கட்டுரை

பொதுக்கட்டுரைகள்

வாழ்க்கைக்கான ஒரு அடிப்படை வளமாக நீர் இருந்து வருகிறது. மக்கள்தொகை வளர்ச்சி, தொழில் மயமாக்கல் மற்றும் காலநிலை மாற்றம் ஆகியவை நீர் ஆதாரங்களின் மீது அதிகமான அழுத்தத்தை ஏற்படுத்திக் கொண்டிருக்கின்றன. இந்நிலையில் ‘மறை நீர்’ (Virtual Water) எனும் கருத்து உலகளாவிய நீர் பயன்பாட்டைப் புரிந்து கொள்வதற்கும், நிர்வகிப்பதற்கும் ஒரு முக்கியமான கருவியாக உருவெடுத்துள்ளது.

ஒரு பொருளுக்குள் மறைந்திருக்கும் கண்ணுக்குத் தெரியாத நீர், ‘மறை நீர்’ (Virtual water) எனப்படுகிறது. இதனை, ‘மெய்நிகர் நீர்’ என்றும் சொல்லலாம். வேளாண்மை அல்லது தொழில்துறையில் உற்பத்திச் செயல்பாட்டில் பயன்படுத்தப்படும் நீரை, மறை நீர் என்கின்றனர். உதாரணமாக, தானியங்களில் 1 கிலோ உற்பத்தி செய்வதற்கு 1000 முதல் 2000 கிலோ வரை நீர் தேவைப்படுகிறது. இந்த நீரானது, 1 முதல் 2 கியூபிக் மீட்டருக்குச் சமமானது. தானிய உற்பத்திக்குப் பயன்பட்ட நீர் அந்தத் தானியத்தில் தற்போது இல்லை. இருப்பினும், அந்தத் தானியத்துக்குச் செலவிடப்பட்ட நீர் அதனுள்ளே மறைந்திருக்கிறது என்பதை அடிப்படையாகக் கொண்டு, அந்நீரை மறை நீர் என்கின்றனர்.

கால்நடைப் பொருட்கள் உற்பத்தியில், 1 கிலோ பாலாடைக்கட்டி உற்பத்தி செய்ய, 5000 முதல் 5500 கிலோ வரையிலான நீரும், 1 கிலோ மாட்டிறைச்சி உற்பத்திக்குச் சராசரியாக 16,000 கிலோ நீரும் தேவைப்படுகிறது. 32 மெகாபைட் கணினிச் சில்லு உற்பத்தி செய்யக் கிராமுக்கு 32 கிலோ நீர் தேவைப்படுகிறது. இதே போன்று, உற்பத்தி செய்யப்படும் ஒவ்வொரு பொருளுக்கும் அல்லது சேவைக்கும் பயன்படுத்தப்படும் நீரை மறை நீர் என்று குறிப்பிடுகின்றனர். மறை நீரின் அளவானது கியூபிக் மீட்டர் எனும் அளவில் கணக்கிடப்படுகிறது.

ஒரு இடத்திலிருந்து மற்றொரு இடத்திற்கு வணிகம் செய்யப்படும் உணவு அல்லது பிற பொருட்களில் மறைந்திருக்கும் நீரும் சேர்ந்தே வணிகமாகிறது. இதனை, மறை நீர் வணிகம் என்கின்றனர். ஒரு நாடு நீர் அதிகம் உள்ள பொருளை மற்றொரு நாட்டிற்கு ஏற்றுமதி செய்தால், அந்நாடு மறை நீர் வடிவில் நீரை ஏற்றுமதி செய்கிறது என்றும், இறக்குமதி செய்தால், நீரை இறக்குமதி செய்கிறது என்றும் எடுத்துக் கொள்ளலாம். ஏற்றுமதி செய்யும் நாடு, மறை நீர் வழியில், தனது நாட்டின் நீரைச் செலவழித்து விடுகிறது. இறக்குமதி செய்யும் நாடு, தனது நாட்டில் நீரைச் சேமித்துக் கொள்கிறது என்று பொருள் கொள்ளலாம்.

இந்த மறை நீர் கருத்தானது, 1993 ஆம் ஆண்டில் பிரிட்டிஷ் புவியியலாளரான ஜான் அந்தோனி ஆலன் என்பவரால் உருவாக்கப்பட்டது. இந்தக் கருத்திற்காக, 2008 ஆம் ஆண்டில் அவருக்கு ‘ஸ்டாக்ஹோம் நீர் பரிசு’வழங்கப் பெற்றது என்பது இங்கு குறிப்பிடத்தக்கது.


