ஒரு சமயம் பகவான் புத்தர் தமது சீடர்களும் பொதுமக்களும் அடங்கிய கூட்டத்தில் உபதேசம் செய்துகொண்டிருந்தார். புத்தரின் உபதேசங்களைச் செவிமடுத்துக்கொண்டிருந்த அந்தக் கூட்டத்தில் ஒரு திருடனும் ஒரு விலைமகளும் இருந்தனர்.

மாலை சாய்ந்து இருள் சூழ இருந்த சமயத்தில் புத்தர், “சூரியன் அஸ்தமித்துவிட்டது" என்று கூறி உபதேசம் செய்வதை நிறுத்தினார்.

பெருமான் அவ்விதம் கூறியதும் அவரது சீடர்கள் ''சூரியன் அஸ்தமித்து விட்டது. நீங்கள் அனைவரும் சென்று இப்போது தியானத்தில் ஈடுபடுங்கள் என்று பகவான் குறிப்பாகக் கூறுகிறார்'' என்று நினைத்து தியானம் செய்வதற்காகக் கலைந்து சென்றனர்.

ஆனால் அதுவரை உபதேசம் கேட்டுக்கொண்டிருந்த திருடன். "சூரியன் அஸ்தமித்து விட்டது' என்று புத்தர்பிரான் கூறியதும், 'நான் என் தொழிலை ஆரம்பிப்பதற்கு உரிய நேரம் நெருங்கிவிட்டது'’ என்ற எண்ணத்துடன் திருடுவதற்காக அங்கிருந்து கிளம்பினான்.


அதுபோலவே, புத்தரின் அறவுரைகனை அதுவரையில் கேட்டுக்கொண்டிருந்த விலைமகள், "சூரியன் அஸ்தமித்து விட்டது' என்று புத்ததேவர் கூறியதும், நான் என்னை அலங்கரித்துக் கொண்டு வாடிக்கைக்காரர்களை வரவேற்பதற்கு உரிய நேரம் நெருங்கி விட்டது என்ற எண்ணத்துடன் வீட்டிற்குத் திரும்பினாள்.

இவ்விதம் புத்தர் சொன்னதை அவரவர் தங்கள் மனநிலைக்கு ஏற்பப் பொருள்படுத்திக் கொண்டனர்.

இது முத்துக்கமலம் இணைய இதழின் படைப்பு.