ஓரை அறிந்து நடப்பவனை எவரும் வெற்றி கொள்ள இயலாது என்பது சித்தர்கள் வாக்கு. ஒன்பது கிரகங்களில் ஏழு கிரகங்களுக்கு மட்டுமே ஓரை உண்டு. ராகு, கேது, சாயா கிரகங்களுக்குச் சுற்றுப்பாதை இல்லாத காரணத்தால் அவைகளுக்கு ஓரை இல்லை.

பூமத்திய ரேகை, தீர்க்க ரேகை ஆகியவற்றை நமது முன்னோர்கள் எப்படி உருவாக்கினார்களோ, அதேபோல்தான் ஓரைகளும் உருவாக்கப்பட்டன. சூரியனின் சுற்றுப்பாதை, சூரியனுக்கு அருகில் இருக்கக் கூடியக் கிரகங்கள், தொலைவில் இருக்கக் கூடியக் கிரகங்கள், அதனுடைய ஈர்ப்பு சக்தி, அதன் ஒளிக்கற்றைகள் பூமியை அடைவதற்கு எடுத்துக் கொள்ளும் கால நேரம் இவற்றையெல்லாம் அடிப்படையாக வைத்துத்தான் நமது முன்னோர்கள் ஓரைகளைக் கணக்கிட்டுள்ளனர். சூரியன் மற்றும் அதன் அருகே அல்லது தொலைவில் உள்ள கிரகங்களின் அமைப்பைக் கொண்டு வானவியல் அறிஞர்கள் ஓரைகளை உருவாக்கினர். இதன்படி வாரத்தின் முதல் நாளான ஞாயிறன்று முதல் ஓரையைச் சூரியனுக்கு அளித்தனர். அதற்கு அடுத்து சுக்கிரன், அதற்கு அடுத்து புதன், நான்காவது சந்திரன், ஐந்தாவது சனி, ஆறாவது குரு, ஏழாவது செவ்வாய் என ஓரைகளை வரிசைப்படுத்தினர்.

இதற்குச் சுற்றுப்பாதை, கிரகங்களின் கதிர் வீச்சுதான் காரணம். இவற்றில் சுக்கிரன் ஓரை, புதன் ஓரை, குரு ஓரை ஆகிய மூன்றும் நல்ல ஓரைகள் எனப்படுகிறது. எந்த ஒரு நல்ல செயல்கள் செய்ய வேண்டுமென்றாலும், இந்த ஓரைகளில் தொடங்கலாம். ஓரை என்பது சூரிய உதயத்தில் இருந்து கணக்கிடப்படுகிறது. அந்த நாளின் கிழமை, அதன் முதல் ஓரையாக கொள்ளப்படுகிறது. உதாரணமாக ஞாயிறு காலை முதல் ஒரு மணி நேரம் (6-7 மணி) சூரியனின் ஓரை. இதையடுத்து 7-8 மணி வரை சுக்கிரன் ஓரை, 8-9 மணி வரை புதன் ஓரை, 9-10 வரை சந்திரன் ஓரை, 10-11 வரை சனி ஓரை, 11-12 மணி வரை குரு ஓரை, 12-1 மணி வரை செவ்வாய் ஓரை. இதையடுத்து மீண்டும் சூரியன் ஓரை துவங்கும். இதேபோல் செவ்வாய்க்கிழமை என்றால் அன்று காலை 6 முதல் 7 மணி வரை செவ்வாய் ஒரை, புதன் கிழமை என்றால் காலை 6-7 மணி வரை புதன் ஓரை, அதன் பின் ஒவ்வொரு மணி நேரமும் மேலே கூறப்பட்டுள்ள வரிசைப்படி ஓரை கணக்கிடப்படுகிறது.

பொதுவாக, காலை 6 மணி என்பதனை சராசரி சூரிய உதய நேரமாகக் கொண்டுதான் ஓரைகள் கணக்கிடப்படுகின்றன. 6 – 1- 8 – 3 இந்த வரிசையை ஞாபகம் வைத்துக்கொள்ளுங்கள். காலை 6 மணிக்கு வரும் ஓரை , திரும்பவும் மதியம் 1 மணிக்கும், இரவு 8 மணிக்கும் , பின்பு அதிகாலை 3 மணிக்கும் வரும்.


சூரிய ஓரை

சூரியன் ஓரையில் அரசு தொடர்பான செயல்கள், வழக்கு தொடர்பான விடயங்கள் மேற்கொள்ள சிறப்பானதாக இருக்கும். மேலதிகாரிகளைச் சந்தித்தல், பெரியவர்களை சந்திக்கும் செயல்களைச் செய்யலாம். இந்த நேரத்தில் புதிதாக எந்த அலுவல்களையோ உடன்பாடுகளையோ செய்வது நல்லதல்ல. சுபகாரியங்கள் செய்யயவும் இந்த ஓரை ஏற்றதல்ல. இந்த ஓரை நடக்கும் நேரத்தில் பொருள் ஏதேனும் காணாமல் போனால் கிடைப்பது அரிது. அப்படிக் கிடைக்குமானால் மிகவும் தாமதித்து அப்பொருளின் நினைவு மறைந்த பின் கிழக்கு திசையில் கிடைக்கலாம். இந்த நேரத்தில் உயில் சாசனம் எழுதலாம்.