மறை நீரை மூன்று வகைகளாகப் பிரிக்கலாம்:

1. பச்சை நீர்: மழை நீர் மண்ணில் சேமிக்கப்பட்டு தாவரங்களால் பயன்படுத்தப்படுகிறது.

2. நீல நீர்: பாசனத்தில் பயன்படுத்தப்படும் ஆறுகள், ஏரிகள் மற்றும் நீர்நிலைகளில் இருந்து வரும் நன்னீர்.

3. சாம்பல் நீர்: உற்பத்திச் செயல்முறையின் விளைவாக ஏற்படும் மாசுக்களைக் களைவதற்குத் தேவையான நீர்.

மறை நீர் என்ற கருத்து உலகளாவிய நீர் வளங்களில் ஒன்றோடொன்று இணைந்திருப்பதை எடுத்துக் காட்டுகிறது, ஒரு மண்டலத்தின் நீர் பற்றாக்குறையை மற்றொரு பகுதியில் உள்ள நுகர்வு முறைகளால் குறைக்கலாம் அல்லது அதிகரிக்கலாம் என்பதை வெளிப்படுத்துகிறது.

உலக நீர் பயன்பாட்டில் 70% எனும் அளவில் வேளாண்மைப் பணிகளுக்கே அதிகமாகப் பயன்படுத்தப்படுகிறது. மறை நீர் எனும் கருத்து வேளாண்மைக்கு மிகவும் முக்கியமானதாக இருக்கிறது. வேளாண்மைத் தொழிலில் பயிர்கள் மற்றும் கால்நடைகளுக்குக் குறிப்பிடத்தக்க அளவிலான நீர் தேவை இருக்கிறது. இந்த உற்பத்தி, உணவுப் பொருட்களாக மாற்றம் செய்யப் பெற்று ஏற்றுமதி செய்யப்படுகின்றன.

உதாரணமாக, கால்நடை வளர்ச்சியின் போது, அதற்குத் தேவையான தீவனம், குடிநீர் போன்றவைகளுக்கும், அதன் இறப்பிற்குப் பின்பு, அதன் இறைச்சியைப் பதப்படுத்தும் பணிகளுக்கும் சேர்த்துக் கணக்கிட்டால், 1 கிலோ கிராம் மாட்டிறைச்சி உற்பத்திக்கு சுமார் 15,000 லிட்டர் நீர் தேவைப்படுகிறது. இதே போன்று, 1 கிலோ கிராம் அரிசியை உற்பத்தி செய்ய சுமார் 2,500 லிட்டர் நீர் தேவைப்படுகிறது. இந்தத் தயாரிப்புகள் பன்னாட்டு அளவில் வணிகம் செய்யப்படும் போது, ​​​​அவற்றில் உட்பொதிக்கப்பட்ட நீரும் சேர்ந்து வணிகம் செய்யப்படுகிறது. இது நாட்டின் எல்லைகளைத் தாண்டி மறை நீரின் ஓட்டத்தை உருவாக்குகிறது.

இந்த மறை நீர் வணிகம், அதிகமான நீர் ஆதாரங்கள் மற்றும் நீர் பற்றாக்குறையை எதிர்கொள்ளும் பகுதிகளுக்கு இடையே நீர் இருப்பைச் சமன் செய்ய உதவுகிறது. இருப்பினும், ஏற்றுமதி செய்யும் நாடுகளில், குறிப்பாக, நீர் ஆதாரங்கள் ஏற்கனவே அழுத்தத்தில் உள்ள நாட்டின் மற்ற பகுதிகளில் நீர் பயன்பாட்டின் நிலைத்தன்மை பற்றிய கவலைகளை எழுப்புகிறது.

பன்னாட்டு வணிகத்தில் மறை நீர் வணிகம் என்பது குறிப்பிடத்தக்கதாக அமைந்திருக்கிறது. உணவு, ஆடை உற்பத்தி மற்றும் பிற பொருட்களின் வடிவங்களில் பெரிய அளவிலான நீர் பரிமாற்றம் செய்யப்படுகிறது. நீர் வளம் நிறைந்த சுற்றுப்புறங்களைக் கொண்ட நாடுகள் பெரும்பாலும் நீர் மிகுந்த பொருட்களை ஏற்றுமதி செய்பவர்களாக மாறுகின்றன. அதே வேளையில், நீர் பற்றாக்குறை உள்ள நாடுகள் தங்கள் குறைவான நீர் ஆதாரங்களை, மேலும் குறைக்காமல் தங்கள் தேவைகளை நிறைவு செய்து கொள்வதற்காக இந்தப் பொருட்களை இறக்குமதி செய்து கொள்கின்றன.

