ஓடுவதால் பயனில்லை... அப்படியென்றால்...?
 காலம் பறந்து செல்வது. நம் இளமையில் இறைவனை நாம் நினைவில் கொள்ளாவிடில், முதுமையில் அவனைப் பற்றி எண்ண ஆற்றல் நமக்கு இல்லாது போகும். — ஹான்ஸ் கிரிஸ்ட்டியன் ஆண்டர்லைன்
காலமெனும் முட்டாள், ஓசைப்படாமல் விரைந்து கடக்கின்றான்; காளைப் பருவம் பற்றி நான் கனவு காணும் முன்பே, முதுமை நெருங்குகிறது. — வில்லியம் கிஃப்போர்ட்
கெட்டுப் போய் விட்டது காலமல்ல, மனிதன்தான். — ஜே. ப்யூமாண்ட்
நாம் வாழும் காலத்தைப் பழிப்பது, அதிகாரத்தில் உள்ளவர்களைக் குறை கூறுவது, கடந்த காலத்தை எண்ணிக் கண்ணீர் சிந்துவது, எதிர்காலத்தைப் பற்றி ஆதாரமற்ற கனவுகள் காண்பது, இது மனித சமுதாயத்தில் பெரும் பகுதியினருக்கு இயல்பு. — எட்மண்ட் பர்க்
காலம் என்பது, கடக்கும் நிகழ்ச்சிகளால் உருவான ஆறு, கட்டுக்கடங்கா வேகம் கொண்ட நீரோடை அது. ஒரு பொருள் கண்ணுக்குப் புலப்பட்ட உடனேயே, அது அடித்துச் செல்லப்படுகிறது. இன்னொன்று, அதன் இடத்தில் வந்து, அதுவும் அடித்துச் செல்லப்படுகிறது. — மார்க்கஸ் அரேலியஸ்
சிந்தனை, வாழ்வின் அடிமை; வாழ்வு, காலத்தின் ஏமாளி; உலகனைத்தும் அளக்கும் காலம்; ஒரு நேரம் நின்றுவிடும். — வில்லியம் ஷேக்ஸ்பியர்
வாழ்வின் காலம் குறுகியது; குறுகியதைப் புன்மையாய்க் கழிப்பது, கொடியதை நெடியதாக்கி விடும். — வில்லியம் ஷேக்ஸ்பியர்
கொடுங்கோலர்களில் தலையாயது, காலம். முதுமையை நோக்கி நாம் வளர்ந்து செல்கையில், நம் உடல் நலன், உடல் உறுப்புகள், புலன்கள், வலிமை, இயல்புகள், அனைத்தின் மீதும் வரி விதிக்கின்றார், அக் கொடுங்கோலர். — ஜான் ஃபாஸ்ட்டர்
நாம் பெரிதும் விரும்புவதும், அந்தோ, மிக மோசமாகப் பயன்படுத்துவதும், காலமே. — வில்லியம் பென்
ஒழுக்கத் துறையில் கூட, பலவற்றை சட்டப்படி நியாயப்படுத்தும் சக்தி, காலம். — ஹென்ரி எல் மெங்க்கென்
காலமே காசு என்பதைக் கருத்திற் கொள். — பெஞ்சமின் ஃபிராங்க்ளின்
ஆண்டவனுக்கு அடுத்தபடியாக காலத்தைப் போற்றுவதே, ஒழுக்க நடத்தையின் உயர்ந்த ஒரு விதி. — ஜோஹன் லேவேட்டர்
நேரத்தை மட்டும் நாம் சரியாகப் பயன்படுத்தினால், போதிய காலம் நமக்கு எப்பொழுதுமே இருக்கும். — யொஹன் கேத்தே
வாழ்வை ஒரே நேரத்தில் வீசிப் பறி கொடுப்பது பற்றி எண்ணவேப் பயப்படுவதும், அதே சமயத்தில், சிறிது சிறிதாகவும், சிப்பம் சிப்பமாகவும் வாழ்க்கையை வீணடிப்பதைப் பற்றிக் கவலைப்படாததும், எவ்வளவு மடைமை. — ஜான் ஹோஷ்
அரை மணியைக் கூட அற்பமாகக் கருதுவதைக் காட்டிலும், அந்த அரை மணி நேரத்தில் மிக அற்புதமான காரியத்தைச் செய்து கொண்டிருப்பதே மேல். — யொஹன் கேத்தே
