ஜோதிடத்தில் முக்கியமான இடத்தில் பங்கு வகிப்பவர் சந்திரன். பலன்கள் யாவும் தினசரிக் கோளான சந்திரனின் நிலையை வைத்தேத் தீர்மானிக்கப் பெறுகின்றது. தாரா பலன்கள் உள்ளிட்ட யாவும் இந்தக் கோளின் கோட்சார நிலையை பிரதானமாகக் கொண்டு அமைகின்றன.

மாதுர்காரகன். (அம்மா) உடல் நிலை, உடல் அமைப்பு, புத்தி நிலையைத் தீர்மானிப்பவன். அது மட்டும் இல்லாமல், பொதுவாக ஒவ்வொரு கோள்களுக்குமேப் பல ஜோதிடப் பெயர்கள் காணப் பெறுகின்றன. பழைய தமிழ், வட மொழி இலக்கிய நுால்களில் இவற்றின் பெயர்கள் பதிவாகி உள்ளன. மிகுந்த நூலறிவு மிகவும் அவசியம்.

கோட்சார நிலையில் எவ்விதம் அனைத்துக் கிரகங்களின் நிலையையும் நாம் நட்சத்திர சாரங்களின் வழி கணக்கிட்டு அதன் பலனைக் காண்கின்றோமோ, அது போலவே இதனை முதலில் கணக்கினில் கொள்ள வேண்டும். ஏன் எனில் யாவும் சந்திரனின் நிலையையும் அனுசரித்தேப் பலன்கள் யாவும் ஒட்டு மொத்தமாகத் தருகின்றன.

இங்கும் திசை, புத்தி, அந்தரம், சூட்சுமம் உள்ளிட்ட யாவையும் பொறுத்துத்தான் அவற்றில் சஞ்சார நிலை கொண்டுதான் அவை யாவும் பலன் தந்து பயணிக்கும். சந்திரனின் நிலை மட்டும் நன்றாக இருந்தால் போதாது. சுபக்கிரகங்கள் நிலை, அசுபக் கிரகங்கள் நிலை இவை யாவற்றையும் மீண்டும் நட்பு, பகை, ஆட்சி, உச்சம், நீசம், பார்வை உள்ளிட்ட யாவற்றையும் கணக்கினில் கொண்டுதான் இங்கும் பலன் சொல்ல வேண்டும்.


விளையாடுவதற்கு இது விளையாட்டுக் கலை அல்ல. பயபக்தியும், இறைநம்பிக்கையும் மிக அவசியம். கடவுளின் மேல் கொண்ட நம்பிக்கையினைச் சாதகம் பார்ப்பவன் சோதிடரின் மேல் வைக்கின்றான். கடவுளை நம்புவதைப் போல் எண்ணுகின்றான். அவர்களது வலி நிவாரணியாக எண்ணுகின்றான். உரிய சோதிடனை அணுகும் போதுதான் அவர்களுக்கும் கர்மவினை, சரியான சோதிடப்பலன், பரிகாரம் சாந்தி உள்ளிட்ட யாவும் கிடைக்கும்.

மனதின்காரகன், உடல் அமைப்பு, அங்க அழகினைத் தீர்மானிப்பவன் சந்திரன். எந்த வீட்டில் சாதகத்தில் உள்ளதோ அந்த வீடு இலக்னத்திற்கு எது என்றும் பார்க்க வேண்டும். 6, 8, 12 நன்மை தராது. அதுவே ஆட்சி, நீச பங்கம், குரு சகிதம், சுபர் சேர்க்கை, பார்வை பெறின் நன்மை.

நாம் பல நிலைகளிலும் சோதிடத்தின் அனைத்து வீடுகளையும் அலசி ஆராய்தல் நன்மை தரும். அவ்வளவு எளிதில் பலன்களை காண இயலாது. 1 - 6 வீடுகள் கண்ணிற்குத் தெரியும். மேல் பாகம். 7 - 12 கண்டறிய முடியாத சிரமமான மறைத்து இரகசியமாய் வைக்கப் பெற்ற வீட்டின் பலன்கள். அதை அறிந்து உணர்ந்து சொல்பவர் சிலரே.

சந்திரன் மட்டும் நல்ல நிலையில் இருந்தால் பலன் கிடைக்கும் என எண்ணி விடவும் முடியாது. மற்றவை யாவும் அதற்கு சகிதமாய்ச் செல்ல வேண்டும்.

நட்சத்திரங்களிலும் கோள்கள் பரிவர்த்தனையைக் காணலாம். எப்படி வீடுகளில் கிரகங்கள் மாறி நின்று பரிவர்த்தனை கொள்கின்றதோ, அதைப் போல நட்சத்திரங்களில் கிரகப் பயணங்களில் பரிவர்த்தனைப் பலனைக் கண் கூடாகக் காணலாம்.