உதாரணமாக, அமெரிக்கா, பிரேசில் மற்றும் கனடா போன்ற நாடுகள் தங்கள் விவசாயப் பொருட்களின் மூலம் மறை நீரின் முக்கிய ஏற்றுமதியாளர்களாக இருக்கின்றன. அதே வேளையில், மத்தியக் கிழக்கு மற்றும் வட ஆப்பிரிக்கப் பகுதியில் இருக்கும் கடுமையான நீர் பற்றாக்குறையை எதிர்கொள்ளும் நாடுகள், மறை நீரின் முக்கிய இறக்குமதியாளர்களாக இருக்கின்றன.

உலகளாவிய மறை நீர் வணிகம் பல தாக்கங்களைக் கொண்டுள்ளது:

• நீர்வள மேலாண்மை: மறை நீரை இறக்குமதி செய்வதன் மூலம், நீர் பற்றாக்குறை உள்ள நாடுகள் உள்நாட்டு மற்றும் தொழில்துறை நுகர்வு போன்ற பிற பயன்பாடுகளுக்காக, தங்கள் வரையறுக்கப்பட்ட நீர் ஆதாரங்களைப் பாதுகாத்துக் கொள்ள முடியும்.

• பொருளாதாரக் கருத்தாய்வுகள்: மறை நீரின் வணிகம், வணிகக் கொள்கைகள், மானியங்கள் மற்றும் பன்னாட்டுச் சந்தைத் தேவைகள் போன்ற பொருளாதாரக் காரணிகளுடன் நெருக்கமாக இணைக்கப்பட்டுள்ளது.

• சுற்றுச்சூழல் தாக்கம்: மறை நீரின் ஏற்றுமதி, ஏற்றுமதி செய்யும் நாடுகளில் நீர் வளங்களை அதிகமாகச் சுரண்டுவதற்கு வழி வகுப்பதுடன், சுற்றுச்சூழல் சீர்கேடுகளுக்கும் உட்படுகிறது.

நீர் பற்றாக்குறையுடைய பகுதிகளில் மறை நீர் வணிகமானது குறிப்பிடத்தக்க அளவில் பாதிப்பை ஏற்படுத்துகிறது. நீர் தேவை அதிகமுடையப் பொருட்களை இறக்குமதி செய்வதன் மூலம், இப்பகுதியில் உள்நாட்டு நீர் ஆதாரங்களின் அழுத்தத்தைக் குறைக்கலாம். இருப்பினும், இது அத்தியாவசியப் பொருட்களுக்காக, வெளிநாட்டினைச் சார்ந்து இருக்க வேண்டிய நிலையினை உருவாக்குகிறது. மேலும், இது வணிக இடையூறுகள் அல்லது விலை ஏற்ற இறக்கங்களின் போது பெருமளவு பாதிப்புக்கு வழி வகுக்கும்.

எடுத்துக்காட்டாக, நடு கிழக்கு மற்றும் வட ஆப்பிரிக்கப் (Middle East and North Africa - MENA) பகுதிகளிலுள்ள பல நாடுகள் அவற்றின் வறண்ட காலநிலை மற்றும் குறைந்த நீர் இருப்பைக் கருத்தில் கொண்டு உணவுப் பொருட்கள் மூலம் மறை நீரை இறக்குமதி செய்வதைப் பெரிதும் நம்பியிருக்கின்றன. இறக்குமதி செய்யப்பட்ட மறை நீர், உள்ளூர் நீர் பயன்பாட்டைக் குறைப்பதில் நன்மை தரும். ஆனால், உணவுப் பாதுகாப்பு மற்றும் பொருளாதார உறுதிநிலை போன்றவைகளில் கவலைகளைத் தருகின்றன.

இதே போன்று, மறை நீரை ஏற்றுமதி செய்யும் நாடுகள், குறிப்பாக, நீர் பற்றாக்குறைப் பிரச்சனைகள் உள்ள நாடுகள், தங்கள் வேளாண் பொருட்கள் ஏற்றுமதியை நிலை நிறுத்துவதில் சவால்களை எதிர்கொள்ள வேண்டியிருக்கும். ஏற்றுமதிப் பொருட்களை உற்பத்தி செய்ய, நீர் ஆதாரங்களை அதிகமாகப் பயன்படுத்துவதால், நீர் நிலைகள் குறைந்து, ஆற்றின் ஓட்டம் குறைந்து, சுற்றுச்சூழலுக்குப் பெரும் பாதிப்பு ஏற்படலாம்.

