ஈரா யிரமாண்டாய் இங்கே இருந்திந்தப்
பாரைத் திருத்தும் குறள்

* * * * *

மனைமக்கள் வாழ்வதற்கே மாமொழி சொல்லும்
எனைவியக்கச் செய்யும் குறள்

* * * * *

என்னபொருள் பேச எழுந்தாலும் உள்ளத்தில்
முன்வந்தே நிற்கும் குறள்

* * * * *

பூதலம் முற்றும்போய்த் தேடினும் கிட்டுமோ
மேதகைமை பெற்றகுறள் போல்

* * * * *

சாதி மதமென்ற சாக்கடையில் தள்ளாமல்
நீதிமுறை காட்டும் குறள்

* * * * *

காதல் மொழிபேசிக் கண்ணின் மொழிசேர்த்து
மீதியெல்லாம் சொல்லும் குறள்

* * * * *

ஒன்பான் மணியாய் ஒளிரக் குறள்தரித்தே
நின்ற தமிழன்னை போற்று

* * * * *

முயற்சிக்கு முன்னுரிமை தந்தகுறள் காப்பேன்
வியப்பின் முகடெல்லை நின்று

* * * * *

பெண்ணின் பெருமை பேசுகின்ற சீர்திருத்தம்
அன்றே விதைத்த குறள்

* * * * *

வள்ளுவனோர் சீர்திருத்த வாதியென நன்றுணர்ந்தே
சொல்லுவதில் உண்டோ தடை

* * * * *

அரசியலில் அக்குவேறு ஆணிவேறு என்றே
கருத்துரைத்த நூல்வேறு காட்டு

இது முத்துக்கமலம் இணைய இதழின் படைப்பு.