையில் தந்திரோபாயங்களைக் கடைப்பிடித்து விளம்பரங்களை வடிவமைக்கின்றனர். இதனால் “விளம்பரம் இல்லையேல் வியாபாரம் இல்லை” எனும் அளவிற்குச் சமகால வணிக நடவடிக்கைகளில் விளம்பரம் இரண்டறக் கலந்துள்ளது.

இன்றைய போட்டிமிக்கச் சந்தையில் அடிப்படைப் பொருட்களையும், ஆடம்பரப் பொருட்களையும், உற்பத்தி செய்யும் நிறுவனங்கள் அவற்றை நுகர்வோரிடம் விற்பனை செய்வதற்குப் பல்வேறு வகையான விளம்பர நுட்பங்களைக் கையாளுகின்றனர். இதன் காரணமாக மனித சமுதாயம், சூழல் முதலியன பல்வேறு வகையான தாக்கங்களை எதிர்நோக்குகின்றது. அவைகளைப் பின்வருமாறு வகைப்படுத்தலாம்.

1. உளவியல் ரீதியிலான ஒழுக்க மீறல்கள்

2. நிறுவன ரீதியிலான ஒழுக்க மீறல்கள்

3. உடலியல் ரீதியிலான ஒழுக்க மீறல்கள்

4. சமூகவியல் ரீதியிலான ஒழுக்க மீறல்கள்

5. சூழலியல் ரீதியிலான ஒழுக்க மீறல்கள்

குழந்தைகளைப் பயன்படுத்தல் 1979ஆம் ஆண்டின் நுகர்வோர் பாதுகாப்புச் சட்டத்தின் படி விளம்பரங்களில் குழந்தைகளை பயன்படுத்துவது தடை செய்யப்பட்டுள்ளது. ஆனால் சமகால வணிக நடவடிக்கைகளில் விளம்பரங்களில் குழந்தைகளைப் பயன்படுத்துதல் இடம் பெறுகின்றன. இதனால் உளவியல் ரீதியில் பல தாக்கங்கள் ஏற்படுகிறது.

தகவல்களைத் தவறாக வழங்குதல்

சில நிறுவனங்கள் விளம்பரப்படுத்தலின் போது தெளிவான, உண்மையான தகவல்களை நபர்களுக்கு வழங்குவது நடைமுறையில் அரிதாகவேக் காணப்படுகிறது. இதனால் உளவியல் ரீதியில் பல தாக்கங்கள் ஏற்படுகிறது.

பாலியல் ரீதியிலான விளம்பரப்படுத்தல்

சில விளம்பரங்கள் உணர்ச்சிகளையும், உளக்கிளர்ச்சிகளையும் தூண்டுவதாகக் கவர்ச்சியானதாக வெளியிடப்படுகின்றன. இதனைக் குடும்ப அங்கத்தவர்களுடன் சேர்ந்து பார்க்க முடியாத நிலை ஏற்படுகிறது. இந்நிலைப்பாடு பல்வேறு வழிகளில் உளவியல் ரீதியிலான தாக்கங்களை ஏற்படுத்துகிறது.

விளம்பரத் தயாரிப்பு நுட்பம்

பெரும்பாலான விளம்பரங்களில் செல்வந்தக் குடும்பங்களுக்கு ஏற்ற விதத்தில் காட்சிகள் வடிவமைக்கப்பட்டு பொது ஜன ஊடகமான தொலைக்காட்சிகளில் ஒளிபரப்பப்படுவதால் அதனைச் சாதாரண, மத்தியதர வர்க்கத்தினர் பார்வையிடும் போது தாக்கத்திற்கு உட்படுத்தப்படுகின்றனர்.