மறை நீர் உணவுப் பாதுகாப்புடன் நெருக்கமாக இணைக்கப்பட்டுள்ளது, ஏனெனில், நீரின் இருப்பு, உணவு உற்பத்தியை நேரடியாகப் பாதிக்கிறது. தங்கள் சொந்த உணவை உற்பத்தி செய்யப் போதுமான நீர் ஆதாரங்கள் இல்லாத நாடுகள் தங்கள் உணவுப் பாதுகாப்பை உறுதிப்படுத்த மறை நீரை இறக்குமதி செய்வதையேப் பெரிதும் நம்பியுள்ளன.

உதாரணமாக, மத்தியக் கிழக்கு மற்றும் வட ஆப்பிரிக்காவில் உள்ள நாடுகள் அதிக அளவு தானியங்களை இறக்குமதி செய்கின்றன, அவை, நீர் மிகுந்த பயிர்களாகும். இந்த இறக்குமதியின் மூலம் அவர்களிடமுள்ள குறைந்த நீர் ஆதாரங்களை மற்ற அத்தியாவசியத் தேவைகளுக்காகச் சேமித்துக் கொள்ள முடியும். இருப்பினும், இது அவர்களின் உணவுப் பாதுகாப்பை உலகளாவிய வணிக இயக்கவியலுடன் இணைக்கிறது. இதனால் பகிர்வுச் சங்கிலித் தடைகள், வணிகக் கட்டுப்பாடுகள் அல்லது விலை ஏற்ற இறக்கம் போன்றவைகளால் பாதிக்கப்படலாம்.

மாறாக, அதிக அளவு மறை நீரை ஏற்றுமதி செய்யும் நீர் வளம் நிறைந்த நாடுகள், அவற்றின் நீர் ஆதாரங்களை முறையாக நிர்வகிக்கவில்லை என்றால், நீண்ட கால நிலைத்தன்மைச் சவால்களை எதிர்கொள்ள நேரிடும். வேளாண்மை ஏற்றுமதிக்காகத் நீரை அதிகமாகச் சுரண்டுவது, நீர் பற்றாக்குறைக்கு வழி வகுக்கும். இந்த நாடுகளின் எதிர்கால உணவுப் பாதுகாப்பை அச்சுறுத்தும்.

உலகளாவிய நீர் மேலாண்மை பற்றிய விவாதங்களில் மறை நீர் என்ற கருத்து பரவலாக ஏற்றுக் கொள்ளப்பட்டாலும், அதற்கு எதிரான மதிப்பீடுகளும் கருத்துகளும் இருக்கத்தான் செய்கின்றன.

அ. நீர் அடிச்சுவடுகளின் சிக்கலான தன்மை

ஒரு தயாரிப்பில் உள்ளீடாக இருக்கும் மறை நீரின் சரியான அளவைக் கணக்கிடுவது சிக்கலானது, ஏனெனில், இது காலநிலை, வேளாண்மை நடைமுறைகள் மற்றும் நீர் மேலாண்மை உத்திகள் உட்பட பல காரணிகளைக் கொண்டது. மறை நீரைக் கணக்கிடுவதற்கான வெவ்வேறு முறைகள் மாறுபட்ட மதிப்பீடுகளுக்கு வழி வகுக்கும். இந்தக் கருத்தைத் தரப்படுத்துவது என்பது கடினமான செயலாகும்.

ஆ. நிலைத்தன்மை கவலைகள்

நீர் பற்றாக்குறை உள்ள பகுதிகளிலிருந்து மறை நீரை ஏற்றுமதி செய்வது உள்ளூர் நீர் பற்றாக்குறையை அதிகப்படுத்தலாம். மேலும், சுற்றுச்சூழல் சீரழிவு மற்றும் நீண்ட கால நிலைத்தன்மை சிக்கல்களுக்கு வழி வகுக்கும். பாதிக்கப்படக்கூடிய பகுதிகளில் நீர் ஆதாரங்களை அதிகமாகப் பயன்படுத்துவதைத் தடுக்க மறை நீர் வணிகம் கட்டுப்படுத்தப்பட வேண்டும் என்று விமர்சகர்கள் கருத்து தெரிவிக்கின்றனர்.

