வாழ்ந்து கொண்டிருப்பது, வாழ்வதற்கான ஆவலைத் தூண்டுவது, வாழ்க்கையை நீட்டிப்பதற்கான பிரயத்தனம் போன்ற உயிரியல் நடவடிக்கைகள் அனைத்திற்குமான காரணம் நம்மைச் சுற்றிலும் நிகழ்ந்து கொண்டிருப்பதை அறிவதும் அறிந்ததை விவாதிப்பதுமேயாகும்.

பத்திரிக்கைகள், தொலைக்காட்சிகள், அரசியல் மைதானங்கள், சாவடிகள், அங்காடிகள் ஆகியவற்றில் இரவும் பகலுமாய் இடைவிடாது நடக்கும் விவாதங்கள் நம் காதுகளில் ஒலித்துக் கொண்டும், நம்மை கடந்து கொண்டும் காற்றில் மிதந்து கொண்டும் இருக்கின்றன. இவ்விவாதங்களில் சில பெயர்ச்சொற்களும், சில வினைச்சொற்களும் மட்டும் எப்படியோ சிறிய பாதிப்புகளுடன் நம் மனதில் தேங்கிக் கொள்கின்றன. அச்சொற்களும் அவை தரும் மனஅதிர்வுளும் அவை பற்றியதான முழுமையான தேடலை அடைய நம் மூளையைக் குடைந்து கொண்டேயிருக்கின்றன. மனமும் மூளையும் ஒத்திசைந்து அறிவதற்கான தேடல் அதிகமாகிக் கொண்டு இருப்பதால்தான் இவ்வளவு கல்விக் கூடங்களும், பத்திரிக்கைகளும், இணையதளங்களும் உருவாகிக் கொண்டிருக்கின்றன.

இருபதாம் நூற்றாண்டின் தொடக்கம்வரை அறிவைப் பெறுவதும் பொருளினை ஈட்டுவதும் வெவ்வேறு பிரிவினர்களால் வெவ்வேறு திசைகளில் செயல்பட்டுக் கொண்டிருந்தன. பின் இருபத்தியோராம் நூற்றாண்டின் ஆரம்பம் வரை செல்வம் குவிந்திருந்ததால் கல்வியினைப் பெறுவதும், கல்வியாளர்களை அருகில் அமர்த்திக் கொள்வதும் மிகவும் சுலபம் என்னும் நிலை மேலோங்கியது. ஆனால் இந்தக் கணிணி யுகத்தில் கல்வியும் செல்வமும் ஒன்றையொன்று தவிர்க்க இயலாத சக்திகளாக மாறிப் போய்விட்டன. வாழ்க்கை நடத்துவதற்கான மூலபலம் இவ்விரண்டின் சங்கமத்தில் இருந்தே தொடங்குகின்றன. அறிவையும், செல்வத்தையும் இணையான விகிதத்தில் உயர்த்திக் கொண்டவர்கள்தான் இனி உலகின் சக்தி மிக்கவர்களாக மாறுவார்கள் என்பது தெரிய வருகின்றது.

பள்ளி, கல்லூரி, பல்கலைக்கழகங்கள் வழங்கும் கல்வி, வேலைவாய்ப்புகளை பெற்றுக் கொள்வதற்கான சிறப்பு தொழில்நுட்பக் கல்வி, வேலைவாய்ப்புக்குப் பின் சுயஆர்வத்துடன் பயிலும் கல்வி என்று பல வகையான வாய்ப்புக்கள் நம் முன்னே காணக் கிடைக்கின்றன. இவை அனைத்தும் தன் முன்னேற்றம் சார்ந்தவை. தன் முன்னேற்றம் சார்ந்த செயல்பாடுகளில் ஆழ்ந்து ஈடுபட ஆரம்பிக்கும் பொழுது பிறர் நலன், சமூக நலன் பேணாத சுயநலம் மட்டும் எஞ்சி நிற்கும். இந்த தலைமுறை பெற்றோர்கள் அனைவரும் வருமானம் ஈட்டும் கல்வியையே தன் பிள்ளைகளுக்கு வற்புறுத்தி வருகின்றனர். இதற்குக் காரணம் சந்தைப் பொருளாதாரமும், உலகமயமாக்கல் தரும் நெருக்கடியும் ஆகும்.

இச்சூழலில் வாழும் தலைமுறையையும், எதிர்கால சந்ததியினரையும் நேரடியாகவும், மறைமுகமாகவும் பாதிக்க ஆரம்பிக்கும் பிரச்சனைகளான சுத்தமான குடிநீர், நீர்நிலைகளைப் பாதுகாத்தல், வனங்களையும், வன விலங்குகளையும் பாதுகாத்தல், புவி வெப்பம், தட்ப வெப்ப மாறுதல், ஓசோன் துளை, பாலின சமன்பாடு, உணவுப்பொருள் உற்பத்தி, வேளாண் நிலங்களின் நச்சுத் தன்மை, நகரமயமாக்கல், காற்றில் கலக்கும் மாசுக்கள், ஊட்டச்சத்துக் குறைவு, வேதியியல் உயிரியல் மற்றும் அணு ஆயுதங்கள், முதியோர் மற்றும் குழந்தைகளின் மீதான கண்காணிப்புக் குறைவு, மத தீவிரவாதம் போன்றவற்றை எதிர்கொள்வது எவ்வாறு?

