நீரால் நெருப்பையும், குடையால் சூரிய தாபத்தையும், கூர்மையான ஈட்டியால் பெரிய மதயானையையும், தடியால் பசு, கழுதை முதலியவைகளையும், மருந்தால் வியாதியையும், பலவித மந்திரங்களால் விஷத்தையும் அடக்கிவிடலாம். எல்லாவற்றுக்கும் சாஸ்திரத்தில் மருந்து (உபாயம்) சொல்லியிருக்க, மூர்க்கனுக்கு மாத்திரம் மருந்தில்லையே?
இறைச்சி உண்ணும் செயல் மிக மிகக் கொடுமையானது. மனிதன் தாவர உணவுக்கு மாறுகிறான் என்பது அறிவின் வளர்ச்சிக்கு முதற்படி ஆகும்.
- டால்ஸ்டாய்
இரண்டுவிதச் சுதந்திரங்கள் இருக்கின்றன. ஒருவன் விரும்பியதைச் செய்ய அனுமதிக்கும் சுதந்திரம் ஒரு வகை; செய்ய வேண்டியவற்றைச் செய்ய அனுமதிக்கும் சுதந்திரம் இரண்டாவது வகை.
- சார்லஸ் கிங்ஸ்லி
நிலையான மனதுடைய மனிதன் விதியை நம்புகிறான். ஊசலாடும் மனதை உடைய மனிதன் அதிருஷ்டத்தை நம்புகிறான்.
- பெஞ்சமின் டிஸ்ரேலி
குருடன் வழியில் இருக்கும் வைக்கோல் துரும்பை மிதித்தாலும் பீதி கொள்ளுகிறான். அதுபோல மாயையால் கட்டுண்டவர்கள் ஒவ்வொரு சிறிய விஷயத்தையும் கண்டு பயமடைகிறார்கள்.
- ஞானதரிசினி
உன்னிடம் பொருள்கள் இல்லை. உனது இறைவனின் அருளை எதிர்பார்த்திருக்கிறாய், இந்தத் தருணத்தில் உன்னிடம் ஒருவர் ஏதேனும் கேட்கிறார். அந்த அன்பரை நீ புறக்கணிக்கும்படி நேரிட்டால் மிகவும் அன்பான வார்த்தைகளையே அவருக்குக் கூறிவிடு.
- குர்ஆன்
துஷ்டர் எல்லோரையும் உயர்பதவியில் வைப்பவனும், தர்மத்துக்குக் கட்டுப்படாதவனும், தன் நடத்தை இவ்வளவு கேவலம் என்பதை முற்றிலும் மறந்தவனும், ஆனால் விதிவசத்தால் ஐசுவரியமடைந்தவனும், நற்குணங்களுக்கெல்லாம் விரோதியும் ஆகிய அற்பனுடைய நாட்டிலிருக்கும் எவன் தான் சுகமடைவான்?
- பர்த்ருஹரி
எவன் தன் குடும்பத்தைத் தாங்காமலும், பகைவரை அழிக்காமலும், உள்ள பொருளைக் காப்பாற்றாமலும் இருக்கிறானோ அவனுக்கு உயிர் வாழ்க்கையால் ஆகும் பயன் யாது?
- சுக்கிர நீதி
தன் நன்னடத்தையினால் தகப்பனைத் திருப்தி செய்பவனே புத்திரன். கணவனுடைய நன்மையையே விரும்புகிறவள் மனைவி. துன்பத்திலும் இன்பத்திலும் சமமாக நடப்பவனே மித்திரன். இந்த மூன்றும் இவ்வுலகில் புண்ணியவான்களுக்குத்தான் அமைகின்றன.
- பர்த்ருஹரி
தனது உணவுக்காகக் கவலைப்படுவது லோகாயத சிந்தனை. அடுத்தவன் உணவுக்குக் கவலைப்படுவது ஆன்மிகச் சிந்தனை.
- மார்ட்டைன்
விவேகம் எப்போதும் ஒரு வரப்பிரசாதம். கல்வியறிவு சில சமயம் சாபக்கேடு ஆகிவிடுவதுண்டு.
- ஜான்ஷெட்
படிக்கத் தகுந்த புத்தகங்களைவிட படிக்கத்தகாத புத்தகங்களே ஏராளம்.
- ரவீந்திரநாத் தாகூர்
மனதில் எழும் தீய எண்ணங்களை எல்லாம் அகற்றிவிட வேண்டும். ஒரு தீய எண்ணத்துக்கு இடம் தந்தால் உடனே கோட்டைத் துவாரத்து வழியாகப் பகைவருடைய படைகள் நுழைவது போல ஆயிரக்கணக்காக வந்து நுழைந்துவிடும்.
- ராஜாஜி
கோபம் எழும்போது, அதன் விளைவுகளை எண்ணிப் பார்.