இ. பொருளாதார மற்றும் சமூக தாக்கங்கள்

மறை நீர் வணிகம் பொருளாதாரச் சார்புகளையும் சமூக ஏற்றத் தாழ்வுகளையும் உருவாக்கும். உலக வணிக இயக்கவியல் மாறினால், மெய்நிகர் நீர் இறக்குமதியை பெரிதும் நம்பியிருக்கும் நீர் பற்றாக்குறையுடைய நாடுகள் பொருளாதாரத்தில் உறுதியற்ற தன்மையை எதிர்கொள்ளக் கூடும். கூடுதலாக, மறை நீர் வணிகத்தில் கவனம் செலுத்துவது, நீர் பயன்பாட்டுத் திறனை மேம்படுத்தக்கூடிய உள்ளூர் நீர் மேலாண்மை நடைமுறைகளில் இருந்து கவனத்தைத் திசை திருப்பலாம்.

ஈ. ஆட்சி மற்றும் கொள்கை சவால்கள்

மறை நீர் வணிகத்தை நிலையான முறையில் நிர்வகிப்பதற்குப் பயனுள்ள நிர்வாகம் முக்கியமானது. இருப்பினும், மறை நீர் வணிகத்தின் உலகளாவிய தன்மை நிர்வாகத்தைச் சிக்கலாக்குகிறது. ஏனெனில், இதற்கு வெவ்வேறு நீர் கொள்கைகள், முன்னுரிமைகள் மற்றும் திறன்களைக் கொண்ட நாடுகளுக்கு இடையே ஒத்துழைப்பு தேவைப்படுகிறது.

மறை நீர் என்ற கருத்து தேசிய மற்றும் பன்னாட்டு அளவில் நீர் மேலாண்மைக் கொள்கைகள் மற்றும் உத்திகளுக்கு குறிப்பிடத்தக்க தாக்கங்களைக் கொண்டுள்ளது. அதன் சவால்களை எதிர்கொள்ளும் போது, மறை நீர் வணிகத்தின் நன்மைகளைப் பயன்படுத்தப் பின்வரும் அணுகுமுறைகள் அவசியம்:

அ. நீர் பயன்பாட்டுத் திறனை ஊக்குவித்தல்

விவசாயம், தொழில் மற்றும் வீட்டுப் பயன்பாட்டில், நீர் பயன்பாட்டுத் திறனை மேம்படுத்தும் தொழில்நுட்பங்கள் மற்றும் நடைமுறைகளில் நாடுகள் முதலீடு செய்ய வேண்டும். திறமையான நீர் மேலாண்மை, மறை நீர் இறக்குமதி மற்றும் ஏற்றுமதியின் தேவையைக் குறைக்கும், நீர் ஆதாரங்களின் மீதான அழுத்தத்தைக் குறைக்கும்.

ஆ. மறை நீர் வணிகத்தை ஒழுங்குபடுத்துதல்

கொள்கை வகுப்பாளர்கள் மறை நீர் வணிகத்தின் நிலைத்தன்மையைக் கருத்தில் கொள்ள வேண்டும், குறிப்பாக, நீர் பற்றாக்குறை உள்ள பகுதிகளில். ஏற்றுமதி நோக்கங்களுக்காக நீர் வளங்களை அதிகமாகச் சுரண்டுவதைத் தடுக்கவும், நீண்ட கால நிலைத்தன்மை இலக்குகளுடன் நீர் பயன்பாடு சீரமைக்கப்படுவதை உறுதி செய்யவும் விதிமுறைகள் உருவாக்கப்பட வேண்டும்.

இ. பன்னாட்டு ஒத்துழைப்பை மேம்படுத்துதல்

மறை நீர் வணிகத்தை நிர்வகிப்பதற்கு அனைத்து நாடுகளின் ஒத்துழைப்பும் மிக முக்கியமானது. மறை நீர் வணிகத்தின் நன்மைகளை, நீர் வளங்களைப் பாதுகாப்பதன் அவசியத்துடன் சமநிலைப்படுத்தும் கொள்கைகளை உருவாக்க, அனைத்து நாடுகளும் ஒன்றிணைந்து செயல்பட வேண்டும். இந்த ஒத்துழைப்பில் சிறந்த நடைமுறைகள், தொழில்நுட்பப் பரிமாற்றம் மற்றும் கூட்டு நீர் மேலாண்மை முன் முயற்சிகள் ஆகியவைகளும் அடங்கும்.

ஈ. தேசிய நீர்க் கொள்கைகளில் மறை நீரை ஒருங்கிணைத்தல்

நாடுகள் தங்கள் தேசிய நீர் கொள்கைகள் மற்றும் திட்டமிடலில் மறை நீர் என்ற கருத்தையும் ஒருங்கிணைக்க வேண்டும். இந்த ஒருங்கிணைப்பு, நீர் பயன்பாடு, வணிகம் மற்றும் உணவுப் பாதுகாப்பு குறித்து அரசுகள் தகவலறிந்து முடிவுகளை எடுக்க உதவும்.