தனி மனிதர்கள், அரசு அமைப்புகள், தொண்டு நிறுவனங்கள், வல்லரசு நாடுகள், வளர்ந்து வரும் நாடுகள், ஐ.நா. சபை அமைப்புகள் என்று யார் பொறுப்பில் இப்பிரச்சனைகளை ஒப்படைப்பது என்று தீர்க்கமாகவும் ஆழமாகவும் யோசிக்கும் பொழுது தனி மனிதர்களின், முக்கியமாக இளைஞர்களின் சுய எழுச்சியும், விழிப்புணர்வும், கடமையும், ஈடுபாடும்தான் தீர்வினை நோக்கி நகர்ந்து செல்ல வழி என்பது புலப்படும்.

மாணவப் பருவத்தில் இருந்தோ, வாழ்க்கையில் ஓரளவு நிலைபெற்ற பின்போ நம் நாட்டின் வரலாறு, உலக நாடுகள், இன, மொழி, மத, ஜாதிய ஒடுக்க முறைகள், சுற்றுச்சூழல் மற்றும் வறுமை போன்றவை குறித்த அறிதலை துவக்குவது மிக அவசியமாகின்றது. பாடப் புத்தகங்கள், நாளிதழ்கள், பருவ இதழ்கள், தொலைக்காட்சிச் செய்திகள் இவைகளைத் தாண்டி செய்திகளையும், விவாதங்களையும், கருத்துருவாக்கங்களையும் அறிந்து கொள்ள ஆர்வம் ஏற்பட்டாக வேண்டும். அரசியல், பொருளாதார, சுற்றுச்சூழல் பாதிப்புகள் உலகின் ஒரு மூலையில் ஆரம்பித்து முற்றிலும் சம்பந்தமில்லாத நாடுகளையும், துறைகளையும் நசுக்கிப் பின் மிக விரைவில் தனி மனிதனின் வாழ்க்கையையும் சீரழித்து வருகின்றது என்பதை நாம் கண்கூடாக கண்டு கொண்டுள்ளோம். ஆகையால் இனிவரும் காலங்களில் தனிமனிதனின் நலனும், சமூகத்தின் நலனும் ஒன்றையொன்று சார்ந்தவையே.. நம்மை சுமந்து கொண்டிருக்கும் பூமியின் நலன், பூமியின் பெரும்பாலான நலன்களை உறிஞ்சிக் கொள்ளும் மனித சமூகத்தின் நலன் ஆகியவை குறித்த அறிதல், அறிந்ததை பல்வேறு கலைவடிவங்களின் மூலம் வெளிப்படுத்துதலும் சம அளவில் இக்கால கட்டங்களில் முக்கியத்துவம் பெறுகின்றன.

அறிதலுக்கான அரிச்சுவடி புத்தகங்களின் தேடலில் ஆரம்பிக்கின்றது. சந்தையில் புனைவு இலக்கியங்களும், புனைவு இல்லாத கட்டுரை இலக்கியங்களும் காணக் கிடைக்கின்றன. கவிதை, சிறுகதை, நாவல் போன்றவற்றில் இடம் பெறும். நாயகர்கள், அவர்களின் கனவிலி நிலை, எதிர்பாராத திருப்பம், வர்ணனைகள் போன்ற சுவராஸ்யங்களால் பெரும் எண்ணிக்கையிலான வாசகர் பரப்பு உருவாகி உள்ளது. புனைவு இலக்கியங்களின் மீதான தொடர் ஆர்வமே கட்டுரை இலக்கியங்களை நோக்கியும் பயணிக்க வைக்கின்றன. இருவகை இலக்கியங்களின் மீதும் சம அளவில் ஆர்வம் கொண்ட படிப்பவர்களும், படைப்பவர்களும், ஒரு காலகட்டத்தில் பேச்சாளர்களாகவும், மனிதர்களின் சிந்தனையில் மிகுந்த தாக்கத்தை ஏற்படுத்தும் தலைவர்களாகவும் உருவாகின்றனர்.

பாடப்புத்தகங்களில் இடம் பெறும் கட்டுரைகள் மேலும் பல அம்சங்கள் கலந்து சுவராஸ்யம் பெற்று வெகுஜன கட்டுரைகளாகப் பத்திரிகைகளில் இடம் பெறுகின்றன. நாளிதழ்களில் வெளிவரும் செய்திகள் களஆய்வு செய்யப்பட்டும், ஆழமான விவரங்கள் சேர்க்கப்பட்டும், எழுத்தாளரின் சமூகப் பார்வை கலந்தும் கட்டுரைகளாகவும், பத்திகளாகவும் வெளிவருகின்றன. அறிவியல், சுற்றுச்சூழல், பொருளாதாரத் திட்ட முன்வரைவுகள் ஆகியவை நிபுணர்களால் வடிவமைக்கப்பட்டும், விவாதிக்கப்பட்டும் உருவாக்கப்படும் கொள்கைகள் சற்று எளிய வடிவில் தலையங்கங்களாகவும், பத்திகளாகவும், சிறப்புக் கட்டுரைகளாகவும், வாசக மனோபாவத்துடன் நாளிதழ்களில் வெளிவருகின்றன. இவையன்றி சங்க இலக்கியம், நவீன இலக்கியம், நாட்டார் கலைகள், நுண்கலைகள் சார்ந்து விமர்சனப் பார்வை மற்றும் விவாத நோக்குடன் நுண்மையான கருத்துக்கள் கட்டுரை வடிவில் ஏராளமாய் வெளிவந்து கொண்டிருக்கின்றன. கதை, நாவல் போன்ற இலக்கியங்கள் வாழ்க்கையை ரசனையுடன் புரிந்து கொள்ளவும், கட்டுரை இலக்கியம் வாழ்க்கையை துணிச்சலுடனும் தன்னம்பிக்கையுடனும் எதிர்கொள்ளவும் துணையாய் அமைகின்றன என்பது மட்டும் உண்மை.