அஞ்சல் தலைகளையும், அதனுடன் தொடர்புடைய வேறு பொருட்களையும் சேகரித்தலை ‘அஞ்சல்தலை சேகரிப்பு’ என்கின்றனர். உலகின் மிகவும் பிரபலமான பொழுது போக்குகளில் ஒன்றாக, அஞ்சல்தலை சேகரிப்பு இருந்து வருகிறது. இப்பொழுது போக்கு உலக அளவில் பரவி இருந்தாலும், இது ஒரு வருவாயில்லாத முயற்சியாகவே இருந்து வருகிறது. இருப்பினும், சில சிறிய நாடுகள், நுணுக்கமாக வடிவமைக்கப்பட்ட, சிறு தொகையிலான அஞ்சல் தலைகளை, அஞ்சல் தலை சேகரிப்பாளர்களுக்காக வெளியிட்டு வருமானம் பெறுகின்றன.

அஞ்சல்தலை சேகரிப்பு என்பது எப்படி தொடங்கியது?

பெரிய பிரித்தானிய (இங்கிலாந்து, ஸ்காட்லாந்து, வேல்ஸ் நாடுகளுடன் சில தீவுப்பகுதிகள் இணைந்த பகுதி) அரசால் 1840 ஆம் ஆண்டில் பென்னி பிளாக் (Penny Black) என்று அழைக்கப்படும் முதலாவது அஞ்சல்தலை வெளியிடப்பட்டது. இளம் அரசி விக்டோரியாவின் படத்தைக் கொண்டிருந்த அந்த அஞ்சல்தலை துளைகளில்லாமல் வெளியிடப்பட்டதால், அதனைப் பயன்படுத்தும் போது, கத்தரிக்கோல் கொண்டு வெட்டிப் பிரிக்க வேண்டியிருந்தது. முதல் அஞ்சல்தலையான 'பென்னி பிளாக்' அஞ்சல் தலைகள் பயன்படுத்தப்படாத நிலையில் கிடைத்தற்கரியதாக இருக்கிறது. அதே வேளை, பயன்படுத்தப்பட்ட பென்னிபிளாக் அஞ்சல்தலைகள் தற்போதும் கிடைக்கின்றன. இவற்றை அவற்றின் நிலையைப் பொறுத்துக் கூடுதல் விலை கொடுத்துப் பெறமுடிகிறது.

அஞ்சல்தலைகள் குறிப்பிடத்தக்க அளவில் புழக்கத்தில் வந்த பின்பு, 1860 ஆம் ஆண்டுக்குப் பிறகு சிறுவர்களும், இளம் வயதினரும் பொழுதுபோக்காக அஞ்சல்தலைகளைச் சேகரிக்கத் தொடங்கினர். அதனைக் கண்ட பெரியவர்கள், சிறுவர்கள் செய்யும் செயலாகக் கருதி அதனை ஒதுக்கினர். ஆனால், 1890 ஆம் ஆண்டுக்குப் பிறகு, பெரியவர்களும் அஞ்சல்தலை சேகரிப்பில் ஈடுபடத் தொடங்கினர். அஞ்சல் தலைகளைச் சேகரித்தவர்கள், அஞ்சல்தலையின் உற்பத்தி, அஞ்சல் தலையில் அச்சுப் பிழைகள், அஞ்சல்தலையின் பெருமைகள் உள்ளிட்ட பல தகவல்களை முறையாக ஆராய்ந்து வெளியிட்டார்கள்.


அரிய அஞ்சல் தலைகளுக்குக் கிடைத்த பிரபலம் பலருக்குத் தூண்டுதலாக அமைந்து, 1920 ஆம் ஆண்டுகளில், அஞ்சல்தலை சேகரிப்பாளர்களது எண்ணிக்கை அதிகரிக்கத் தொடங்கியது. முந்தைய அஞ்சல்தலைகள் நல்ல நிலையில் கிடைக்காததால், அவற்றின் மதிப்பும் கூடியது. பொதுவாக இரண்டு, மூன்று, நான்கு என்று சேர்ந்து இருந்த பழைய அஞ்சல்தலைகள் கிடைத்தற்கு அரிதாயிருந்தன.

1920 ஆம் ஆண்டுகளில் வெளியிடப்பட்ட அமெரிக்க அஞ்சல்தலைகளின் பெறுமதி கிடுகிடுவென உயர்ந்ததால், 1930 ஆம் ஆண்டுகளில், பல அமெரிக்கச் சேகரிப்பாளர்கள், சில ஆண்டுகளின் பின்னர் நல்ல விலைக்கு விற்கும் எண்ணத்துடன், புத்தம் புதிய அஞ்சல்தலைகளை வாங்கிக் குவித்தனர். இவ்வெண்ணம் ஈடேறவில்லை. 60 ஆண்டுகளுக்கு மேலாகியும், இப்பொழுது கூட, புத்தம்புதிய நிலையில் 1930 ஆம் ஆண்டுகளின் அமெரிக்க வெளியீடுகளை, கிட்டத்தட்ட அவற்றின் குறித்த விலையிலேயே வாங்க முடியும். பல சேகரிப்பாளர்களும், வணிகர்களும் இன்னும் 1930 ஆம் ஆண்டுகளின் அஞ்சல்தலைகளைக் கடிதம் அனுப்பப் பயன்படுத்துகிறார்கள் என்று கூறப்படுகிறது.

