போர்க்களத்தில் ராமனும் ராவணணும் நேருக்கு நேர் சந்தித்தனர்.

இருபுறமும் மிகப் பெரிய படைகள். எல்லோரும் தங்கள் தங்கள் இடத்தில் தயார்.

அது என்ன?

உயரமான ஐந்து வெள்ளைப் புரவிகளுடன் கூடிய, பிரம்மாண்டமான ரதத்தின் மீது புழுதி எழுப்பிக் கொண்டு ராவணன் வருகிறானே?

ஸ்ரீராமரோ வெறுங்காலுடன் கவசமின்றி, தரையில் அல்லவா நிற்கிறார்!

பொருத்தமற்ற இப்போரில் எப்படி ஸ்ரீராமர் வெல்ல முடியும் என ஸ்ரீராமரிடம் சரணாகதி அடைந்த விபீஷணனுக்கு வியப்பு, சந்தேகம். அதனால் அவன் ராவணனையும் ராமரையும் மாறி மாறிப் பார்க்கிறான்.

கவலையுடன் ஸ்ரீராமரை அணுகி, ‘‘என் தெய்வமே, என்ன போர் இது? நீங்கள் இருவரும் எதிர்கொள்வது பொருத்தமில்லாத போர் முறையாக உள்ளதே. இப்படிப்பட்ட நிலையில் உங்களால் ராவணனை எளிதில் வெல்ல முடியுமா?’’ என்று கேட்டான்.

ஸ்ரீராமர் புன்சிரிப்புடன், ‘‘கேளுங்கள் என் நண்பரே. இந்தப் போரில் வெற்றி பெறுவதற்கு மிகவும் மாறுபட்ட ரதம் தேவையாக உள்ளது. சாதாரணமான ரதம் தேவையில்லை. ஆம்! அதுதான் தர்ம ரதம், சத்திய ரதம்’’ என்றார்.


ஸ்ரீராமர் கூறியது ஒரு சாதாரண விளக்கமாக இல்லாமல் ஓர் அரிய சொற்பொழிவு என்றே கூறலாம்.

‘‘நண்பரே! இரு சக்கரங்களான வீரம், பொறுமை இல்லாமல் இந்த தர்மரதம் ஓடாது. ஒரு சக்கரமான வீரம் மட்டும் இருந்து பொறுமையில்லை எனில் நீண்டதொரு போரை எதிர்கொள்ள முடியாது. மாறாக, பொறுமையை இழந்தாலோ எவரையும் சந்திக்கவே முடியாது. ரதத்தின் மேல் பறக்கும் கொடியே யாருடைய ரதம் எனக் காட்டிவிடும். தர்மத்தின் கொடிதான் உயரப் பறக்கிறதே! இந்த ரதத்தின் நான்கு குதிரைகள் என்ன தெரியுமா? உடல் வலிமை, விவேகம், தன்னடக்கம் (தமம்), பிறரிடம் பரிவு (பர்ஹித்). பலமும் விவேகமும் ரதத்திற்கு அருகில் உள்ளே உள்ள குதிரைகள். தமம், பர்ஹித் என்ற மற்ற இரு குதிரைகள் வெளியே உள்ளவை. விபீஷணா! நமது பலமும், விவேகமும் பிறரது நலனுக்காகவே அல்லவா பயன்பட வேண்டும். இந்தத் தர்ம ரதத்தை ஓட்டுபவன் கையிலுள்ள கடிவாளங்கள் மன்னிப்பு, கருணை மற்றும் பிறருக்கு நன்மை செய்தல். யாருக்கு எதிராகப் பயன்படுத்துகிறோம் என்பதில்தான் நமது திறமை உள்ளது. மேலும் இந்த ரதத்தைச் செலுத்துபவன் எப்படிப்பட்டவனாக இருக்க வேண்டும் தெரியுமா? மனதை எப்போதும் இறைவனிடம் வைத்தவனால்தான் இந்த தர்ம ரதத்தைச் செலுத்த முடியும். எனக்குக் கவசம் இல்லையென்றா கவலைப்படுகிறீர்கள்? எனக்கு எதற்கு கவசம்? வைராக்கியம்தான் நமது கவசம். தன் புலன்களை வென்றவனை எந்த ஆயுதத்தால் வீழ்த்த முடியும்? ஆயுதங்களைச் செலுத்தும் சக்தியும் விஞ்ஞானமன்றோ! நீங்கள் எதற்கும் கவலைப்பட வேண்டாம்’’ என்றார்.

விபீஷணன் வியந்தான்.

இது முத்துக்கமலம் இணைய இதழின் படைப்பு.