........  ஒவ்வொரு மாதமும் மாதமிருமுறை   1 மற்றும் 15 ம் தேதிகளில் புதுப்பிக்கப்படுகிறது .......

                             
         இணையத்தில் ஒரு இலக்கியப் படைப்பு...                இது தமிழ் ஆர்வலர்களின் இலக்கியத் துடிப்பு...

a

Your Advertisement  Here / உங்கள் விளம்பரம் இங்கு இடம் பெற

a

மனம் திறந்து-38

அஹிம்சைக்கு வாங்க...!

                                                                                                  -சந்தியா கிரிதர்.

மகாபாரதத்தில் அஹிம்சை, தர்மத்திற்கு சமமாக கருதப்படுகிறது. அஹிம்சை என்ற கொள்கையைப் பின்பற்றிய மகாத்மா காந்தி பாரதத்திற்கு சுதந்திரத்தை வாங்கிக் கொடுத்தார். சமஸ்கிருதத்திலிருந்து பிறந்த சொல்லான அஹிம்சை தனக்குள்ளே ஹிம்சையை அடக்கிக் கொண்டு உருவாகியுள்ளது. கொடூரம், வக்ர புத்தி, வஞ்சகம் ஆகிய இயல்புகள் ஹிம்சையில் சேர்த்துக் கொள்ளப்படுகிறது. ஆனால் இந்த ஹிம்சையை, தனக்குள்ளே அடக்கம் கொண்டுள்ள அஹிம்சையானது, தலைதூக்குவதற்கு இடம் கொடுப்பதில்லை. அஹிம்சை, மனிதனை நன்னெறிப் பாதையில் வழி நடத்திச் செல்லுகிறது.

தன்னைப்பற்றி சரியாகப் புரிந்து கொள்ள இயலாத மனிதன்தான் பல கெட்ட எண்ணங்களுக்கு ஆளாகிறான். எவருக்காவது கெடுதல் நினைத்த அந்தக் கணமே அவன் அனுபவித்துக் கொண்டிருக்கும் அனைத்து செலவங்களும் தாமாகவே அழிந்து விடுகிறது, அவனுக்குள்ளே போட்டியும் பொறாமையும் குடிகொள்கிறது, அவனுடைய அருமையான உறவுப் பாலங்கள் உடைந்து விடுகிறது, அவனுக்குள்ளே வெறுப்பும், வஞ்சகமும் ஊறுகின்றது, அவனுடைய அறியாமை வன்முறைகளைக் கையாளச் செய்கிறது. இதனால் தன்னலமும், பயமும் சூழ்ந்து கொண்டு, செய்வது அறியாமல் அவனைத் திக்குமுக்காட வைக்கிறது.

எப்போது அவன் இத்தகைய தீயசக்திகளுக்கு ஆளாகிறானோ, அப்போது அவன் ஆன்மீகத்தைக் கைப்பற்றுகிறான். அவனுக்குள்ளே ஆன்மீகம் ஊற ஊறத் தன்னலமும், பயமும் அவனை விட்டு விலகிச் செல்கின்றது. அவன், இந்த பரந்த உலகத்தில் சுதந்திரமாக சுவாசிக்கத் தொடங்குகிறான். இந்த ஆன்மீகம் வாழ்க்கையின் யதார்த்தத்தை அவனுக்கு தெரிய வைக்கிறது. அவனுக்குள்ளே பதுங்கிக் கிடந்த பேதங்கள், போட்டிகள், பொறாமை ஆகிய தீயசக்திகள் கரைந்து, அவனைப் புதிய மனிதனாக மாற்றுகின்றது. அஹிம்சை என்ற கொள்கையைப் பின்பற்றும் மனிதனின் எண்ணங்களுக்கு நல்லதொரு வடிகால் கிடைக்கிறது. எவனொருவன் அஹிம்சையை தன்னுடைய வாழ்க்கையின் சாரமாக எடுத்துக் கொள்கிறானோ, அவன் சர்வ செல்வங்களையும் பெற்றவனாகக் கருதப்படுகிறான். அதற்காக இன்னொருவனால் தீமைகள் இழைக்கப்படும் போது, அவன், தன்னுடைய தற்காப்பிற்காக கொஞ்சம் ஹிம்சையை பிரயோகிக்கின்றான். அந்த சமயத்தில் பயன்படுத்தப்படும் ஹிம்சையானது மற்றவரைப் புண்படுத்தும் நோக்கத்தோடு உபயோகப்படுத்தப்படுவதில்லை.

உடுத்தும் ஆடை, உண்ணும் உணவு இவைகளிலிருந்து ஒரு மனிதனுடைய அஹிம்சைத் தன்மையை அறிந்து கொள்ளலாம். ஒரு சாதாரண மனிதனின் அன்றாட வாழ்க்கையிலிருந்து அவனுடைய இயல்பைத் தெரிந்து கொள்ளலாம். எதற்கெடுத்தாலும் சண்டைக்கு நிற்கும் அடாவடிப் போக்கை கொண்ட ஒருவனின் முழு விவரத்தை, அவனுடைய ஊரே, பறைசாற்றி விடுகிறது. அவனிடமிருந்து உதிரும் சொற்களிலிருந்தும், அவன் நிகழ்த்தப் போகும் செயல்களிலிருந்தும், அவன் எந்த கொள்கையைப் பின்பற்றுகிறான் என்பதைத் தெரிந்து கொள்ளலாம். மனிதனுடைய சொற்களும், செயல்களும் அவனுடைய எண்ணங்களின் பிரதிபலிப்பாகும்.

கோபம், வெறுப்பு, பொறாமை ஆகியவைகளைக் கொண்ட மனிதனிடமிருந்து தெளிந்த ஓடையை எதிர்பார்ப்பது விரயமாகும். அப்படிப்பட்ட மனிதனிடமிருந்து சூறாவளி, புயல் ஆகியவைகள் உருவாகின்றன. அழிவைத் தரக்கூடும் இப்படிப்பட்ட தன்மைகள் ஒரு மனிதனை அரக்கனாகக் காட்டுகிறது. அந்தச் சமயத்தில் இயற்கையின் நியதிகளையும் அவன் தகர்த்து எறிகின்றான், சுயநலம் இழந்து அதர்மங்களை செய்கின்றான், பாவத்தைச் சேகரித்துக் கொள்கின்றான். எந்தச் சூழ்நிலையிலும் தன்னைக் கட்டுப்படுத்திக் கொண்டு, தூரதிருஷ்டியை பிரயோகித்து செயல்படும் ஒவ்வொரு மனிதனுடைய பாவபுண்ணியக் கணக்கில் தர்மக்கணக்கு அதிகரித்துக் கொண்டு செல்கிறது. இந்த தர்மம்தான் இறுதிவரை மனிதனோடு வாழ்க்கையில் பயணிக்கிறது. தர்மம் தலை காக்கும், தக்க சமயத்தில் கை கொடுக்கும் என்று முன்னோர்கள் சொன்ன பழமொழியை உணர்ந்து அஹிம்சையுடன் செயல்படுவோம்.

சந்தியா கிரிதர் அவர்களின் இதர படைப்புகள

முந்தைய மனம் திறந்து பார்க்க

 

 
                                                                                                                                                                                                                 முகப்பு

Dedicated By : Muthukamalam Educational and Charitable Trust, 19/1, Sugathev Street, Palanichettipatti,Theni-625531, India.