போட்டி நிறுவனங்களுக்கிடையிலான மோதல்

வணிக நடவடிக்கைகளில் ஈடுபடும் நிறுவனங்கள் தமது உற்பத்திப் பொருட்களைச் சர்வதேச மற்றும் உள்ளூர்ச் சந்தைகளில் எப்பொழுதும் அதன் தரத்தினைக் குறைத்துக் கொள்ளாமல் இருப்பதற்கும் ஏனைய போட்டி நிறுவனங்களின் உற்பத்திப் பொருட்களைப் பின் தள்ளுவதற்கும் பல்வேறு உபாயங்களைக் கையாளுகின்றனர். இதன்படி போட்டிக் கம்பனி உற்பத்திகளைப் போலியாகத் தயாரித்தல், ஒப்பான பொருட்களைத் தயாரித்தல், குறைந்த விலையில் சந்தையிடல் முதலியன வணிகச் செயற்பாடுகளை மேற்கொள்ளுதல் முதலியன ஒழுக்க மீறல்களை ஏற்படுத்துகின்றன.

சந்தையில் நுகர்வோர் எதிர்கொள்ளும் சவால்கள்

சந்தையில் முன்னிலை வகிக்கும் நிறுவனங்களின் வர்த்தக நாமம், இலட்சினை என்பவற்றுக்கு ஒப்பான அமைப்பில் இன்னுமொரு நிறுவனம் அதனைப் பிரதி செய்வதனால் வாடிக்கையாளர்களுக்கு தரமறிந்து பொருட்களை கொள்வனவு செய்ய முடியாமை ஏற்படுகிறது.

ஒப்பிட்டு போட்டிப் பொருளின் தரத்தினை மதிப்பிடுதல்

ஒரு நிறுவனமானது தம்முடைய உற்பத்திப் பொருட்கள் மட்டும் தான் அதி சிறந்தது என்பதனை நுகர்வோரிடம் அடையாளப்படுத்துவதற்கு ஏனைய நிறுவனங்களின் உற்பத்திப் பொருட்களை மறைமுகமாக, குறியீட்டு அடிப்படையில் தரம் குறைவான முறையில் விளம்பரம் செய்தல்.

வணிக நிறுவனங்களின் தந்திரோபாயங்கள்

வணிக நிறுவனங்கள் அதீத இலாப நோக்கங்களைக் கொண்டு, தமது ஒட்டு மொத்த உற்பத்திகளையும் நுகர்வோரிடம் கொண்டு சேர்ப்பதற்குப் பல தந்திரோபாயங்களைக் கையாளுகின்றன. இதனால் நுகர்வோர் நன்மைகளைப் பெற்றாலும் நுகர்வோரின் சிறு தொகைப்பணத்தின் மூலம் தமது உற்பத்திப் பொருட்களைக் கொள்வனவு செய்வதற்கு உரிய வழிகள் உள்ளமையால் குறுகிய காலத்தில் குறைந்தளவிலான நன்மைகளைப் பெற்று தமது சேமிப்புப் பழக்கத்தையும் கைவிடவேண்டிய நிலை ஏற்பட்டுள்ளமை.

வணிகச் சந்தையில் நிலவும் போட்டித்தன்மையால் வணிக நிறுவனங்கள் மக்களின் தேவையை உணர்ந்து புதிய உற்பத்திகளை அறிமுகம் செய்கின்றன. இவை மக்களின் தேவைகளை உடனடியாக நிறைவேற்றினாலும், காலம் தாழ்த்திப் பல்வேறு வகையான உடலியல் ரீதியிலான தாக்கங்களை ஏற்படுத்துகிறன.