சில நேரங்களில் எல்லாம் சிறப்பாக சரியாக நற்பலன்கள் தரும் அமைப்பு இருந்தும், கிரக சோதனையைத் தந்து விட்டு நம்மை ஏமாற்றி விளையாடி விட்டு பின்னர் உரிய காலம் தளர்த்தி மாற்றித் தரும். இதையும் நாம் யோசித்துப் பார்க்க வேண்டிய நிலையில் உள்ளோம்.

எனவேதான், எந்தக் கிரகத்தையும் நாம் நன்மை செய்வன என்று எண்ணியோ அல்லது தீமை செய்வன என எண்ணி ஒதுக்கி விடவோ முடியாது. அங்கும் பல விளையாட்டுச் சோதனைகள் உண்டு. தீயக்கிரகங்கள் மிகுந்த நன்மையைச் சிலருக்குச் செய்வதையும், சுபகிரகங்கள் சிலருக்குத் தீமை செய்வதையும் எண்ணும் போதும், அவரவர் உணரும் போதும் புரியும். சிலர் புலம்புவர் சுக்கிரன் திசை எனக்கு எதுவுமே கிடைக்கவில்லை. சனி திசை எல்லாம் துன்பமாக வரும் என்று பலரும் பொதுவாக எதையாவது எல்லாம் தெரிந்ததைப் போல் உளறிக் கொண்டிருப்பர்.

மீண்டும் சொல்கின்றேன். தேர்ந்த சோதிடன் நிதானித்தேப் பலன் கூறுவான். அதையும் பலர் மறுப்பர். எப்படி எனில், அந்த சோதிடர் எனக்கு நல்லது நடக்கும் என்றார் என்பர். நாம் ஒரு விஷயத்தை நினைவினில் கொள்ள வேண்டும். சோதிடரைக் குறை கூறுவதற்கில்லை.

அவரும் ஒரு சாமான்ய மனிதரே. சோதிட விதிகள் அறிந்து நல்வழி காட்டுவர். எந்த ஒரு கலையையும் யாரும் தனது சுய நலத்திற்காக தீவினைக்காகப் பயன்படுத்துவர் எனில், அந்தக் கலை அவர்களை விட்டு விலகி விடும். யாவும் சத்தியத்திற்குக் கட்டுப்பட்டது.


நமது விருப்பத்திற்காகப் பலனை வேண்டியவர் என்று கூட்டியோ, குறைத்தோச் சொல்லக் கூடாது. உள்ளது உள்ளபடியே சாதகன் மனநிலை ஏற்கும் பக்குவம் உள்ள திசை செல்கின்றதா என்பதை அறிந்து மெதுவாகப் பலன்களை உரிய வழி முறைப் பரிகாரத்துடன் முறையாய்ச் செய்யச் சொல்ல வேண்டும்.

அதுவும் கூட, அந்த விதி அமைப்பு உடைய உரியவர்களுக்குத்தான் பரிகாரம் சொல்ல முடியும். அதுவும் சிலருக்குத்தான் பரிகாரம் செய்யும் பாக்கியமும் கிடைக்கும்.

சிலர் சோதிடருன் வாதிடுவர். ஏன் சண்டை செய்வதும் கூட உண்டு. எனவே அந்தச் சோதிடர் அந்த இலக்னம், இராசி சொன்னார். நீங்கள் தவறாக சொல்கின்றீர் என்பர். இங்கு சாதகர் பார்ப்பவர்களையும் நாம் குறை சொல்வதற்கு இல்லை.

மறைத்து வைக்கப் பெற்ற இந்த தெய்வீகக் கலையில், தவறில்லாமல், குறையில்லாமல் கணித்து, அதன் வழி சரியான பலன் சொல்பவர் சாதகர் பார்ப்பவருக்குக் கிடைப்பதே அவர்கள் செய்த பூர்வ புண்ணியம். இதை எப்படி உணர முடியும்?

காலதாமதங்கள் பல ஆகி ஒரு சிறந்த சோதிடரை இறை ஆசியுடன் நாம் சந்திக்கின்ற போது, நமக்கு உள்ள குறைகள் யாவும் படிப்படியாய் தீரும். அப்போதுதான் அதனை உணர முடியும். அந்தச் சோதிடர் மட்டும்தான் உண்மையைச் சொன்னார் என அவர் தம் பலன்களை அனுபவிக்கும் போதுதான் அதை உணர்வார்.

