வெஜ் பிரியாணி
சசிகலா தனசேகரன்
தேவையான பொருட்கள்:
1. பாசுமதி அரிசி – 2 கப்
2. வெங்காயம் – 2 எண்ணம்
3. தக்காளி – 2 எண்ணம்
4. பச்சை மிளகாய் – 1 எண்ணம்
5. கேரட், பீன்ஸ், உருளை – 1/4 கிலோ
6. மீல் மேக்கர் – சிறிது
7. மிளகாய்த் தூள் – 1 1/2 தேக்கரண்டி
8. உப்பு – தேவையான அளவு
9. புதினா, மல்லித்தழை – 1 கைப்பிடி
10. இஞ்சி பூண்டு விழுது – 1 தேக்கரண்டி
11. எண்ணெய் – 2 தேக்கரண்டி
12. நெய் – 1 தேக்கரண்டி
13. பட்டை – சிறு துண்டு
14. கிராம்பு – 2 எண்ணம்
15. ஏலக்காய் – 1 எண்ணம்
16. பிரிஞ்சி இலை – 1 எண்ணம்
பொடி தயாரிக்க
17. மிளகு – 10 எண்ணம்
18. சீரகம் – 1/2 தேக்கரண்டி
19. பெருஞ்சீரகம் – 1/2 தேக்கரண்டி
செய்முறை :
1. அரிசியைக் கழுவி 15 நிமிடம் ஊற வைக்கவும்.
2. மிளகு, சீரகம், பெருஞ்சீரகம் ஆகியவற்றைச் சேர்த்துப் பொடி செய்து வைத்துக் கொள்ளவும்.
3. மீல் மேக்கரில் தண்ணீர் ஊற்றி உப்பு சேர்த்து நன்கு கொதிக்க விடவும். நன்கு கொதித்து உப்பி வந்ததும் இறக்கி தண்ணீர் வடித்து ஒன்றிரண்டாக நறுக்கவும்.
4. குக்கரில் எண்ணெய் மற்றும் நெய் ஊற்றிப் பட்டை, கிராம்பு, ஏலக்காய், பிரிஞ்சி இலையைப் போட்டுத் தாளிக்கவும்.
5. அதனுடன் இஞ்சிப் பூண்டு விழுது சேர்த்து பச்சை வாசம் போகும் வரை வதக்கவும்.
6. வதக்கியவற்றுடன் வெங்காயம், பச்சை மிளகாய் சேர்த்து நன்கு வதக்கவும்.
7. வெங்காயம் வதங்கியதும் கேரட், பீன்ஸ், உருளை, மீல் மேக்கர் ஆகியவற்றைச் சேர்த்துக் கிளறவும்.
8. காய்கறிகளுடன் மிளகாய்த் தூள் மற்றும் தேவையான அளவு உப்பு சேர்த்து நன்கு கிளறவும்.
9. அதனுடன் புதினா, மல்லித்தழை சேர்த்துப் பிரட்டவும்.
10. அடுப்பை மிதமான தீயில் வைத்து ஊற வைத்த அரிசியைச் சேர்த்து மெதுவாக அரிசி உடைந்து விடாமல் கிளறவும்.
11. அரிசி, காய்கறிக் கலவையில் தக்காளி சேர்த்துக் கிளறவும்.
12. அதில் தேவையான தண்ணீர் ஊற்றி ஒரு தேக்கரண்டி பொடி செய்த மிளகு, சீரகத்தை சேர்க்கவும். (தண்ணீரின் அளவு பாசுமதி அரிசியாக இருந்தால் ஒரு கப்பிற்கு 1 1/2 கப் என்றும், சாப்பாட்டு அரிசியாக இருந்தால் ஒரு கப்பிற்கு 2 கப் என்றும், காய் வேகக் கூடுதாலாக அரை டம்ளர் தண்ணீரும் வைக்கவும்)
13. நன்கு கிளறி விட்டுக் குக்கரை மூடித் தீயை அதிகமாக வைக்கவும்.
14. குக்கரில் ஆவி வரும் போது சிம்மில் வைத்து ஆவி அடங்கியதும் திறந்து கரண்டியால் அடி வரை நன்கு கிளறி மீண்டும் மூடி தீயை அதிகமாக வைத்து வெயிட் போடவும்.
15. ஒரு விசில் வந்தவுடன் இறக்கி விடவும். (இப்படிச் செய்வதால் அடி பிடிக்காமல் சீக்கிரம் வெந்து உதிரி உதிரியாக வரும்)
குறிப்பு: தயிர் வெங்காயத்திற்கு வெங்காயத்தைப் பொடியாக நறுக்கி உப்பு சேர்த்து நன்கு கிளறி அப்படியே வைக்கவும். பரிமாறும் போது தயிர் சேர்த்து பரிமாறலாம்.
*****

இது முத்துக்கமலம் இணைய இதழின் படைப்பு.