நோய்கள் ஏற்படுதல்

வணிக நடவடிக்கைகளில் விளம்பரங்களின் ஊடாக உருவாக்கப்பட்ட நவீனக் கலாசாராமானது, ஆரோக்கியமற்ற மனித சமூதாயத்தை உருவாக்குகிறது. இதனால் தற்கால மனிதர்களிடையே சிறுநீரக நோய், தலைமுடி உதிர்வு, நரம்பு, தோல் சம்பந்தமான நோய்கள் முதலிய ஏற்படுகின்றன. உதாரணமாக, இன்றைய சமையல் தயாரிப்புகளில் பயன்படுத்தப்படும் அஜினமோட்டோ நரம்பு தொடர்பான பல நோய்களை ஏற்படுத்துவதாக அமெரிக்கப் பல்கலைக்கழக ஆய்வுகள் தெரிவிக்கின்றன. மேலும் குளிர்பான உற்பத்திகளில் பயன்படுத்தப்படும் இரசாயணப் பதார்த்தங்கள் உடலுக்குத் தீங்கு விளைவிக்கின்றன. ஆண், பெண் இருபாலரும் தமது தோற்றத்தை அழகுபடுத்துவதற்குப் பல்வேறு வகையான அழகு சாதனப் பொருட்களை நாளாந்தம் தமது அத்தியாவசியத் தேவையாகப் பயன்படுத்தி வருகின்றனர். இதனை நன்கு அறிந்த கொண்ட அழகு சாதனப் பொருட்களை உற்பத்தி செய்யும் நிறுவனங்கள் மாயைத் தோற்றத்தைக் காண்பித்துத் தமது பொருட்களை விளம்பரப்படுத்துகின்றனர். இதில் மயங்கிய இரு பாலரும் வயது வித்தியாசமின்றி அழகு சாதனப் பொருட்கள் பாவனையின் போதும், பாவனையின் பின்னரும் பல்வேறு மன உளச்சல்ளையும், ஏமாற்றங்களையும் எதிர்நோக்குகின்றனர்.

கலாசாரப் பாதிப்பு

நாகரீக வளர்ச்சியால் மனிதன் பயன்படுத்தும் அனைத்து விதமான பொருட்களுக்கும் விளம்பரம் தேவை என்ற கட்டாய நிலை ஏற்பட்டுள்ளது. மேலைத்தேய கலாசாரத்தில் பாவிக்கும் பொருட்களைப் பாரம்பரிய, மரபுகளுக்கு முன்னுரிமை கொடுக்கும் நாடுகளில் நவீனத் தொடர்பாடல் சாதனங்கள் ஊடாக விளம்பரம் செய்யும் போது ஏராளமான கலாசாரப் பாதிப்புகள் நாளாந்தம் இடம் பெற்று வருகின்றன. உதாரணம், சம்போ, கிறீம், சவற்காரம் உள்ளிட்ட பெரும்பாலான அழகு சாதனப் பொருட்களை விளம்பரம் செய்யும் போது கவர்ச்சிகரமாகப் பெண்கள் காட்டப்படுவதும், விளம்பரப்படுத்தப்படும் பொருட்கள் குறைவாக முக்கியத்துவப்படுத்தப்படுவதும் நிகழ்கிறது. இந்நிலையில் “ஆளுக்கா விளம்பரம் அல்லது பொருளுக்கா விளம்பரம்” எனத் தெரியாத நிலை ஏற்படுகிறது.

நாகரிக மோகத்திற்கு அடிமையாக்குதல்

விளம்பரங்களில் காட்டப்படும் பொருட்களால் ஆடம்பரமான வாழ்க்கைக்கு மக்கள் அடிமையாகின்றனர். அதாவது விலையுயர்ந்த கிறீம் வகைகள், எண்ணெய் வகைகள், கையடக்கத் தொலைபேசி வகைகள், உடைகள் முதலிய பொருட்கள் நாளாந்தம் விளம்பரங்களில் காட்சிப்படுத்தப்படுவதால் தாமும் அதனைப் பயன்படுத்த வேண்டும் என்ற நிலைக்குத் தள்ளப்படுகின்றனர். இதனால் நாளாந்த வாழ்க்கைச் செலவுகள், கடன் சுமைகள் அதிகரிக்கின்றன.

அமில மழை உருவாக்கம்

உலகின் கைத்தொழில் மயமாக்கல் செயற்பாடானது பல்வேறு சூழலியல் ரீதியிலான தாக்கங்களை உருவாக்கி வருகிறது. கைத்தொழில் மயமாக்கத்தினால் பெருகி வரும் தொழிற்சாலைகளில் இருந்து வாயுவாக வெளியேற்றப்படும் அமிலத் துகள்கள் வளிமண்டலத்தில் சேர்வதன் மூலம் நகர்ப்புறங்களில் அமில மழை உருவாகிறது.

