''நீயும் பல காலமாக என்னிடம் வந்து வேண்டிக் கொண்டிருக்கிறாய். இன்று நானே உனக்கு அருள வந்துள்ளேன்'' என்றார் கடவுள்!

''ஆஹா, தங்கள் கருணையே கருணை'' என்றான் அவன்.

''சரி, யாரும் உன்னை மதிப்பதில்லை என்பதுதானே உன் பிரச்னை? அதற்கு நீ என்ன செய்ய வேண்டுமென்றால்...?'' என்று கடவுள் கூறுவதற்குள், இடைமறித்த அவன்,

''சுவாமி, வீட்டில் என் மனைவி கூட என்னுடன் ஒன்றையும் ஆலோசித்துச் செய்வதில்லை'' என்றான்.

''ஓ, பாவம் நீ. அதனால்தான்...''

''பெருமாளே, என் மகளும் கூட, அவளுக்கு எவ்வளவு சம்பளம் என்றும் கூறுவதில்லை. கேட்டால், இதெல்லாமா உங்களிடம் சொல்வது என்கிறாள் அவள்''

''உனக்குத்தான் எவ்வளவு துன்பம்'' கடவுள் இரக்கம் கொண்டார்.

''இது மட்டுமா? நான் வேலை செய்யும் பன்னாட்டுக் கம்பெனியில் எத்தனை பேர் என்னைப் பார்த்தும் பார்க்காதது போல் போகிறார்கள், வருகிறார்கள்'' என்று கூறுவதற்குள் அவனின் கண்ணில் கண்ணீர் முட்டியது.


''பாவம் மகனே நீ. அதனால்தான் நீ செய்ய வேண்டியது என்னவென்றால்...?'' என்று மீண்டும் கடவுள் கூறுவதற்குள்,

''இல்லை ஐயனே, எனக்கு என்ன வேண்டும் என்று தெரிந்துவிட்டது. எனக்கு ஒரே ஒரு வரம் மட்டும் தாருங்கள்'' அவன் தீர்க்கமாகக் கேட்டான்.

''ம், சொல்லப்பா?''

''நான் ஒரு பன்னாட்டுக் கம்பெனியில் பணி செய்பவன்! அந்த மரியாதை வீட்டிலும் எனக்கு வேண்டும். என் கம்பெனியிலும் மக்கள் என்னைக் கேட்ட பிறகே காரியங்களைச் செய்ய வேண்டும்'' என்றான் அவன் தீர்க்கமாக.

''கந்தா, நன்றாக யோசி. நீ கேட்பது உனக்கு உண்மையில் பயன்படுமா?''

''யாரும் என்னைப் பொருட்படுத்தாமல், என்னிடம் ஒரு வார்த்தை கூடக் கேட்காமல் போகும் போது எனக்கு வரும் வலி, கடவுளே, உங்களுக்குக் கூட தெரியாது'' என்று கூறி அவன் உணர்ச்சி வசப்பட்டான்.

கடவுள் யோசித்தார்.

''தந்தேன்''

''யாருப்பா அங்கே? வாயிலில் தூங்கிக்கிட்டிருருக்குற அவரை எழுப்பி விடுங்கய்யா!'' என ஒருவர் கத்தினார்.

கண் விழித்த அவன் கடவுளைத் தேடினான். பதறினான்.

'சே, எல்லாம் கனவா....? பரவாயில்லை, கனவு என்றாலும் வரம் கொடுத்தாரே, இனி எல்லோரும் என்னிடம்தான் கேட்டு...' என்று நினைத்து அவன் மகிழ்ந்தான். உடனே பலர் அவனிடம் கேட்க ஆரம்பித்தனர்.


''சார், மேலாளர் அறை எங்கே இருக்கு?''

''யப்பா, தேநீர் அருந்த இங்கே கடை எங்கேயிருக்கு?'' என்று ஒவ்வொருவரும் ஒவ்வொன்றைக் கேட்க, ஒரு கட்டத்தில் அவனுக்கு எரிச்சலானது.

எரிச்சலின் உச்சகட்டத்தில் அவன் இருந்த போது ஒருவர், ''கழிப்பறை எங்கே இருக்கு?'' என்று கேட்டார்.

அந்த நிறுவன வாயில் காவலன் கையைத் தலையில் வைத்துக் கொண்டு புலம்பினான்:

''கடவுளே, இதெல்லாமா என்னிடம் கேட்பது?''

எதிரில் இறைவன் படம் ஒன்றில் Watch & Pray என்ற வாசகம் இருந்தது.

இது முத்துக்கமலம் இணைய இதழின் படைப்பு.