மனித மனம் ஆசாபாசங்களுக்குக் கட்டுப்பட்டது. ஒருவருக்கு லாட்டரியில் பணம் விழுகின்றது என்றால் மகிழ்வுடன் அந்தச் சொல்லை அவன் ஏற்பான். கிடைத்தால் அந்த மகிழ்ச்சிக்கு அளவே இல்லை. ஆனால், விபத்தில் பண விரயம், பொருள் விரயம், உடல் அழிவு என்பதை எவரது மனமும் எப்படி நாசூக்காகச் சொன்னாலும், அவர்கள் வாய் வைத்துச் சொன்னமையால் என்றோ, உடனே கரித்துக் கொட்டுபவர் பலர் உள்ளதை நாம் காணலாம்.

சாதகர் பார்ப்பவருக்கு ஏற்கும் மனம் பொறுமை மிக மிக அவசியம். சோதிடர் கடை ஏதும் வைத்திருக்கவில்லை. எந்த நற்பலனையோ, தீயபலனையோ விலைக்கோ, இலவசமாகவோ கொடுப்பதற்கு, அவர் கணிப்பில் உள்ளதைச் சொல்லுவார் அவ்வளவே. அதை விடுத்து அவரைச் சண்டைக்கு வலிய இழுத்து முச்சந்தியில் பேசுவதற்கு அவர் பலியாடும் அல்ல.

மேலும், அவருக்குப் பொதுவாகக் கெடுதல் தீங்கு நினைக்கின்ற போதும், கோள்களின் ஆசியிலும், பலரது ஆசியிலும், அதே சமயத்தினில் கிரகங்களை உணர்ந்து பலன், பரிகாரம் அவர் சொல்வதால் சில கிரக சோதனைகளுக்கும் மற்றவர்களால் சோதிடர்கள் ஆட்படுவர்.

எனவேதான், உரிய தட்சணையுடன் சோதிடம் பார்த்தல் பார்ப்பவருக்கும், பலன் பெறுபவருக்கும் மிகுந்த நன்மையைத் தரும். சோதிட வருமானத்தில் நான்கில் ஒரு பாகம் ஆலய கைங்கர்யங்கள், இரண்டாம் பாகம் அனாதை இல்லங்கள் உள்ளிட்டவை, 3, 4 ஆம் பாகம் அவருக்கு உரியன.


பலர் சாதகர் பார்ப்பவர் சோதிடருக்கு உரிய சன்மானம் தராமல் பார்த்துச் செல்வர். எப்படிப் பலிதம் கிடைக்கும்? இதை ஏன் இங்கு சொல்கின்றேன் என்றால் அக்காலக் கட்டத்தில் சோதிடருக்கு உரிய சலுகைகள், சன்மானங்கள், வேண்டிய உணவு, காய்கறி, தானிய வகைகள் யாவற்றையும் இலவசமாக கொடையாக தானமாகத் தந்தனர். ஆனால், இப்போதெல்லாம் அப்படி யாரும் செய்வதில்லை. இதைப் பற்றி இன்னும் எவ்வளவோ பேசலாம். தேவையில்லை.

ஒருவரது சாதகத்தில் வளர்பிறைச் சந்திரன் எனில் மிகுந்த நன்மையையும், தேய்பிறைச் சந்திரன் எனில் மிகுந்த தீமையையும் செய்து விடுகின்றது. எனவே நமது சாதகத்தில் சந்திரன் நிலையினை மிக அவசியம் கவனித்துக் கொள்ள வேண்டும்.

எவ்வளவு முன்னேற்றமாய்ச் சென்றாலும், தேய்பிறைச் சந்திரன் எனில் பரமபதப் பாம்பு விளையாட்டாய் ஆகி கீழேத் தள்ளி விடும். இதுவே வளர்சந்திரன் எனில் அதிகத் துன்பம் தராமல் மேல் நோக்கி மேலும் மேலும் வளர்த்துச் செல்லும்.

எது எப்படியாக இருந்தாலும் நேர்மை, சத்தியத்தின் வழி நிற்பவர் மிகுந்த பல சோதனைகள் வரினும் நன்மை பெறுவர். கிரகங்கள் வழி விட்டு வாழ்த்தி நன்மை செய்யும். அதைப் பொறுத்துத்தான் பலன்கள் சிறப்பாய் அமையும். முதலில் சுபர்கள் நிலை எவ்விதம் அமைந்துள்ளது? எனக் காண வேண்டும். தேய்பிறைச் சந்திரன் எனில், தேய்பிறைச் சதுர்த்தி விநாயகர் வழிபாடு, அஷ்டமி பைரவர் வழிபாடு, சித்திரகுப்தர் வழிபாடு உடனடியாகச் சிறந்த நல் தீர்வுகளைச் செய்யும் நன்மை பெறுவீர்.

(கற்பித்தல் தொடரும்...)

*****

இது முத்துக்கமலம் இணைய இதழின் படைப்பு.