உறுதியான நண்பனாகவும், குணமாக்குபவனாகவும், இருக்கும் காலம், கருணையற்ற பகைவனாகவும் இருக்கும். — மகாத்மா காந்தி
நம் எண்ணங்கள் அனைத்தையும் விட, காலம், நமக்கு அதிகம் போதிக்கும். — பெஞ்சமின் டிஸ்ரேலி
வருங்கால சந்ததியார்க்குக் காலம் அனைத்தையும் அம்பலப்படுத்திவிடும். அது பெரிய உளறுவாயன்; கேள்வி கேட்கப்படாத போது கூடப் பேசும். — யூரிப்பிடிஸ்
காலத்தின் துணையில்லாமல் நீ செய்யும் எதையும், காக்க உதவுவதில்லை, காலம். — அனட்டோல் ஃபிரான்ஸ்
காலம், குழந்தைப் பருவத்தின் கனத்த சிறகுகள்; வயதில், ஓசையின்றி விரைந்தோடும் ஆறு. — வால்ட்டர் டெலாமேர்
நேரத்தைத் தேர்ந்தெடுப்பது, நேரத்தை மிச்சப்படுத்துவதாகும். — ஃபிரசன்ஸிஸ் பேக்கன்
நிகழ்காலத்தை நாம் கவனிப்போம். வருங்காலத்தைப் பொறுத்தவரை தருணம் வந்து வாய்க்கும் போது அதைச் சமாளிக்கும் வகையை நாம் அறிந்து கொள்வோம். — பியேர் கோர்னேய்ல்
சீராக ஒழுங்கு செய்யப்படும் நேரம், சீராக ஒழுங்கு செய்யப்பட்ட உள்ளத்திற்கு, உறுதியான அறிகுறி. — ஸர் ஐஸ்க் பிட்மன்
நாம் உறங்குகிறோம். ஆனால், வாழ்வெனும் தறி ஒரு போதும் நிற்பதில்லை. கதிரவன் மறைந்த நேரம், நெசவிலிருந்த வடிவமைப்பு, காலையில் கதிரவன் உதிக்கும் நேரத்திலும், நெசவிலிருக்கும். — ஹென்ரி வார்ட் பீச்சர்
நான் நேரத்தை விரயமாக்கினேன். இப்பொழுது நேரம் என்னை விரயமாக்குகிறது; — வில்லியம் ஷேக்ஸ்பியர்
கருத்துக்களுக்கு ஒரு வாய்ப்பு அளிக்கவே, காலம், எல்லாம் வல்ல இறைவனால் உருவாக்கப்பட்டது. — நிக்கலஸ் மர்ரே பட்லர்
காலம், தலைச்சிறந்த ஆசான். — எட்மண்ட் பர்க்
காலம் பறக்கின்றது; நம்மையும் தன்னுடன் ஈர்த்துச் செல்கிறது. நான் பேசிக் கொண்டிருக்கும் நொடிப் பொழுது, ஏற்கனவே என்னை விட்டுத் தொலைவில் சென்று விட்டது. — நிக்கோலா புவாலோ
காலமெனும் குடை இராட்டினம். இவ்வாறு தன் வஞ்சங்களை வெளிக்கொணர்கிறது. — வில்லியம் ஷேக்ஸ்பியர்
வரையறை விளக்கம் செய்ய முடியாமலும், முரண்பாடுள்ள புதிராகவும் இருப்பவற்றில் தலையாயது, காலம், கடந்த காலம் சென்று விட்டது. எதிர்காலம் வந்து சேரவில்லை. நாம் விளக்கி இனம் காண முற்படும் நேரத்திலே, நிகழ்காலம், கடந்த காலமாகிறது; மின்னல் வீச்சுப் போல், தோன்றுவதும் மறைவதும், அக்கணமே. — சார்ல்ஸ் கோல்ட்டஸ்
மனிதன் ஓயாமல் கொல்ல முயல்வதும், மனிதனை இறுதியில் கொன்று முடிப்பதும் காலம். — ஹெர்பெர்ட் ஸ்பென்ஸர்
எனக்குரிய காலம் இன்னமும் தோன்றவில்லை. சிலர், தங்கள் பிறவிக்காலம் முன்பேப் பிறக்கின்றனர். — ஃப்ரீட்ரிஷ் நீட்ஷே.