வெப்பநிலை அதிகரிப்பும் பாலை நிலமாதலும்

கைத்தொழில் மயமாக்கத்தினால் வெப்பநிலை அதிகரித்துள்ளது. இதனால் 2050ஆம் ஆண்டுகளில் வெப்பநிலை அதிகரிப்பு பாரிய விளைவினை ஏற்படுத்தும் என எதிர்வு கூறப்படுகிறது. அதிகரிக்கும் வெப்பநிலையால் மழைவீழ்ச்சி குறைவதோடு பெரும்பகுதி பாலை நிலங்களாகவும் மாறிவருகிறது. இதனால் விவசாய நடவடிக்கைகள் பாதிப்படைவதோடு கரையோரப்பகுதிகளும் கடலில் மூழ்கும் அபாயம் காணப்படுகிறது.

ஓசோன் படலப் பாதிப்பும், பரம்பரை அலகுகளில் மாற்றமும்

இன்றைய கைத்தொழில் செயற்பாடுகளில் பயன்படுத்தப்படும் இரசாயணப் பொருட்களால், குறிப்பாக, குளோரா புளோரா காபன், கந்தக ஒட்சைட், சோடியம், ஒட்சைட் போன்றவை பூமியின் பாதுகாப்பு படலமான ஓசோன் படலத்தைப் பாதிப்படையச் செய்வதனால் அவற்றினூடாக ஊடுருவும் புற ஊதாக்கதிர் வீச்சுக்கள் பூமியின் வெப்பநிலையை அதிகரிக்கச் செய்வதோடு உடலியல் ரீதியாக பல நோய்களையும் ஏற்படுத்துகிறது. மேலும் பரம்பரை அலகுகளிலும் மாற்றத்தை ஏற்படுத்துகிறது.

சமகால வணிக நடவடிக்கைகளில் விளம்பரத்தைத் தவிர்த்து வணிக நிறுவனங்களால் தமது சந்தைப்படுத்தலை முன்னெடுத்துச் செல்ல முடியாத நிலையில் விளம்பரங்கள் வணிக நடவடிக்கைகளில் ஒன்றிப் போயுள்ளது. இவ்வாறான மிக நெருக்கமான ஒன்றிணைப்பால், பல வழிகளில் சமூதாயத்தில் ஒழுக்க மீறுகைகள் ஏற்பட்டு வருகின்றமை சம காலத்தில் சாதாரண விடயமாக உள்ளது. எனவே வணிக நிறுவனங்கள் தம் உற்பத்தி சார்ந்த விளம்பரங்களை நுகர்வோரிடம் கொண்டு சேர்க்கும் போது மிகவும் பொருத்தமானதாகவும், நம்பகத்தன்மையினை உறுதிப்படுத்துவதாகவும் அமைய வேண்டியது அவசியமாகும். எனவே விளம்பரங்களானது நுகர்வோரின் பொருள் கொள்வனவை இலகுபடுத்துவதற்கான வழிகாட்டியாக அமைய வேண்டுமே தவிர, முற்றுமுழுதாக இலாப நோக்கம் கருதிய நிறுவனங்களின் நலன்களை மட்டும் கருத்தில் கொண்டு விளம்பரங்களை அமைத்தல் கூடாது. இவ்வாறு செய்வதனால் ஒழுக்கமீறல்களை தவிர்த்து கொள்ளலாம்.

1. https://en.wikipedia.org/wiki/Advertising

2. https://www.merriam-webster.com/dictionary/advertisement

3. http://www.thefreedictionary.com/advertisement

4. http://www.hongkiat.com/blog/70-creative-advertisements-that-makes-you-look-twice/

5. https://en.wikipedia.org/wiki/Advertisement_film

6. https://www.advertising.com/

7. https://www.newthinktank.com/2010/03/marketing-examples-most-successful-ads-in-history/

8. http://www.creativebloq.com/inspiration/print-ads-1233780/

9. http://www.toxel.com/inspiration/2011/06/09/15-examples-of-creative-advertising/

*****

இது முத்துக்கமலம் இணைய இதழின் படைப்பு.