விநாயகருக்குரியதாக 11 விரதங்கள் இருக்கின்றன. அவை;

1. வெள்ளி விரதம்

வைகாசி வளர்பிறை முதல் வெள்ளிக்கிழமை தொடங்கி, ஒரு வருடம் செய்வது வெள்ளிக்கிழமை விரதம். நற்பலன்கள் கிடைக்கும்.

2. செவ்வாய் விரதம்

ஆடிச் செவ்வாய் தொடங்கி, ஒவ்வொரு செவ்வாயும் ஓராண்டு வரை செய்வது. செவ்வாய் தோஷம் விலகிவிடும்.

3. சதுர்த்தி விரதம்

பிரதி மாதம் சதுர்த்தி அன்று இருப்பது காரியத் தடைகள் நீங்கும்.

4. குமாரசஷ்டி விரதம்

கார்த்திகை மாத தேய்பிறை பிரதமை திதி அன்று தொடங்கி மார்கழி மாத பிறை சஷ்டி வரை 21 தினங்கள் செய்வர். 21 இலைகள் உடைய மஞ்சள் நூலை கையில் கட்டிக்கொள்வர். பிள்ளைச் செல்வம் குடும்ப வளத்திற்காக செய்யப்படுகின்ற இந்த விரத்திற்குப் பிள்ளையார் நோன்பு என்ற பெயர் உண்டு.

5. தூர்வா கணபதி விரதம்

கார்த்திகை மாத வளர்பிறை சதுர்த்தி அன்று விநாயகரை அருகம்புல் ஆசனத்தில் அமர்த்தி செய்வது. வம்சவிருத்தி ஏற்படும்.

6. சித்தி விநாயக விரதம்

புரட்டாசி வளர்பிறை 14-ம் திதியான சதுர்ததி திதியில் விரதம் இருப்பது. எதிரிகள் விலகுவர்.


7. தூர்வாஷ்டமி விரதம்

புரட்டாசி வளர்பிறை அஷ்டமி அன்று தொடங்கி விநாயகரை 1 ஆண்டு அருகம்புல்லால் அர்ச்சித்து வருவது. உடல் வலிமை உண்டாகும்.

8. விநாயக நவராத்திரி

ஆவணி வளர்பிறை சதுர்த்தியை தொடர்ந்து ஒன்பது நாட்கள் செய்வது விநாயக நவராத்திரி. நற்பலன்கள் கிடைக்கும்.

9. வெள்ளிப் பிள்ளையார் விரதம்

ஆடி, தை வெள்ளிக்கிழமைகளில் விநாயகரை நேர்ந்து கொண்டு விரதம் இருந்து, நாம் கோருகின்ற பலனுக்கு ஏற்ப துதிகள் பாடி பலகார பட்சனங்கள் படைத்து வணங்குதல். இந்த விரத பூஜையை பெண்கள் செய்ய வேண்டும். எண்ணங்கள் நிறைவேறும்படி செய்வது.

10. செவ்வாய் பிள்ளையார் விரதம்

ஆடி மாத செவ்வாயன்று செய்யப்படுவது. ஆண்கள் கலந்து கொள்ளக்கூடாது. இந்த விரதப் பூஜையைச் செய்யும் பெண்கள் வீட்டிலிருந்து பச்சரிசியைக் கொண்டு வந்து பொது இடத்தில் இடித்து மாவாக்கி தேங்காய் துருவல் சேர்த்து உப்பின்றி கொழுக்கட்டை அடை செய்து விநாயகருக்கு படைப்பர். கன்று போடாத பசு சாணத்தால் உருவம் செய்து புங்கமரக்கொழுந்து, புளிய மரக்கொழுந்தால் தட்டி செய்து மேடையாக்கி அதில் அவரை பிரதிஷ்டை செய்து ஆடிப்பாடுவர். கன்னியாகுமரி, நெல்லை மாவட்டங்களில் இன்றும் இப்பூஜை செய்வர். குமரி மாவட்டத்தில் உள்ள பூதப்பாண்டியில் அமைந்துள்ள ஔவையார் கோவிலில் விசேஷமாகக் செய்யப்படுகிறது. செல்வச்செழிப்புடன் வாழ இந்தப் பூஜை வழி செய்வதாக பெண்களின் நம்பிக்கை.


11. அங்காரக சதுர்த்தி விரதபூஜை

பரத்வாஜ முனிவருக்கும், இந்திர லோகப்பெண் துருத்திக்கும் ஒரு ஆண் குழந்தை பிறக்க, அதைப் பூமாதேவி வளர்த்து பெற்றோரிடம் ஒப்படைக்க மகரிஷியோ அதற்கு அங்காரகன் எனப்பெயர் சூட்டி விநாயகரை பூஜித்து வரும்படி கூறினார். இதில் மகிழ்ந்த விநாயகர் நவக்கிரஹகங்களில் ஒருவராக அங்காரகனுக்கு பதவி அளித்தார். ஏழையாக உள்ள ஒருவன் மாசி தேய்பிறைச் செவ்வாயில் தொடங்கி ஒரு வருடம் பூஜை செய்து வந்தால் பெரும் பணக்காரன் ஆவான் என்று விநாயகர் வழிபாட்டு சாத்திரங்கள் சொல்கின்றன.