உ. பொது விழிப்புணர்வு மற்றும் கல்வி

மறை நீர் பற்றிய கருத்து மற்றும் அதன் தாக்கங்கள் பற்றிய பொது விழிப்புணர்வை ஏற்படுத்துவது, மேலும் நிலையான நுகர்வு முறைகளை ஊக்குவிக்கும். நுகர்வோர் தங்கள் மறை நீர் தடத்தைக் குறைக்கும், உற்பத்தி செய்வதற்கு குறைந்த நீர் தேவைப்படும் தயாரிப்புகளைத் தேர்ந்தெடுக்கலாம்.

அ. ஆஸ்திரேலியா மற்றும் மறை நீர் வணிகம்

உலகின் மிகப்பெரிய விவசாயப் பொருட்களை ஏற்றுமதி செய்யும் நாடுகளில் ஆஸ்திரேலியாவும் ஒன்றாக இருக்கிறது. குறிப்பாக, கோதுமை மற்றும் மாட்டிறைச்சியினை ஆஸ்திரேலியா அதிகளவில் ஏற்றுமதி செய்து வருகிறது. இவ்வுற்பத்திக்குத் தண்ணீர் அதிக அளவில் தேவைப்படும். நாட்டின் மறை நீர் ஏற்றுமதிகள், அதன் நீர் ஆதாரங்களின் நிலைத்தன்மை பற்றிய கவலைகளை எழுப்பியுள்ளன. குறிப்பாக, தொடர்ச்சியான வறட்சி மற்றும் காலநிலை மாற்றங்களை எதிர் கொள்கின்றன. ஆஸ்திரேலியாவில் உள்ள கொள்கை வகுப்பாளர்கள், வேளாண்மை ஏற்றுமதியின் பொருளாதார நன்மைகளோடு எதிர்காலச் சந்ததியினருக்கான நீர் ஆதாரங்களைப் பாதுகாப்பதன் அவசியத்தையும் சேர்த்துச் சமநிலைப்படுத்த வேண்டியிருக்கிறது.

ஆ. மத்தியக் கிழக்கு நாடுகளின் மறை நீர் இறக்குமதி

மறை நீர் இறக்குமதியைப் பெரிதும் நம்பியிருக்கும் மத்தியக் கிழக்குப் பகுதியிலுள்ள சவூதி அரேபியா மற்றும் ஐக்கிய அரபு அமீரகம் போன்ற நாடுகள் தங்கள் குறைவான நீர் ஆதாரங்களைப் பாதுகாக்க, அதிக அளவு உணவுப் பொருட்களை இறக்குமதி செய்கின்றன. இந்த நாடுகளின் நீர் பற்றாக்குறையை நிர்வகிக்க இது பயன்பட்டாலும், உலக உணவுச் சந்தைகளில் தொடர்ந்து பிற நாடுகளை நம்பியே இருக்க வேண்டியிருக்கிறது. இதனால், இந்நாட்டிற்கு உணவுப் பாதுகாப்பு மற்றும் பொருளாதாரப் பாதிப்பு குறித்த கவலைகள் இருக்கத்தான் செய்கின்றன.

இ. ஐரோப்பிய ஒன்றியத்தின் மறை நீர் தடம்

ஐரோப்பிய ஒன்றியம் (European Union), காபி, சாக்லேட் மற்றும் பருத்தி ஆகியவற்றின் இறக்குமதி மூலம் மெய்நிகர் நீரின் முக்கிய இறக்குமதியாளராக உள்ளது. ஐரோப்பிய ஒன்றியத்தின் மறை நீர் தடம், ஏற்றுமதி செய்யும் நாடுகளில், குறிப்பாக, வளரும் பகுதிகளில் அதன் நுகர்வு முறைகளின் சுற்றுச்சூழல் மற்றும் சமூகத் தாக்கங்கள் பற்றிய விவாதங்களுக்கு வழி வகுத்தது. ஐரோப்பிய ஒன்றியம், அதன் மறை நீர் தடத்தைக் குறைப்பது உட்பட, மேலும் நிலையான நுகர்வு மற்றும் உற்பத்தி நடைமுறைகளை மேம்படுத்துவதற்கான கொள்கைகளை ஆராய்ந்து வருகிறது.

