உலகில் வழங்கப்படும் பரிசுகளில் மிக உயர்ந்த பரிசாகவும், மதிப்பு மிக்கதாகவும் இருப்பது நோபல் பரிசு. சுவீடன் நாட்டைச் சேர்ந்த வேதியியல் ஆராய்ச்சியாளரும், தொழிலதிபருமான ஆல்ஃபிரட் நோபல் என்பவரால் 1895ல் எழுதி வைக்கப் பெற்ற ஒரு உயிலின்படி, சிறப்புமிக்க ஆய்வு மேற்கொண்டவர்கள், மனித சமூகத்திற்குப் பெரிதும் பயன் தரும் தொழில்நுட்பங்கள் அல்லது கருவிகளைக் கண்டுபிடித்தவர்கள், சமூகத்திற்குச் சிறப்பாகத் தொண்டாற்றியவர்கள், பொது அமைதிக்காகப் பாடுபடுபவர்கள் போன்றோருக்கு இந்த நோபல் பரிசுகள் வழங்கப்பட்டு வருகின்றன.

ஆல்பிரட் நோபல் உயிலில் குறிப்பிட்டிருந்ததை அடிப்படையாகக் கொண்டு 1900 ஆம் ஆண்டில் ஏற்படுத்தப்பட்ட நோபல் அறக்கட்டளை வழியாக, 1901 ஆம் ஆண்டு முதல் நோபல் பரிசு வழங்கப்பட்டு வருகிறது. இயற்பியல், வேதியியல், இலக்கியம், மருத்துவம் அல்லது உடலியங்குயியல், அமைதி மற்றும் பொருளாதாரம் எனும் ஆறு பிரிவுகளில் நோபல் பரிசுகள் வழங்கப்பட்டு வருகின்றன.

இயற்பியல், வேதியியல், இலக்கியம், மருத்துவம் அல்லது உடலியங்குயியல் மற்றும் அமைதிக்கான பரிசுகள் மட்டுமே ஆல்பிரட் நோபல் உயிலில் எழுதி வைத்திருந்தபடி, அவரது விருப்பப்படி வழங்கப்படும் பரிசுகள் ஆகும். பொருளாதாரத்திற்கான நோபல் பரிசு பின்னர் இணைக்கப்பெற்ற ஒரு பரிசாகும்.

1968 ஆம் ஆண்டில், சுவீடன் நாட்டுத் தேசிய வங்கியானது 300-வது ஆண்டைக் கொண்டாடிய நிலையில், நோபல் அறக்கட்டளைக்கு நிரந்தர வைப்புநிதி ஒன்றை ஏற்படுத்தி, அதன் வழியாகப் பொருளாதாரத்திற்கான நோபல் பரிசினைத் தொடர்ந்து வழங்கிடக் கேட்டுக் கொண்டது. அதனைத் தொடர்ந்து, 1969 ஆம் ஆண்டு முதல் பொருளாதாரத்திற்கான நோபல் பரிசும் வழங்கப்பட்டு வருகிறது.

1901 முதல் 2025 வரை இயற்பியல், வேதியியல், மருத்துவம் அல்லது உடலியங்கியல், இலக்கியம், அமைதி மற்றும் பொருளாதாரம் என்று ஆறு பிரிவுகளிலும் சேர்த்து 633 முறைகளில், 990 தனி நபர்கள், 28 அமைப்புகள் என்று மொத்தம் 1026 நபர்களுக்கும் அமைப்புகளுக்கும் பரிசுகள் வழங்கப்பட்டிருக்கின்றன.

நோபல் பரிசுகளில் 1901 முதல் 1920 வரையிலான காலத்தில் 4 பெண்களும், 1921 முதல் 1940 வரையிலான காலத்தில் 5பெண்களும், 1941 முதல் 1960 வரையிலான காலத்தில் 3 பெண்களும், 1961 முதல் 1980 வரையிலான காலத்தில் 7 பெண்களும், 1981 முதல் 2000 வரையிலான காலத்தில் 11 பெண்களும், 2001 முதல் 2020 வரையிலான காலத்தில் 28 பெண்களும், 2021 முதல் 2025 வரையிலான காலத்தில் 10 பெண்களும் என்று இதுவரை 68 முறை பெண்களுக்கு நோபல் பரிசு வழங்கப்பட்டிருக்கிறது. இப்பரிசுகளில் மேரி கியூரி 1903 ஆம் ஆண்டு இயற்பியலுக்கான நோபல் பரிசையும், 1911 ஆம் ஆண்டில் வேதியியலுக்கான நோபல் பரிசையும் பெற்றிருக்கிறார். எனவே, இதுவரை 67 பெண்களுக்கு நோபல் பரிசு வழங்கப்பட்டிருக்கின்றன.

