தினமும் குளிக்கும் நீரில் சில பொருட்களைக் கலந்து குளிப்பதன் மூலம் கிரக தோஷங்கள் நீங்கும் என்று ஜோதிடக் குறிப்புகள் குறிப்பிடுகின்றன.

சூரிய தோஷம்

சிகப்பு மலர்களையோ அல்லது குங்குமப்பூவையோக் குளிக்கும் நீரில் சிறிதளவு போட்டு, பின்பு நான்கைந்து குவளைகள் அந்த நீரில் குளித்துவிட்டுப் பின் வழக்கம் போல சாதாரண நீரில் குளிக்கலாம். இதனால் சூரிய பகவானால் ஏற்படும் தோஷங்கள் விலகும்.

சந்திர தோஷம்

அழகுக்காகப் பலர் தயிரை முகத்தில் பூசிக்கொள்வது வழக்கம். சந்திரனால் ஏற்படும் தோஷத்தை போக்கவும் தயிரைத்தான் பயன்படுத்த வேண்டும். குளிப்பதற்கு முன்பு சிறிதளவு தயிர் எடுத்து அதை உடல் முழுக்கத் தடவி பின் குளித்து வந்தால் சந்திரனால் ஏற்படும் தோஷங்கள் விலகும்.

செவ்வாய் தோஷம்

செவ்வாய் தோஷம் இருப்பதால் திருமணம் தடைப்படுகிறது, திருமணத்திற்குப் பிறகும் பல பிரச்சனைகள் வருகின்றன என்று பலர் கவலைப்படுவதுண்டு. இதற்குச் சிறந்த குளியல் பரிகாரம் என்னவெனில், வில்வ கொட்டையைச் சிறிதளவு எடுத்துக் கொண்டு அதை நன்கு பொடி செய்து, குளிக்கும் நீரில் கலந்து அதில் ஒரு நான்கைந்து குவளைகள் குளித்துவிட்டுப் பின் வழக்கம் போல, சாதாரண நீரில் குளிக்கலாம். இதனால் செவ்வாய் தோஷம் விலகும்.

புதன் தோஷம்

புதன் தோஷம் நீங்க, கங்கை நீரோ அல்லது கடல் நீரோ தேவை. இரண்டும் கிடைக்காதபட்சம் கடல் நீருக்கு பதிலாக நிலத்தடி நீரில் சிறிது கல் உப்பு கரைத்துக் கொள்லலாம். உப்புத்தூள் உபயோகிக்கக்கூடாது. சிறிதளவு மஞ்சள் கடுகு எடுத்துக் கொண்டு அதில் தேன் கலந்து பின் அதைச் சிறிதளவு கடல் நீரிலோ அல்லது கங்கை நீரிலோக் கலந்து பின் அனைத்தையும் நாம் குளிக்கும் நீரில் கலக்க வேண்டும். பின் இந்த நீரில் குளிப்பதன் மூலம் புதனால் ஏற்படும் தோஷங்கள் விலகும்.

வியாழன் (குரு) தோஷம்

கருப்பு ஏலக்காய் சிறிதளவு எடுத்துக் கொண்டு, அதை நீரில் நன்கு கொதிக்க வைத்துப் பின் அதைக் குளிக்கும் நீரில் கலந்து குளித்து வருவதன் மூலம் வியாழனால் ஏற்படும் தோஷங்கள் விலகும்.


சுக்கிர தோஷம்

சுக்கிர தோஷம் நீங்க, பச்சை ஏலக்காயைச் சிறிதளவு எடுத்துக் கொண்டு, அதை நீரில் நான்கு கொதிக்க வைத்து, பின் அதை குளிக்கும் நீரில் கலந்து குளித்து வர வேண்டும்.

சனி தோஷம்

சனி தோஷம் நீங்க, கருப்பு எள் சிறிதளவு எடுத்துக் கொண்டு அதை நீரில் நன்கு கொதிக்க வைத்து, பின் அதை குளிக்கும் நீரில் கலந்து குளித்து வர வேண்டும்.

ராகு தோஷம்

ராகு தோஷம் நீங்க, நாட்டு மருந்துக் கடைகளில் கிடைக்கக் கூடிய மகிஷாக்ஷியை சிறிதளவு எடுத்துக் கொண்டு, அதை நீரில் நன்கு கொதிக்க வைத்து, பின் அதை குளிக்கும் நீரில் கலந்து குளித்துவர வேண்டும்.

கேது தோஷம்

கேது தோஷம் நீங்க, அருகம்புல்லைச் சிறிதளவு எடுத்துக் கொண்டு, அதை நீரில் நன்கு கொதிக்க வைத்து, பின் அதைக் குளிக்கும் நீரில் கலந்து குளித்து வர வேண்டும்.

இது முத்துக்கமலம் இணைய இதழின் படைப்பு.