ஒவ்வொரு சகாப்தமும், கருகி அழிந்து கொண்டிருக்கும் ஒரு கனவு; அல்லது, கருவில் உருக்கொண்டு இன்னும் பிறக்காத ஒரு கனவு. — ஆர்த்தர் ஒ' ஷாக்னெஸ்ஸி
கடந்த காலத்தின் கதையைச் சொல்பவர்கள், வரலாற்று அறிஞர்கள். நிகழ்காலத்தின் கதையைச் சொல்பவர்கள், நாவலாசிரியர்கள். — எட்மண்ட், ஜூல்ஸ், தெ கோன் கூர்
வாழ்க்கையை நீ நேசிக்கிறாயா? அவ்வாறாயின், காலத்தை நீ விரயம் செய்யாதே. காலம் என்னும் கருப்பொருளைக் கொண்டு உருவாக்கப்பட்டதே, வாழ்க்கை. — பெஞ்சமின் ஃபிராங்க்ளின்
காலங்கள் மாறுவதில்லை; மனிதர்கள்தான் மாறுகின்றனர். — திபெத் நாட்டுப் பழமொழி
காலமும் வெளியும் போல், என்னைத் திகைக்க வைப்பது வேறெதுவுமில்லை. ஆயினும் அவற்றைப் பற்றி நான் அதிகம் கவலைப்படுவதில்லை. ஏனெனில், அவற்றைப் பற்றி கான் எண்ணுவதேயில்லை. — சார்ல்ஸ் லேம்ப்
செய்ய வேண்டியதை நாம் செய்வதில்லை; செய்யக் கூடாதவற்றைச் செய்து விடுகிறோம்; நல்ல காலம் நம்மைக் காத்துக் கரையேற்றுமென நம்பி, வாழ்நாளைக் நடத்துகின்றோம். — மேத்யூ ஆர்னால்ட்
எல்லாம் பறிபோன பின்பும், எதிர்காலம், மிஞ்சி நிற்கும்.
— கிரிஸ்ட்டியன் போவி
காலம் கடக்கின்றது என்று கூறுகிறாய். அந்தோ, பாபம்! காலம் நிலைக்கிறது; நாம்தான் கடக்கின்றோம். — ஆஸ்ட்டின் டாப்ஸன்
காலமெனும் மூலிகை, எல்லா நோய்களையும் குணப்படுத்த வல்லது. — பெஞ்சமின் ஃபிராங்க்ளின்
ஒவ்வொன்றிற்கும் அதற்கு உரிய நேரம் உண்டு. அந்நேரம் பார்த்துக் கவனமாய் இருக்க வேண்டும். — தாமஸ் ஃபுல்லர்
இன்றைய நாளை, இறுகப் பற்றிக் கொள், நாளைய நாளைப் பற்றி, அதிகம் நம்ப வேண்டாம். — ஹோரஸ்
காலம் என்பது, உன் வாழ்க்கையின் நாணயம். உன்னிடம் இருக்கும் ஒரே நாணயம். அதை எப்படிச் செலவு செய்ய வேண்டும் என்று முடிவு செய்யக் கூடியது, நீ மட்டுமே. உன் சார்பில் மற்றவர்கள் அதைச் செய்ய அனுமதிக்காமல், எச்சரிக்கையாய் இரு. — கார்ல் லேன்ட்பர்க்
நான் மீன் பிடிக்கச் செல்லும் நீரோடையே, காலம். — ஹென்ரி டேவிட் தோரோ
நேற்றையப் பொழுதைத் திரும்ப அழை; காலத்தை மீண்டும் வர கட்டளையிடு. — வில்லியம் ஷேக்ஸ்பியர்
காலத்துக்கு ஏவல் செய்யக் காத்திருப்போருக்கு, காலம் என்றும் துணை செய்யும். — மகாத்மா காந்தி
மற்றெல்லாக் காலங்களையும் போல், இந்தக் காலமும் மிக நல்ல காலம்தான். அதை எப்படிப் பயன்படுத்துவது என்பதை மட்டும் நாம் அறிந்து கொண்டால். — ரால்ஃப் வால்டோ எமெர்ஸன்
போன காலங்கள் இப்போதுள்ள காலங்களை விடச் சிறந்தவை, என்ற மயக்கம், எல்லாக் காலங்களிலும் ஓங்கி நின்றுள்ளது எனலாம். — ஹோரஸ் கிரீலி
வாழ்வை அளக்க வேண்டியது, சிந்தனையாலும் செயலாலும், காலத்தால் அல்ல. — ஸர் ஜான் லுப்பாக்
மாட்சிமை மிக்க ஒரு மணி நேர வாழ்வு, நற்சாட்சியம் சொல்லப் பேரில்லா யுகத்திற்குச் சமம்.