இயற்பியல் - 5, வேதியியல் - 8, மருத்துவம் அல்லது உடலியங்கியல் - 14, இலக்கியம் - 18, அமைதி - 20, பொருளாதாரம் - 3 என்று மொத்தம் 68 பெண்கள் நோபல் பரிசுகளைப் பெற்றிருக்கின்றனர்.

இயற்பியலுக்கான நோபல் பரிசினை 1903 ஆம் ஆண்டில் போலந்து நாட்டில் பிறந்து பிரான்சில் பணியாற்றிய மேரி கியூரி (Marie Curie) எனும் பெண்மணியும், 1963 ஆம் ஆண்டில் போலந்து நாட்டில் பிறந்து அமெரிக்க ஐக்கிய நாட்டில் பணியாற்றிய மரியா கோப்பர்ட் மேயர் (Maria Goeppert Mayer) எனும் பெண்மணியும், 2018 ஆம் ஆண்டில் கனடா நாட்டைச் சேர்ந்த டோனா ஸ்ட்ரிக்லேண்ட் (Donna Strickland) எனும் பெண்மணியும், 2020 ஆம் ஆண்டில் அமெரிக்க ஐக்கிய நாட்டைச் சேர்ந்த ஆண்ட்ரியா கெஸ் (Andrea Ghez) எனும் பெண்மணியும், 2023 ஆம் ஆண்டில் பிரான்சில் பிறந்து சுவீடன் நாட்டில் பணியாற்றிய அன்னே எல்'ஹுல்லியர் (Anne L’Huillier) எனும் பெண்மணியும் என்று மொத்தம் ஐந்து பேர் பெற்றிருக்கின்றனர்.

வேதியியலுக்கான நோபல் பரிசினை 1911 ஆம் ஆண்டில் போலந்து நாட்டில் பிறந்து பிரான்சில் பணியாற்றிய மேரி கியூரி (Marie Curie) எனும் பெண்மணியும், 1935 ஆம் ஆண்டில் பிரான்சு நாட்டைச் சேர்ந்த ஐரீன் ஜோலியட் கியூரி (Irène Joliot-Curie) எனும் பெண்மணியும், 1964 ஆம் ஆண்டில் எகிப்து நாட்டில் பிறந்து, ஐக்கிய ராஜ்ஜியத்தில் பணியாற்றிய டோரத்தி குரோபுட் ஹோட்கின் (Dorothy Crowfoot Hodgkin) எனும் பெண்மணியும், 2009 ஆம் ஆண்டில் இஸ்ரேலைச் சேர்ந்த அடா ஈ. யோனாத் (Ada E. Yonath) எனும் பெண்மணியும், 2018 ஆம் ஆண்டில் அமெரிக்க ஐக்கிய நாட்டைச் சேர்ந்த பிரான்செஸ் எச். அர்னால்டு (Frances H. Arnold) எனும் பெண்மணியும், 2020 ஆம் ஆண்டில் பிரான்சில் பிறந்து ஜெர்மனியில் பணியாற்றிய இம்மானுவேல் சார்பெண்டியர் (Emmanuelle Charpentier) மற்றும் அமெரிக்க ஐக்கிய நாட்டைச் சேர்ந்த ஜெனிபர் ஏ டவுட்னா (Jennifer A. Doudna) எனும் பெண்மணிகளும், 2022 ஆம் ஆண்டில் அமெரிக்க ஐக்கிய நாட்டைச் சேர்ந்த கரோலின் பெர்ட்டோசி (Carolyn Bertozzi) எனும் பெண்மணியும் என்று மொத்தம் எட்டு பேர் பெற்றிருக்கின்றனர்.