- கன்பூஷியஸ்
மனிதனுக்கு உள்ள மாண்பை இயற்கையிலேயே அறிந்து நடப்பது தான் ஆண்மை.
- விவேகானந்தர்
இயற்கை மனிதனுக்கு இரண்டு காதுகளும் இரண்டு கண்களும் கொடுத்திருக்கிறது. ஆனால் நாக்கு மட்டும் ஒன்றுதான். பேசுவதைக்காட்டிலும் பார்ப்பதும் கேட்பதும் தான் அதிகம் இருக்க வேண்டும் என்பதே இதன் நோக்கம்.
- சாக்ரட்டீஸ்
உழைப்பு என்பது தெய்வ வழிபாட்டுக்குச் சமம், சிரிப்பே வாழ்க்கையின் ஜீவன்.
- வல்லபபாய் படேல்
இறைவனை நான் நேசிப்பதற்குக் காரணம், கடவுளே இல்லை என்று சொல்லும் அளவிற்கு அவர் சுதந்திரம் அளித்திருப்பது தான்.
- ரவீந்திரநாத் தாகூர்
இல்லறமோ துறவறமோ ஜனசமுதாயத்திற்கும் ஜீவராசிகளுக்கும் சேவை செய்வதாக இருக்க வேண்டும். இந்தப் பொது நல உணர்ச்சி இல்லாவிட்டால் எந்த அறமும் பயன்படாது.
- ரமண மகரிஷி
நீ ஒருவரிடம் பொறாமை கொண்டு பேசாதே. கண்ணால் கண்டதற்கு மாறாகச் சொல்லாதே. கேட்போர்க்கு இன்பம் உண்டாகும்படி இனிமையாகப் பேசு.
- ஔவையார்
குற்றமற்றவரை, ஒன்றும் அறியாதவரை, நிராகரித்துக் கண்டிப்பது எவ்வளவு வெட்கக்கேடான காரியம்!
- சாக்ரட்டீஸ்
நம்புங்கள்! அறமே ஆற்றல், அந்த நல்ல நம்பிக்கையில் நாம் அறிந்த கடமையைச் செய்வோமாக!
- ஆபிரகாம் லிங்கன்
தமிழா! ஒருவேளைச் சோற்றை விட்டாலும் விடு; ஆனால் தினமும் தியானம் செய்வதை நிறுத்தாதே!
- மகாகவி பாரதியார்
எவ்வாறு சூரியனின் இயல்பு பிரகாசமோ, தண்ணீரின் இயல்பு குளுமையோ, அக்கினியின் இயல்பு உஷ்ணமோ அவ்வாறே சச்சிதானந்தத் தன்மையும் நித்திய நிர்மலத் தன்மையும் ஆத்மாவின் இயல்பாகும்.
- ஆத்மபோதம்
மெய்யடியார்களின் தொடர்பும் இறைவனைப்பற்றிய பேச்சும் ஆகிய இரண்டும் கிடைத்தற்கு அரியன; மனைவி மக்களும் செல்வச் செழிப்பும் பாவிகளுக்குக்கூடக் கிடைக்கின்றன.
- துளசிதாசர்
கருமத்தில் கண்ணாக இருப்பதே பிரார்த்தனைதான். துயரடைந்தவர்களுக்குத் தொண்டு செய்வதிலேயே பிரார்த்தனை முழுமை அடைகிறது.
- காந்தியடிகள்
போதனை, படிப்பு, தியானம் முதலிய எல்லாவற்றையும் விட, குருகிருபை மிகவும் அவசியம். அதனாலேயே சாட்சாத்காரம் சித்திக்கும். மற்றவை எல்லாம் ஒருவாறு உதவும், இரண்டாந்தரம், குருகிருபையே சாட்சாத்காரத்திற்கு உரிய நேரான முக்கிய வழியாகும்.
- ரமண மகரிஷி
ஆத்மஞானமின்றி இந்த உலகில் மனிதன் எதைச் செய்தாலும், அது ஒன்றுக்கும் உதவாத மணல்வெளியை உழுது பயிர் செய்வது போல, முடிவில் பயனற்றதாகும்.
- சூர்ய கீதை
ஒழுக்கம் கெட்டவர்களுக்கு எப்படிப்பட்ட சூழ்நிலை வந்தாலும் பழைய நல்ல பெயர் வருவதில்லை.
- எடிஸன்
கடவுள் மனிதனை அளவெடுக்கும் போது தலையின் சுற்றளவைப் பார்ப்பதில்லை. இதயத்தின் அளவைத்தான் பார்க்கிறார்.
- வால் கோல்டு
*****
இது முத்துக்கமலம் இணைய இதழின் படைப்பு.
இணையத்தில் ஒரு இலக்கியப் படைப்பு! இது தமிழ் ஆர்வலர்களின் இலக்கியத் துடிப்பு!! ISSN: 2454-1990
அச்சிட
விமர்சிக்க
விருப்பத் தளமாக்க
