நாம் பொதுவாக எப்பொழுதும் காலை தொங்க வைத்தே அதிகமாக அமர்ந்திருக்கிறோம். இரண்டு சக்கர வாகனத்தில் பயணிக்கும் பொழுது, பேரூந்தில், இரயில் வண்டிகளில், சினிமா தியேட்டரில், பள்ளிகளில், அலுவலகங்களில், வீடுகளில், சோபாக்களில், கட்டில், நாற்காலி இப்படி நன்றாக யோசித்துப் பார்த்தால் நாம் அதிக நேரமாகக் காலைத் தொங்க வைத்துக் கொண்டே இருக்கிறோம். இப்படிக் காலைத் தொங்க வைத்துக் கொண்டு அமர்வதால், நமது உடலில் இரத்த ஓட்டம் இடுப்பிற்குக் கீழ்ப்பகுதியில் மட்டுமே அதிகமாகச் செல்கிறது...

அதே வேளையில், நாம் காலை மடக்கிச் சம்மணம் போட்டு அமரும் பொழுது இடுப்புக்கு மேலே இரத்த ஒட்டம் அதிகமாகவும் வருவதற்கு வாய்ப்பு உள்ளது. நமது உடலில் இடுப்புக்கு கீழே உள்ள கால்களுக்கு நடக்கும் பொழுது மட்டும் இரத்த ஓட்டம் சென்றால் போதும். மிக முக்கியமான உறுப்புகளாகிய சிறுநீரகம், கணையம், நுரையீரல், மூளை, கண், காது ஆகியவை இடுப்புக்கு மேல்ப்பகுதியில்தான் இருக்கிறது. எனவே ஒருவர் காலை தொங்கப் போடாமல் சம்மணங்கால் போட்டு அமர்ந்திருந்தால் அவருக்கு சக்தியும், ஆரோக்கியமும் அதிகமாகக் கிடைக்கிறது. எனவேச் சாப்பிடும் பொழுதாவது கீழே உட்கார்ந்து காலை மடக்கி அமர்ந்துதான் சாப்பிட வேண்டும். ஏனென்றால், இடுப்புக்கு கீழே இரத்த ஓட்டம் செல்லாமல் முழு சக்தியும் வயிற்றுப் பகுதிக்குச் செல்லும் பொழுது நமக்கு ஜீரணம் நன்றாக நடைபெறும்.

சாப்பிடும் பொழுது காலைத் தொங்க வைத்து நாற்காலியில் அமர்வதனால் இரத்த ஓட்டம் வயிற்றுப் பகுதிக்குச் செல்லாமல் காலுக்கே அதிகமாகச் செல்கிறது. இந்திய வகைக் கழிவறை செல்லும் போது மட்டும்தான் காலை மடக்கி அமர்கிறோம். யுரோப்பியன் கழிவறையில் அமரும் பொழுது குடலுக்கு அதிக அளவு அழுத்தம் கொடுத்தால் மட்டுமே கழிவு வெளியேறும், அதனால்தான் இப்பொழுது சிறுகுழந்தைகள் கூட யுரோப்பியன் வகையினை பயன்படுத்துவதால் அவர்களால் தரையில் சுக ஆசனத்தில் அமர்வதற்கு முடியாமல் தவிக்கிறார்கள்.

கட்டிலிலோ, ஷோபாவிலோ அமரும்பொழுது சம்மணம் இட்டே அமருங்கள்... சாப்பிடும் பொழுது தரையில் ஏதாவது ஒரு விரிப்பை விரித்து அதன் மேல் சம்மணங்கால் போட்டு அமர்ந்து சாப்பிட்டால் சாப்பாடு நன்றாக ஜீரணிக்கும். சில வீடுகளில் அதற்கு வாய்ப்பில்லை என்று இருந்தால் டைனிங் டேபிளில் அமர்ந்து காலை மடக்கி வைத்து அமர்ந்து சாப்பிட்டுக் கொள்ளுங்கள்.


சாப்பிடும் போது கீழ்க்காணும் தகவல்களைக் கவனத்தில் கொள்ளலாம்;

* நின்று கொண்டு சாப்பிடும் பழக்கத்தை மாற்றி, குடும்பத்துடன் அமர்ந்து ஒன்றாய் சாப்பிடுங்கள்.

* எந்த வகைச் சாப்பாடாக இருந்தாலும் நன்றாக மென்று, கூழாக்கிச் சாப்பிடுங்கள்.

* பேசிக் கொண்டு, தொலைக்காட்சி, புத்தகம் பார்த்து கொண்டு சாப்பிடுவதைத் தவிருங்கள்.

* சாப்பிடும் பொழுது இடையில் தேவையில்லாமல் தண்ணீர் குடிக்காதீர்கள். சாப்பிட்டு முடித்த பின்பு, கடைசியில் தண்ணீர் குடிக்க மறக்காதீர்கள். தேவையான அளவில் தண்ணீர் பருகுங்கள்.

* அவசர அவசரமாக சாப்பிட வேண்டாம்.

* பிடிக்காத உணவுகளை கஷ்டபட்டுச் சாப்பிட வேண்டாம்.

* அதே போன்று பிடித்த உணவுகள் என்று, அளவுக்கு அதிகமாகவும் சாப்பிட வேண்டாம்.

* ஆரோக்கியமான உணவுகளை அதிகம் சாப்பிடுங்கள்.

* இரவு உணவில், முள்ளங்கி மற்றும் கீரை உணவுகளைச் சேர்க்க வேண்டாம்.

* சாப்பாட்டுக்கு அரை மணி நேரம் முன்பு பழங்கள் சாப்பிடுங்கள்... சாப்பிட்ட பின்பு பழங்கள் சாப்பிட வேண்டாம்.

* சாப்பிடும் முன்பு சிறிது நடந்து விட்டு பின்பு சாப்பிடுங்கள், இரவு சாப்பிட்ட பின், நடப்பது நலம்.

* சாப்பிட்டு 2 மணி நேரம் கழித்துத்தான் தூங்க வேண்டும்.

*****

இது முத்துக்கமலம் இணைய இதழின் படைப்பு.