இன்று பல்வேறு நாடுகளும் வெளியிடும் அஞ்சல்தலைகள் கணக்கிட முடியாதவை. 1840 ஆம் ஆண்டுக்குப் பின்னர் கடந்த ஒன்றரை நூற்றாண்டுகளுக்கு மேலாக அனைத்து நாடுகளும் வெளியிட்ட அஞ்சல்தலைகளோடு ஒப்பிடும்போது, ஒரு மனிதன் தன் வாழ்நாளில் சேகரிக்ககூடியவை மிகச் சிலவே. ஒரு வரையறையின்றி, கிடைக்கக் கூடிய எல்லாத் அஞ்சல்தலைகளையும் சேகரிக்க முயலும் ஒருவரின் சேகரிப்பில் எவ்வித ஆழமும் இருக்க முடியாது. இதனால் தற்காலத்தில் சேகரிப்பாளர்கள், தங்கள் சேகரிப்பு முயற்சிகளை ஒரு குறிப்பிட்ட வரையறைக்குள் அடக்கிக் கொள்கிறார்கள். உதாரணமாக,

* ஒற்றை நாட்டுச் சேகரிப்பு - இது ஒரு நாடு வெளியிட்ட அஞ்சல் தலைகளை மட்டும் சேகரிப்பதாகும்.

* தலைப்புசார் சேகரிப்பு - இது ஒரு குறிப்பிட்ட தலைப்பு தொடர்பாகப் பல்வேறு நாடுகளும் வெளியிட்ட அஞ்சல்தலைகளைச் சேகரிப்பதாகும். (பறவைகள், விலங்குகள், புகைவண்டிகள், விண்வெளிப் பயணம் என்பன அஞ்சல்தலை சேகரிப்பில் பரவலமான சில தலைப்புகளாக இருக்கின்றன)


இப்பொழுதுபோக்கு இலாபமற்றதாக இருந்தும், பல புதிய சேகரிப்பாளர்கள் அஞ்சல்தலைகளில் முதலீடு செய்கிறார்கள். அஞ்சல்தலையியல் முதலீடு உயர்மட்டச் சேகரிப்பாளரிடையே பரவலாக இருந்து வருகிறது. அரிய அஞ்சல்தலைகள், தொட்டுணரக்கூடிய முதலீடுகளில், இலகுவாகக் கொண்டு செல்லக் கூடியவை என்பதுடன் சேமித்து வைப்பதும் இலகுவாகும். ஓவியங்கள், சேகரிப்புப் பொருள் முதலீடுகள், பெறுமதியான உலோகங்கள் என்பவற்றுக்குக் கவர்ச்சிகரமான மாற்றீடாக அஞ்சல்தலை சேகரிப்பு இன்றும் இருந்து வருகிறது.

எனினும், இந்தப் பொழுதுபோக்கில் ஈடுபடுவதால் கிடைக்கும் மன நிறைவுக்கும், பொது அறிவு வளர்ச்சிக்குமாகவே, இதில் ஈடுபடும்படி புதியவர்களைத் தூண்டுகிறார்கள். மிகச் சிறிய வண்ணப்படங்களான அஞ்சல்தலைகள் பல பயனுள்ள தகவல்களைத் தம்முள் புதைத்து வைத்துள்ளன. இவை இளம் சேகரிப்பாளர்களது அறிவு வளர்ச்சிக்கும் உதவுகின்றன.

அஞ்சல்தலை சேகரிப்பில் மதிப்புமிக்க ஒரு சிறுதகவலையும் தெரிந்து கொள்ளுங்கள்...

1918 ஆம் ஆண்டில் ஐக்கிய அமெரிக்காவில் 24 செண்ட்ஸ் மதிப்பில் வெளியிடப்பட்ட ’தலைகீழ் ஜென்னி’ (Inverted Jenny) எனும் தபால்தலை வடிவமைப்பில், அதன் நடுவில் உள்ள ஆகாய விமானம், தவறுதலாகத் தலைகீழாக அச்சிடப்பட்டுவிட்டது. இந்தத் தபால்தலை உலகம் முழுவதிலும் தற்போது 100 மட்டுமே இருப்பதாகக் கணக்கிடப்பட்டுள்ளது. இதனால் இது உலகின் மிகவும் மதிப்பு வாய்ந்த தபால்தலைகளுள் ஒன்றாக இருக்கின்றது. 2003 ஆம் ஆண்டின் மதிப்புப்படி இதன் மதிப்பு 150,000 அமெரிக்க டாலர்களாகும். தற்போது மேலும் அதிகரித்திருக்கும்.

தபால்தலையில் ஏற்பட்ட பிழை, அதன் விலையை (மதிப்பை) அதிகரித்து விட்டது என்பதும் ஆச்சரியமாகத்தான் இருக்கிறது.

*****

இது முத்துக்கமலம் இணைய இதழின் படைப்பு.