— சார்ல்ஸ் மார்டான்ட்
வாழ்க்கை, வாழ்வதில்தான் உள்ளது ஒவ்வொரு நாளின், மணியின், இழைமத்தில் உள்ளது என்ற உண்மையை, காலம் கடந்த பின் தான், நாம் உணர்கிறோம். — ஸ்டீஃபன் லீக்காக்
காலம், பெரிதும் அரிதானது, உத்தமச் செயல்களைச் செய்து காலத்தைப் பயன்படுத்தும் மனிதன், மதிப்பு மிக்கவன்; ஒரு சமயம் கடந்து விட்ட காலம், ஒரு போதும் திரும்பாது. — ஸ்ரீமத் ராஜேந்திர சூரி
செல்வம் அருமையானது; அதனினும் அருமையானது மனித வாழ்க்கை; அனைத்திலும் அருமையானது காலம். — ஏ. வி. லல்வரவ்
கண நேரச் சுணக்கமின்றி, முடிவில்லாத சுழற்சிதான், காலம். அதை வேறெந்த வகையிலும் கருத முடியாது. — லியோ டால்ஸ்டாய்
எல்லாவற்றிற்கும் உரிய காலம் ஒன்றுண்டு; விண்ணுலகத்தின் கீழ் ஒவ்வொரு குறிக்கோளுக்கும் குறித்த ஒரு காலம் ஒன்று உண்டு. — ஸாலமன் மன்னன் (விவிலியம்)
பிறக்க ஒரு காலம்; இறக்க ஒரு காலம்; நடவு செய்ய ஒரு காலம்; நட்டதைப் பிடுங்க ஒரு காலம்; கொல்ல ஒரு காலம்; குணமாக்க ஒரு காலம்; இடிக்க ஒரு காலம்; கட்ட ஒரு காலம்; அழ ஒரு காலம்; நகைக்க ஒரு காலம்; புலம்ப ஒரு காலம்; ஆடலாட ஒரு காலம். — ஸாலமன் மன்னன் (விவிலியம்)
காலம் தாழ்த்திச் செய்யும் இயல்புடையவன், மிகுதியான கால அளவில் சிறிய காரியத்தைச் செய்து முடிப்பான். அச்சிறு செயலால் விளையும் சுருங்கிய பயனால் துன்பமும் எய்துவான். — சுக்கிர நீதி
மக்கள், இறைவனால் கொடுக்கப் பெற்ற இரண்டு வரங்களை எப்போதும் மறந்து விடுகிறார்கள். ஒன்று நேரம். மற்றொன்று ஆரோக்கியம். — முகம்மது நபி
விருப்பமும் நம்பிக்கையும் தூண்டுமிடத்தே. மனிதன் உயிருக்கு அஞ்சிப் பின் வாங்கலாகாது. பாதையில் ஒரு கணம் கூட தாமதிக்கக் கூடாது. ஒரு கணம் கூடச் சோம்பியிருக்கக் கூடாது. தாமதம் செய்பவன் பாதையினின்று வலிந்து புறத்தேத் தள்ளப்படுகிறான். — பரீத் உத்தீன் சுதீதர்
கண்ணைக் கலக்கும் கண்ணிர் எதையுமே, காலமும் பொறுமையும் துடைத்து விடும். — ப்ரெட் ஹார்ட்
இரும்பு சூடாக இருக்கும் போதே அதை அடித்து உருவாக்க வேண்டும். — டிக்கன்ஸ்
காலம் தவறாமையை வெற்றிகரமாகப் பின்பற்றினால் அது பிறருக்குத் திருப்தியளிக்கும். காலம் தவறுவது என்பது உறுதியற்ற தன்மையையும், மற்றவர்களின் வசதி பற்றிய கவலையின்மையையும், குறிக்கிறபடியால் பிறருக்கு அதிருப்தி தரும். — நிக்கல்ஸன்
நேரத்தின் அருமை அந்தந்த நேரத்தில்தான் நமக்குத் தெரிய வரும். நேரம் தவறிப் போன பின்தான் அதன் அருமை தெரிய வரும். எந்தப் பொருளுக்கும் கையில் இருக்கும் போது மதிப்பிருப்பதில்லை. கைதவறிப் போன பின்பே அதற்கு அதிக மதிப்பு ஏற்படும். — லார்டு புக்மாஸ்டர்
காலம் பொன்னை விட மதிப்பு உயர்ந்தது. பொன் போனால் சம்பாதித்துக் கொள்ளலாம். காலம் போனால் மீண்டும் வராது. — ஸ்மைல்ஸ்