சுக்கிர ஓரை

அனைத்துச் சுப செயல்களுக்கும் வீடு, நிலம், வண்டி வாகனம், ஆடை ஆபரணம் வாங்கவும் மிகவும் ஏற்றது. குறிப்பாக, பெண்கள் தொடர்பு கொண்ட அனைத்துச் செயல்களிலும் நன்மை ஏற்படும். விவசாயத்திற்கும், பயணங்கள் செய்வதற்கும் இந்த ஓரை நல்லது. இந்த ஓரையில் காணாமல் போன பொருள் மேற்குத் திசையிலிருந்து சில நாட்களில் கிடைக்கும்.

புதன் ஓரை

கல்வி மற்றும் எழுத்துத் தொடர்பான வேலை தொடங்குவதற்கும் ஆலோசிப்பதற்கும் ஏற்ற நேரம். சுப செயல்கள் செய்யலாம். நேர்மையான விடயங்களைப் பற்றிப் பேசவும் முடிவெடுக்கவும் இந்த நேரம் உகந்தது. பயணங்கள் மேற்கொள்ளவும் செய்யலாம். இந்த ஓரையில் காணாமல் போகும் பொருள் விரைவில் அதிகச் சிரமமின்றி கிடைத்து விடும்.

சந்திர ஓரை

வளர்பிறை காலத்தில் சந்திரன் ஓரையும் நல்ல ஓரையாகவேக் கருதப்படுகிறது. இந்த ஓரைகளில் திருமணம், சீமந்தம், குழந்தைகளுக்கு மொட்டையடித்து காது குத்துதல், பெண் பார்ப்பது, பதவியேற்பது, வேலைக்கு விண்ணப்பிப்பது, வங்கி கணக்கு துவங்குதல் ஆகியற்றைச் செய்யலாம். இந்த ஓரை காலத்தில் அனைத்துச் சுப செயல்களையும் செய்யலாம். குறிப்பாக, பெண்கள் தொடர்பு கொண்ட செயல்களுக்கு மிகவும் ஏற்றது. வியாபாரம் அல்லது புனிதப் பயணம் செய்ய ஏற்றது. பிறரைச் சந்தித்துப் பேசவும் செய்யலாம். இந்த ஓரையில் எந்தப்பொருள் காணாமல் போனாலும் கிடைக்காது.

சனி ஓரை

இதில் சனி ஓரை ஒரு சில காரியங்களுக்கு நல்ல பலனைத் தரும். கடனை அடைப்பதற்கு ஏற்ற ஓரையாகச் சனி ஓரை கருதப்படுகிறது. உதாரணமாக சனி ஓரையில் ஒருவர் தனது கடனை அடைத்தால், அவர் மீண்டும் கடன் வாங்குவதற்கான சூழல் ஏற்படாது என ஜோதிட நூல்கள் கூறுகின்றன. இதேபோல் பழைய பாக்கி, கணக்குகளை தீர்ப்பது, ஊழ்வினை (பூர்வ ஜென்மப் பாவம்) தீர்ப்பது, நடைபயணம் துவங்குவது, மரக்கன்று நடுதல், விருட்சங்கள் அமைத்தல், அணைக்கட்டு நிர்மாணிக்கும் பணிகளைத் துவக்குவது போன்றவற்றிற்குச் சனி ஓரை சிறப்பானது.


குரு ஓரை

எல்லாவகை சுப செயல்களுக்கும் மிகவும் ஏற்ற நேரம். வியாபாரம், விவசாயம் செய்ய நல்லது. ஆடை ஆபரணப் பொருள்கள் வாங்கவும், வீடு மனை வாங்கவோ, விற்கவோ ஏற்றது. எதுவும் சட்டத்திற்கும் நியாயத்திற்கும் புறம்பானதல்ல. கப்பற்பயணம் செய்வதற்கு இந்த ஓரை ஏற்றது அல்ல. இந்த நேரத்தில் காணாமல் போனப் பொருட்களைப் பற்றி வெளியில் சொன்னாலே போதும். உட னே கிடைத்து விடும்.

செவ்வாய் ஓரை

செவ்வாய் ஓரை நிலம் வாங்குவது, விற்பது, ஒப்பந்தம் செய்வது, சகோதரப் பிரச்சனைகள், சொத்துகளைப் பிரித்தல், உயில் எழுதுவது, ரத்ததானம், உறுப்பு தானம், மருத்துவ உதவிகள் செய்வது இவற்றையெல்லாம் மேற்கொள்ளலாம். இந்த ஓரையில் ஆயுதப் பிரயோகத்தை துவங்கினால் சக்தி வாய்ந்ததாக இருக்கும்.

செவ்வாய் அழிவுக்கு உரிய கிரகம். அதிகாரத்தை பிரயோகம் செய்து ஒன்றை கட்டுக்குள் கொண்டு வரக் கூடியது செவ்வாய். எந்தவித நல்ல செயல்களும் செய்ய உகந்த நேரமல்ல. இருப்பினும் தெய்வீகம் தொடர்பான செயல்களையோ, சண்டை சச்சரவுக்கான செயல்களையோப் பற்றிப் பேசலாம். இருப்பினும், இந்த ஓரையைத் தவிர்ப்பது நல்லது. இந்த ஓரை நேரத்தில் பொருள்கள் காணாமல் போனால் உடனே முயன்றால் தெற்கு திசையில் கிடைத்துவிடும். தாமதித்தால் கிடைக்காது.

குறிப்பு:

குரு ஓரை சுப ஓரை என்றாலும், வெள்ளிக்கிழமையில் குரு ஓரையைத் தேர்ந்தெடுக்க வேண்டாம்.

இது முத்துக்கமலம் இணைய இதழின் படைப்பு.