மருத்துவம் அல்லது உடலியங்கியல் பிரிவில் நோபல் பரிசினை 1947 ஆம் ஆண்டில் செக்கோஸ்லேவியாவில் பிறந்து அமெரிக்க ஐக்கிய நாட்டில் பணியாற்றிய கெர்ட்டி கோரி (Gerty Cori) எனும் பெண்மணியும், 1977 ஆம் ஆண்டில் அமெரிக்க ஐக்கிய நாட்டைச் சேர்ந்த ரோசலின் யாலோ (Rosalyn Yalow) எனும் பெண்மணியும், 1983 ஆம் ஆண்டில் அமெரிக்க ஐக்கிய நாட்டைச் சேர்ந்த பார்பாரா மெக்லிண்டாக் (Barbara McClintock) எனும் பெண்மணியும், 1986 ஆம் ஆண்டில் இத்தாலியைச் சேர்ந்த ரீட்டா லெவி - மோண்டால்சினி (Rita Levi-Montalcini) எனும் பெண்மணியும், 1988 ஆம் ஆண்டில் அமெரிக்க ஐக்கிய நாட்டைச் சேர்ந்த ஜெர்ட்ரூடு பி. எலியன் (Gertrude B. Elion) எனும் பெண்மணியும், 1995 ஆம் ஆண்டில் ஜெர்மனியைச் சேர்ந்த கிறிஸ்டியான் நஸ்லின் வோல்கார்ட் (Christiane Nüsslein-Volhard) எனும் பெண்மணியும், 2004 ஆம் ஆண்டில் அமெரிக்க ஐக்கிய நாட்டைச் சேர்ந்த லிண்டா பி. பக் (Linda B. Buck) எனும் பெண்மணியும், 2008 ஆம் ஆண்டில் பிரான்சைச் சேர்ந்த பிரான்கோயிஸ் பாரி - சினோயூசி (Françoise Barré-Sinoussi) எனும் பெண்மணியும், 2009 ஆம் ஆண்டில் ஆஸ்திரேலியாவில் பிறந்து அமெரிக்க ஐக்கிய நாட்டில் பணியாற்றிய எலிசபெத் எச். பிளாக்பெர்ன் (Elizabeth H. Blackburn) மற்றும் அமெரிக்க ஐக்கிய நாட்டைச் சேர்ந்த கரோல் டபிள்யூ கிரீடர் (Carol W. Greider) எனும் இரு பெண்மணிகளும், 2014 ஆம் ஆண்டில் நார்வேயைச் சேர்ந்த மே பிரிட் மோசர் (May-Britt Moser) எனும் பெண்மணியும், 2015 ஆம் ஆண்டில் சீனாவைச் சேர்ந்த டூ யூயூ (Tu Youyou) எனும் பெண்மணியும், 2023 ஆம் ஆண்டில் ஹங்கேரியில் பிறந்து அமெரிக்க ஐக்கிய நாட்டில் பணியாற்றிய (Katalin Karikó) எனும் பெண்மணியும், 2025 ஆம் ஆண்டில் அமெரிக்காவைச் சேர்ந்த மேரி இ. பிரன்கோவ் (Mary E. Brunkow) எனும் பெண்மணியும் என்று மொத்தம் பதினான்கு பேர் பெற்றிருக்கின்றனர்.

இலக்கியத்திற்கான நோபல் பரிசினை 1909 ஆம் ஆண்டில் சுவீடனைச் சேர்ந்த செல்மா லேஜர்லப் (Selma Lagerlöf) எனும் பெண்மணியும், 1926 ஆம் ஆண்டில் இத்தாலியைச் சேர்ந்த கிரேசியா டெலிட்டா (Grazia Deledda) எனும் பெண்மணியும், 1928 ஆம் ஆண்டில் டென்மார்க்கில் பிறந்து நார்வேயில் வசித்த சிக்ரிட் அண்ட்செட் (Sigrid Undset) எனும் பெண்மணியும், 1938 ஆம் ஆண்டில் அமெரிக்க ஐக்கிய நாட்டைச் சேர்ந்த பியர்ல் பக் (Pearl Buck) எனும் பெண்மணியும், 1945 ஆம் ஆண்டில் சிலியைச் சேர்ந்த கபிரீலா மிஸ்ட்ரல் (Gabriela Mistral) எனும் பெண்மணியும், 1966 ஆம் ஆண்டில் ஜெர்மனியில் பிறந்து சுவீடனில் வசித்த நெல்லி சாக்ஸ் (Nelly Sachs) எனும் பெண்மணியும், 1991 ஆம் ஆண்டில் தென்னாப்பிரிக்காவைச் சேர்ந்த நடின் கோர்டிமர் (Nadine Gordimer) எனும் பெண்மணியும், 1993 ஆம் ஆண்டில் அமெரிக்க ஐக்கிய நாட்டைச் சேர்ந்த டோனி மாரிசன் (Toni Morrison) எனும் பெண்மணியும், 1996 ஆம் ஆண்டில் போலந்தைச் சேர்ந்த விஸ்லவா சிசம்போர்ஸ்கா (Wisława Szymborska) எனும் பெண்மணியும், 2004 ஆம் ஆண்டில் ஆஸ்திரியாவைச் சேர்ந்த எல்பிரீடு செல்னிக் (Elfriede Jelinek) எனும் பெண்மணியும், 2007 ஆம் ஆண்டில் ஈரானில் பிறந்து ஐக்கிய ராச்சியத்த்தில் வசித்த டோரிஸ் லெஸ்ஸிங் (Doris Lessing) எனும் பெண்மணியும், 2009 ஆம் ஆண்டில் ரோமானியாவில் பிறந்து ஜெர்மனியில் வசித்த ஹெர்டா முல்லர் (Herta Müller) எனும் பெண்மணியும் 2013 ஆம் ஆண்டில் கனடாவைச் சேர்ந்த அலைஸ் முன்ரோ (Alice Munro) எனும் பெண்மணியும், 2015 ஆம் ஆண்டில் உக்ரைனில் பிறந்து பெலாரசில் வசித்த ஸ்வெட்லனா அலெக்ஸிவிக் (Svetlana Alexievich) எனும் பெண்மணியும், 2018 ஆம் ஆண்டில் போலந்தைச் சேர்ந்த ஓல்கா டோகர்சக் (Olga Tokarczuk) எனும் பெண்மணியும், 2020 ஆம் ஆண்டில் அமெரிக்க ஐக்கிய நாட்டைச் சேர்ந்த லூயிஸ் ஜீலக் (Louise Glück) எனும் பெண்மணியும், 2022 ஆம் ஆண்டில் பிரான்சைச் சேர்ந்த ஆன்னி எமாக்ஸ் (Annie Ernaux) எனும் பெண்மணியும், 2024 ஆம் ஆண்டில் தென் கொரியா எழுத்தாளர் ஹான் காங் (Han Kang) எனும் பெண்மணியும் என்று மொத்தம் பதினெட்டு பேர் பெற்றிருக்கின்றனர்.

