சபரிமலை ஐயப்பன் கோயிலின் சிறப்பாகச் சொல்லப்படும் பதினெட்டுப் படிகளும் பதினெட்டு தத்துவங்களைச் சொல்வதாக அமைந்திருக்கின்றன. அவை:

1. முதல் படி - விஷாத யோகம்

பிறப்பு நிலையற்றது. நாம் செய்யும் நல்லவையும் கெட்டவையுமே நம் பாவ புண்ணியங்களை நிர்ணயிக்கும் என்று ஒவ்வொருவரும் உணர வேண்டும். இறைவன் திருவருளால் முக்தி பெற வேண்டும் என்ற ஆத்ம துடிப்பே விஷாத யோகம்.

2. இரண்டாம் படி - சாக்கிய யோகம்

பரமாத்மாவே எம் குரு என உணர்ந்து அவரிடம் ஆத்ம உபதேசம் பெறுவது சாக்கிய யோகம்.

3. மூன்றாம் படி - கர்ம யோகம்

கர்மயோகம் உபதேசம் பெற்றால் மட்டும் போதுமா? மனம் பக்குவம் அடைய வேண்டாமா? பலனை எதிர்பாராமல் கடமையை செய்யும் பக்குவம் கர்ம யோகம்

4. நான்காம் படி - ஞானகர்ம சன்னியாச யோகம்

பாவ- புண்ணியங்கள் பற்றிக்கூட கவலைப்படாமல் எதன் மீதும் பற்றில்லாமல் பரமனை அடையும் வழியில் முன்னேறுவது ஞானகர்ம சன்னியாச யோகம் ஆகும்.

5. ஐந்தாம் படி - சன்னியாச யோகம்

நான் உயர்ந்தவன் என்ற ஆணவம் இல்லாமல் தான தர்மங்கள் செய்வது.

6. ஆறாம் படி - தியான யோகம்

கடவுளை அடைய புலனடக்கம் மிகவும் அவசியம். இந்த புலன்கள் எல்லாம் நம் கட்டுப்பாட்டில் இருக்க வேண்டும்.


7. ஏழாம் படி - பிரம்ம ஞானம்

இந்த உலகில் காண்பவை எல்லாமே பிரம்மம்தான். எல்லாமே இறைவன்தான் என உணர்வது பிரம்ம ஞானம்.

8. எட்டாம் படி - அட்சர பிரம்ம யோகம்

எந்நேரமும் இறைவனின் திருவடி நினைவுடன் இருப்பது.

9. ஒன்பதாம் படி - ஆன்மிக யோகம்

கடவுள் பக்தி மட்டும் இருந்தால் பயனில்லை. ஏழையின் சிரிப்பில் இறைவனைக் காண்பதுதான் உண்மையான பக்தி என்று உணர்வது இந்தப்படி.

10. பத்தாம் படி - விபூதி யோகம்

அழகு, ஆற்றல் போன்று எத்தகைய தெய்வீக குணத்தைக் கண்டாலும், அதை இறைவனாக பார்ப்பது.

11. பதினொன்றாம் படி - விஸ்வரூப தரிசன யோகம்

பார்க்கும் அனைத்திலும் இறைவன் குடிகொண்டுள்ளான் என்று பார்க்கும் மனப்பக்குவத்தை வளர்த்துக்கொள்வது.

12. பன்னிரெண்டாம் படி - பக்தி யோகம்

இன்பம் - துன்பம், ஏழை - பணக்காரன், போன்ற அனைத்து வேறுபாடுகளையும் களைந்து அனைத்திலும் சமத்துவத்தை விரும்புவது.
13. பதிமூன்றாம் படி - க்ஷேத்ரக்ஞ விபாக யோகம்

எல்லா உயிர்களிலும் இறைவன் வீற்றிருந்து அவர்களை இயக்குகின்றான் என்பதை உணர்தல்.

14. பதினான்காம் படி - குணத்ர விபாக யோகம்

வாழ்க்கையில் ஏற்படும் துன்பங்களை அகற்றி இறைவனின் முழு அருளுக்கு பாத்திரமாவது.

15. பதினைந்தாம் படி - தெய்வாகர விபாக யோகம்

நல்ல குணங்களை மட்டும் வளர்த்துக் கொண்டு நம்மிடம் தெய்வாம்சத்தை அதிகரிப்பது.

16. பதினாறாம் படி - சம்பத் விபாக யோகம்

இறைவனின் படைப்பில் அனைவரும் சமம் என்று உணர்ந்து ஆணவம் கொள்ளாமல் நடப்பது.

17. பதினேழாம் படி - சிரித்தாத்ரய விபாக யோகம்

'சர்வம் பிரம்மம்' என்று உணர்ந்து பரப்பிரம்ம ஞானத்தை அடைவது.

18. பதினெட்டாம் படி - மோட்ச சன்னியாச யோகம்

உன்னையேச் சரணாகதி என்று அடைகிறேன் என்று இறைவன் சன்னதியில் அடைக்கலம் அடைந்து, அவன் அருள்புரிவான் என்று அவனையேச் சரணடைவதாகும்.