அற்பமான, பயனற்ற விஷயங்களில், நேரத்தைக் கூடுதலாகச் செலவழிப்பதை விட, ஓர் அறிவாளிக்குத் தகுதியற்றதும், வருத்தப்படத்தக்கதும் வேறு எதுவுமில்லை. — பிளேட்டோ
வாழ்க்கையை வளமாக்க விரும்பினால் காலத்தைக் கண நேரமும் வீணாக்கக் கூடாது. காலத்தால் செய்யப்பட்டதுதான் வாழ்க்கை. — சாண்டர்ஸ்
காலத்தை வீணாக்குவது போன்ற சுலபமான காரியமும் இல்லை. அதைத் திருத்துவது போன்ற கடினமான காரியமும் இல்லை. — ஹென்றி போர்டு
நேரத்தை வீணாக்காதே. ஏதாவது உபயோக மானவற்றிலேயே உன்னுடைய எல்லா நேரத்தையும் ஈடுபடுத்து. அனாவசியமான செய்கைகளையெல்லாம் தவிர்த்து விடு. ஏனென்றால், வாழ்க்கையின் மூலப்பொருளே நேரம்தான். — பிராங்ளின்
ஐயோ, காலம் பறந்து கொண்டிருக்கிறதே என்று உணர்கிறவனே உண்மையான ஞானி. — தாந்தே
காலத்தின் நிலையை அறிந்து கொள். காலமே உன் உயிர். அதை விணாக்குவது உன்னையே நீ கொலை செய்து கொள்வது போலாகும். — ஜேம்ஸ் ஆலன்
காலத்தில் தாமதம் வேண்டாம். தாமதங்களால் அபாயகரமான முடிவுகள் ஏற்படும். — ஷேக்ஸ்பியர்
செலவுகள் யாவற்றிலும் காலத்தை வீணாக்குதலே அதிகச் செலவும், ஊதாரித்தனமுமாகும். — தியோப்ரேஸ்டஸ்
மணிகளுக்குச் சிறகுகள் உண்டு. அவை காலத்தை ஏற்படுத்தியவரிடம் சென்று, நாம் அவற்றை எப்படி உபயோகித்தோம் என்பதைத் தெரிவிக்கும். — மில்டன்
நம் கஷ்டங்களிலெல்லாம், தாமதத்தினால் ஏற்படும் கஷ்டங்களே மிக அதிகமாயும், அதிகப் பொருள் மதிப்புள்ளவையாயும் இருக்கின்றன. — எட்வர்ட்ஸ்
ஓடுவதால் பயனில்லை; குறித்த நேரத்திற்கு முன்பே புறப்படுவதுதான் அவசியம்.
— லா பான்டெய்ஸ்
நான் எனக்குக் குறித்த நேரத்திற்குக் கால் மணி நேரம் முந்தியே சென்று விடுவது வழக்கம். அதுதான் என்னை மனிதனாக்கியுள்ளது. — நெல்ஸன்
காலம், சிலர் முழுவதையும் வீணாக்குகின்றனர். அநேகர் பெரும் பகுதியை வீணாக்குகின்றனர். ஆனால் அனைவரும் சிறிதேனும் வீணாக்காமல் இருப்பதில்லை. — மாத்யு அர்னால்டு
நாளை, நாளை என்று எதையும் தள்ளிப் போடாதே. உனக்கு நாளைய தினம் சூரியன் உதயமாகாமலேப் போகலாம். — சுரங்கீரீவ்
நாம் வீணாகக் கழிக்கும் ஒவ்வொரு வினாடியும் நம் வாழ்வில் மீண்டும் பெற முடியாப் பெரும் செல்வம் ஆகும். — கார்ல் மார்க்ஸ்
நேரத்தைக் கடவுளுக்கு அடுத்தபடியாக மதித்தல் ஒழுக்க முறையில் உயர்ந்த விதியாகும்.
— லவேட்டர்
செல்வ நிலையைப் பார்ககினும், வறுமையிலுள்ள நண்பனிடம், குறித்த நேரம் தவறாமல் நீ செல்ல வேண்டும். — சிலோ
ஒவ்வொரு தங்கச் சரிகையின் இழையில் எவ்வளவு மதிப்பு உள்ளதோ, அவ்வளவு மதிப்புள்ளது ஒவ்வொரு நிமிஷ நேரமும். — ஜான் மேஸன்
தொகுப்பு:- மு. சு. முத்துக்கமலம்.
*****
 இது முத்துக்கமலம் இணைய இதழின் படைப்பு. |
இணையத்தில் ஒரு இலக்கியப் படைப்பு! இது தமிழ் ஆர்வலர்களின் இலக்கியத் துடிப்பு!! ISSN: 2454-1990
அச்சிட
விமர்சிக்க
விருப்பத் தளமாக்க