அமைதிக்கான பரிசினை 1905 ஆம் ஆண்டில் செக் குடியரசில் பிறந்து, ஆஸ்திரியாவில் வசித்த பெர்த்தா ஒன் சட்னர் (Bertha von Suttner) எனும் பெண்மணியும், 1931 ஆம் ஆண்டில் அமெரிக்க ஐக்கிய நாட்டைச் சேர்ந்த ஜேன் ஆதம்ஸ் (Jane Addams) எனும் பெண்மணியும், 1946 ஆம் ஆண்டில் அமெரிக்க ஐக்கிய நாட்டைச் சேர்ந்த எமிலி கிரீன் பால்க் (Emily Greene Balch) எனும் பெண்மணியும், 1976 ஆம் ஆண்டில் வட அயர்லாந்தில் பிறந்து ஐக்கிய ராச்சியத்தில் வசித்த பெட்டி வில்லியம்ஸ் (Betty Williams) மற்றும் வட அயர்லாந்தில் பிறந்து ஐக்கிய ராச்சியத்தில் வசித்த மெய்ரீட் கோரிகான் (Mairead Corrigan) எனும் இரு பெண்மணிகளும், 1979 ஆம் ஆண்டில் வட மெசடோனியாவில் பிறந்து இந்தியாவில் வசித்த அன்னை தெரசா (Mother Teresa) எனும் பெண்மணியும், 1982 ஆம் ஆண்டில் சுவீடனைச் சேர்ந்த ஆல்வா மிர்டல் (Alva Myrdal) எனும் பெண்மணியும், 1991 ஆம் ஆண்டில் மியான்மரைச் சேர்ந்த ஆங் சான் சூ கை (Aung San Suu Kyi) எனும் பெண்மணியும், 1992 ஆம் ஆண்டில் கவுதமாலா நாட்டைச் சேர்ந்த ரிகோபெர்டா மென்சு (Rigoberta Menchú Tum) எனும் பெண்மணியும், 1997 ஆம் ஆண்டில் அமெரிக்க ஐக்கிய நாட்டைச் சேந்த ஜோடி வில்லியம்ஸ் (Jody Williams) எனும் பெண்மணியும், 2003 ஆம் ஆண்டில் ஈரானைச் சேர்ந்த சிரின் எபாடி (Shirin Ebadi) எனும் பெண்மணியும், 2004 ஆம் ஆண்டில் கென்யாவைச் சேர்ந்த வங்காரி முதா மாதாய் (Wangari Maathai) எனும் பெண்மணியும், 2011 ஆம் ஆண்டில் லைபீரியா நாட்டைச் சேர்ந்த எல்லென் ஜான்சன் சர்லீப் (Ellen Johnson Sirleaf), லைபீரியா நாட்டைச் சேர்ந்த லெய்மா ஜிபோவி (Leymah Gbowee) மற்றும் யேமன் நாட்டைச் சேர்ந்த தாவக்கோல் கர்மான் (Tawakkol Karman) எனும் மூன்று பெண்மணிகளும், 2014 ஆம் ஆண்டில் பாகிஸ்தானில் பிறந்து ஐக்கிய ராச்சியத்தில் வசித்த மலாலா யூசாப்ஜாய் (Malala Yousafzai) எனும் பெண்மணியும், 2018 ஆம் ஆண்டில் ஈராக்கைச் சேர்ந்த நடியா முரட் (Nadia Murad) எனும் பெண்மணியும், 2021 ஆம் ஆண்டில் பிலிப்பைன்சைச் சேர்ந்த மரிய ரெசா (Maria Ressa) எனும் பெண்மணியும், 2023 ஆம் ஆண்டில் ஈரானைச் சேர்ந்த நர்கீஸ் முகமதி (Narges Mohammadi) எனும் பெண்மணியும், 2025 ஆம் ஆண்டில் வெனிசுலா நாட்டைச் சேர்ந்த மரியா கொரினா மச்சாடோ (Maria Corina Machado) எனும் பெண்மணியும் என்று மொத்தம் இருபது பேர் பெற்றிருக்கின்றனர்.