ஈ. இந்தியாவில் மறை நீர் வணிகம்

இந்தியாவைப் பொறுத்த வரை, இந்தியப் பொருளாதாரத்தின் முதுகெலும்பாகக் கருதப்படும் வேளாண்மைத் துறையில் கிடைக்கும் வேலைகளை நம்பியேப் பல கோடி மக்களின் வாழ்வாதாரமும் அமைந்திருக்கிறது. இந்தியாவின் நீர் பயன்பாட்டில் 80% எனும் அளவில் வேளாண்மைப் பணிகளுக்குப் பயன்படுத்தப்பட்டு வருகிறது. அரிசி, கோதுமை மற்றும் கரும்பு போன்ற நீர் சார்ந்த பயிர்களின் முக்கிய உற்பத்தியாளராகவும் ஏற்றுமதியாளராகவும் இந்தியா இருக்கிறது. இப்பொருட்களின் உற்பத்திக்கு அதிகமான அளவு தண்ணீர் தேவைப்படுகிறது. இதே போன்று, இந்தியாவில் செயல்பட்டு வரும் தொழில்துறைக்கும் குறிப்பிடத்தக்க அளவில் தண்ணீர் தேவையாக இருக்கிறது. குறிப்பாக, நகரப்பகுதிகளில் நீர் அடர்த்தியுடைய பொருட்களுக்கான தேவையும் அதிகமாக இருக்கிறது.

உலகளாவிய மறை நீர் வணிகத்தில் இந்தியாவும் முக்கியமான நாடாக இருக்கிறது. இந்தியாவிலிருந்து அரிசி மற்றும் ஜவுளி போன்ற பொருட்களை ஏற்றுமதி செய்யும் அதே வேளையில், எண்ணெய் வித்துக்கள் மற்றும் பருப்பு வகைகள் போன்ற நீர் மிகுந்த பொருட்களை இந்தியா இறக்குமதியும் செய்கிறது. இதனால், இந்தியாவின் வணிகம், உள்நாட்டு நீர் பாதுகாப்பு மற்றும் உலகளாவிய நீர் விநியோகம் ஆகிய இரண்டிலும் தாக்கங்களைக் கொண்டிருக்கிறது.

1960 ஆம் ஆண்டுகளில் நடந்த பசுமைப் புரட்சியானது, பஞ்சாப் மற்றும் அரியானாவில் அதிக உற்பத்தி தரும் அரிசி மற்றும் கோதுமை வகைகளை பரவலாக ஏற்றுக் கொள்ள வழி வகுத்தது. இது உணவு உற்பத்தியை அதிகரித்த போதும், நிலத்தடி நீரை அதிகமாக உறிஞ்சி எடுத்ததன் விளைவாக, நீர் நிலைகள் குறைவதற்கும், சுற்றுச்சூழல் சீர்கேட்டிற்கும் வழி வகுத்தது என்பதையும் மறுக்க இயலாது.

தெற்கு மற்றும் மேற்கு இந்தியாவில் உள்ள மாநிலங்களுடன் ஒப்பிடுகையில், பஞ்சாப், அரியானா மற்றும் உத்தரபிரதேசம் போன்ற மாநிலங்கள் விவசாயத்திற்காக அதிகமான தண்ணீரைப் பயன்படுத்துவதால், நீர் பயன்பாட்டில் இந்தியாவின் பகுதிகளுக்கிடையிலான வேறுபாடுகளும் அதிக அளவில் இருக்கின்றன. இங்கு, உணவுப் பாதுகாப்பில் மறை நீரின் தாக்கம் கருத்தில் கொள்ள வேண்டிய மற்றொரு முக்கியமான நிலையாகும்.

இந்தியாவின் வேளாண்மைப் பொருட்களின் ஏற்றுமதி வழியாக, குறிப்பிடத்தக்க வருவாய் கிடைத்த போதும், குறிப்பிட்ட வேளாண்மைப் பொருட்களின் உற்பத்தியானது, நாட்டின் நீர் ஆதாரங்களின் மீது பெரும் அழுத்தத்தை ஏற்படுத்துகின்றன. நிலையான நீர் பயன்பாட்டுடன் உணவுப் பாதுகாப்பின் தேவையைச் சமநிலைப்படுத்துவது ஒரு சிக்கலான சவாலாகவும் இருக்கிறது. பொதுவாக, இந்தியாவின் வணிகச் சமநிலை அதன் ஏற்றுமதி மற்றும் இறக்குமதியின் மறை நீர் உள்ளடக்கத்தால் குறிப்பிடத்தக்க அளவில் பாதிக்கப்படுகிறது.


