உணவுப் பயிர்களின் அறுவடைக்கும் அல்லது உணவு விலங்குகள் கொல்லப்படுவதற்கும், நுகர்வோர் அதனை உட்கொள்வதற்கும் இடையில் உணவினைப் பற்றிய அனைத்து நுட்பக் கூறுகளையும் ஆராயும் அறிவியலை உணவு அறிவியல் என்கின்றனர். இது வேளாண் அறிவியல் துறைகளில் ஒன்றாகவும், ஊட்டத்துறையில் இருந்து வேறுபட்டதாகவும் கருதப்படுகிறது.

புது உணவுப் பொருட்களை உருவாக்குவது, அவற்றுக்கான உற்பத்திச் செய்முறைகளை வடிவமைப்பது, பொட்டலம் கட்டுவதற்கான சரியான பொருட்களை இனங்காணுவது, உணவுகளின் ஆயுட்காலங்களைக் கணிப்பது, உணவின் சுவை மற்றும் ஏற்புத் திறனை வாடிக்கையாளர்களிடம் சோதித்துப் பார்ப்பது, வேதி மற்றும் நுண்ணுயிர் சோதனைகளை செய்வது போன்றவை உணவு நுட்பவியலாளர்களின் பணிகளில் அடங்கும்.

உணவு அறிவியல் துறை என்பது ஒரு பல்துறை அறிவியலாகும். நுண்ணுயிரியல், வேதிப்பொறியியல், உயிர்வேதியியல் போன்ற பல துறை நுட்பங்களும் உணவு அறிவியலில் பயன்படுகின்றன.


1. உணவுப் பாதுகாப்பு அல்லது உணவு நுண்ணுயிரியல் - உணவு மூலம் பரவும் நோய்களுக்கான காரணம், அவற்றை தடுப்பது குறித்த துறை.

2. உணவுப் பதப்படுத்தல் - உணவுத் தரம் கெடாமல் பதப்படுத்துவது, கெட்டுப் போவதற்கான காரணங்களை ஆராயும் துறை.

3. உணவுப் பொறியியல் - உணவு உற்பத்திக்கான தொழிற்சாலை செய்முறைகள்.

4. உணவு வேதியியல் - உணவின் மூலக்கூறுக் கட்டமைப்பு, அவற்றுக்கு இடையே நிகழும் வேதிவினைகள் குறித்த துறை.

5. நுகர்வுச் சோதனை - நுகர்வோரின் புலன்களுக்கு உணவை ஏற்கும் திறன், விருப்பம் குறித்து ஆயும் துறை.

6. உணவுப் பொருள் உருவாக்கம் - புது உணவுப் பொருட்கள் உருவாக்கம் குறித்த ஆய்வுத் துறை.

என்று உணவு தொடர்பான பல்வேறு துறைகள் இருக்கின்றன.


இதே போன்று, உணவு குறித்த படிப்புகளும் கீழ்க்காணும் மூன்று பிரிவுகளின் கீழ் இருக்கின்றன.

1. உணவுத் தொழில்நுட்பம் (Food Science & Engineering) - உணவு பொருட்கள், அதற்கான இயந்திரங்கள் குறித்த தகவல்களைக் கொண்ட படிப்பு

2. சமையல் தொழில்நுட்பம் (Catering Technology) - உணவு செய்முறைகள் குறித்த தகவல்களைக் கொண்ட படிப்பு.

3. மனையியல் (Home Science) - உணவு செய்முறைகளைக் கொண்ட பாடத்திட்டங்கள் அடங்கிய படிப்பு.

*****

இது முத்துக்கமலம் இணைய இதழின் படைப்பு.