பொருளாதாரத்திற்கான பரிசினை 2009 ஆம் ஆண்டில் அமெரிக்க ஐக்கிய நாட்டைச் சேர்ந்த எலினார் ஓஸ்ட்ராம் (Elinor Ostrom) எனும் பெண்மணியும், 2019 ஆம் ஆண்டில் பிரான்சில் பிறந்து அமெரிக்க ஐக்கிய நாட்டில் வசித்த எஸ்தர் டப்ளோ (Esther Duflo) எனும் பெண்மணியும், 2023 ஆம் ஆண்டில் அமெரிக்க ஐக்கிய நாட்டைச் சேர்ந்த கிளவுடியா கோல்டின் (Claudia Goldin) எனும் பெண்மணியும் என்று மொத்தம் மூன்று பெண்மணிகள் பெற்றிருக்கின்றனர்.

நோபல் பரிசு பெற்ற பெண்களில் 2014 ஆம் ஆண்டில் பாகிஸ்தானைச் சேர்ந்த மலாலா யூசாப்ஜாய் 17 வயதில் அமைதிக்கான பரிசினையும், 2018 ஆம் ஆண்டில் ஈராக்கைச் சேர்ந்த நடியா முரட் 25 வயதில் அமைதிக்கான பரிசினைப் பெற்றிருக்கின்றனர்.

போலந்து நாட்டைச் சேர்ந்த மேரி கியூரி எனும் பெண்மணி, 1903 ஆம் ஆண்டில் இயற்பியலுக்கான பரிசையும், 1911 ஆம் ஆண்டில் வேதியியலுக்கான பரிசையும் பெற்றிருக்கிறார். இருமுறை பரிசு பெற்ற இப்பெண்மணியின் மகளான பிரான்சு நாட்டைச் சேர்ந்த ஐரீன் ஜோலியட் கியூரி என்பவர் 1935 ஆம் ஆண்டில் வேதியியலுக்கான பரிசினையும் பெற்றிருக்கிறார். தாயும் மகளும் ஒரே துறையான வேதியியல் துறையில் இப்பரிசினைப் பெற்றதும் இங்கு குறிப்பிடத்தக்கது.

இதே போன்று, வேதியியலுக்கான பரிசினை 2020 ஆம் ஆண்டில் இமானுவேல் சார்பெண்டியர் மற்றும் ஜெனிபர் ஏ. டவுட்னா எனும் இரு பெண்மணிகளும், 2009 ஆம் ஆண்டில் மருத்துவம் அல்லது உடலியங்கியலுக்கான பரிசினை எலிசபெத் எச். பிளாக்பெர்ன் மற்றும் கரோல் டபிள்யூ கிரீடர் எனும் இரு பெண்மணிகளும், அமைதிக்கான பரிசினை 1976 ஆம் ஆண்டில் பெட்டி வில்லியம்ஸ் மற்றும் மெய்ரீட் கோரிகான் எனும் இரு பெண்மணிகளும், 2011 ஆம் ஆண்டில் எல்லென் ஜான்சன் சர்லீப், லெய்மா ஜிபோவி மற்றும் தாவக்கோல் கர்மான் எனும் மூன்று பெண்மணிகளும் பகிர்ந்து கொண்டிருக்கின்றனர் என்பதும் இங்கு கவனிக்கத்தக்கது.

*****

இது முத்துக்கமலம் இணைய இதழின் படைப்பு.