உதாரணமாக, நீர் அதிகம் தேவைப்படும் பயிரான அரிசியினை இந்தியா ஏற்றுமதி செய்யும் நிலையில், அதனை இறக்குமதி செய்யும் நாடுகளுக்கு நீர் ஆதாரங்களைப் பெருமளவில் மறை நீராக மாற்றுகிறது. இந்தப் பரிமாற்றமானது, பொருளாதாரத் தாக்கங்களை ஏற்படுத்தக் கூடியதாகவும் இருக்கிறது. குறிப்பாக, இந்தியாவின் நீர் பற்றாக்குறை உள்ள பகுதிகளில், நீர் அதிகம் தேவைப்படும் பயிர்களின் உற்பத்தியும் ஏற்றுமதியும் உள்ளூர் நீர் வளங்களைப் பெருமளவில் குறைக்கிறது. இது இந்தியாவின் வீட்டுப் பயன்பாட்டிற்கான நீர் இருப்பு மற்றும் வேளாண்மை நடைமுறைகளின் நிலைத் தன்மையையும் சேர்த்துப் பாதிக்கிறது.

இந்தியாவில் மறை நீரை நிர்வகிப்பதற்கும் நிலையான நீர் பயன்பாட்டை உறுதி செய்வதற்கும், பயனுள்ள கொள்கை மற்றும் நிர்வாகம் அவசியமானதாகி இருக்கிறது. ஒருங்கிணைந்த நீர் வள மேலாண்மையின் அவசியத்தை வலியுறுத்தும் தேசிய நீர்க் கொள்கை உட்பட நீர் மேலாண்மையை மேம்படுத்தும் நோக்கில் பல்வேறு கொள்கைகளை இந்திய அரசு செயல்படுத்தி வருகிறது. இருப்பினும், மறை நீர் என்ற கருத்து தேசிய நீர் கொள்கைகளில் முழுமையாக ஒருங்கிணைக்கப்படவில்லை. இது நீர் வளங்களை நிர்வகிப்பதில் பெரும் இடைவெளியை ஏற்படுத்துகிறது.

மறை நீர் ஓட்டங்களை வடிவமைப்பதில் பன்னாட்டு வணிக ஒப்பந்தங்களின் பங்கும் முக்கியமானது. ஒப்பந்தங்களின் விதிமுறைகள் மற்றும் நிபந்தனைகளைப் பொறுத்து, வணிக ஒப்பந்தங்கள் நிலையான நீர் பயன்பாட்டை ஆதரிக்கலாம் அல்லது தடுக்கலாம். எடுத்துக்காட்டாக, சுற்றுச்சூழல் மற்றும் சமூகச் செலவுகளைக் கருத்தில் கொள்ளாமல், நீர் அதிகம் தேவைப்படும் பயிர்களை ஏற்றுமதி செய்வதை ஊக்குவிக்கும் வணிக ஒப்பந்தங்கள் நீடிக்க முடியாத தண்ணீரைப் பயன்படுத்த வழிவகுக்கும்.

இந்தியாவில் நிலையான மறை நீர் பயன்பாட்டிற்கான கொள்கைப் பரிந்துரைகளில் நீர் திறனுள்ள விவசாய நடைமுறைகளை மேம்படுத்துதல், தேசிய நீர் கொள்கைகளில் மறை நீரை ஒருங்கிணைத்தல் மற்றும் நீர் மேலாண்மைக்கான சந்தை அடிப்படையிலான வழிமுறைகளை மேம்படுத்துதல் போன்றவைகளும் இடம் பெற்றிட வேண்டும். கூடுதலாக, நீர் பாதுகாப்பு மற்றும் நிலைத்தன்மையின் கலாச்சாரத்தை வளர்ப்பதற்குப் பொது விழிப்புணர்வு மற்றும் கல்வி அவசியம் என்பதையும் இங்கு கவனத்தில் கொள்ள வேண்டும்.

இந்தியா மட்டுமின்றி, உலகளாவிய நிலையிலும் மறை நீர் குறித்த பொது விழிப்புணர்வும், கல்வியும் தேவையானதாக இருக்கிறது, இதே போன்று, உலகின் நீர் ஆதாரங்ளின் நிலைத்தன்மைக்கும் மற்றும் சமமான விநியோகத்திற்கும் மறை நீர் கருத்து முக்கியப் பங்கு வகிக்கிறது என்றால் அது மிகையில்லை.

*****

இது முத்துக்கமலம் இணைய இதழின் படைப்பு.