விழிகள் மூடிப் படுத்திருந்தால்
     விடியல் விழிக்குத் தெரியாது
விழித்த விழிக்கே இருள்விரட்டி
     விடிந்த ஒளியின் எழில்தெரியும்
வழியா வியர்வை உடலிருந்தால்
     வாழ்க்கை இருளில் போய்முடியும்
பொழியும் வியர்வை உடலுக்கே
     பொலியும் அழகு வாழ்வமையும் !

மண்ணில் காலை ஊன்றுதற்கு
     மனத்தில் அச்சம் கொண்டிருந்தால்
மண்ணில் நிற்க முடியாது
     மாற்றம் செய்ய இயலாது
எண்ணம் செயலாய் உருபெறவே
     எழுச்சி நெஞ்சில் ஏற்றிவிட்டால்
விண்ணும் கைக்குள் அடங்கிவிடும்
     வியக்கும் உயர்வும் உனையடையும் !

வெல்லும் முயற்சி இல்லாமல்
     வெற்றி உன்னில் விளையாது
புல்லும் உனக்கு வில்லாகும்
     புதிய முயற்சி உனக்கிருந்தால்
அல்லும் பகலும் சோராமல்
     ஆற்றும் உறுதி தளராமல்
சொல்லும் செயலும் ஒன்றானால்
     சொர்ணம் போல வாழ்வொளிரும் !

இது முத்துக்கமலம் இணைய இதழின் படைப்பு.