குளிகன் என்பது பற்றி அகராதிகள் தரும் செய்தி

குளிகன் - என்பது கரந்துறை கோட்களில் ஒன்று.

குளிகை காலம் - சில காரியாதிகளுக்கு ஆகாது என்று விலக்கப்பட்ட நேரம். அது ஒவ்வொரு கிழமையிலும் வரும் மூன்றே முக்கால் நாழிகை கொண்ட கால அளவு. இதில் பகல் குளிகை காலம் என்றும். இராக்குளிகை காலம் என்றும் இரண்டு வகைப்படும்.

பகல் குளிகை காலத்தின் விவரம் ஞாயிற்றில் இருபத்து இரண்டரைக்கு மேலும், திங்களில் பதினெட்டே முக்காலுக்கு மேலும், செவ்வாயில் பதினைந்துக்கு மேலும், புதனில் பதினொன்றே காலுக்கு மேலும் வியாழனில் ஏழரைக்கு மேலும் வெள்ளியில் மூன்றே முக்காலுக்கு மேலும், சனியில் சூரிய உதயத்திற்கு மேலும் வரும். முன் கூறியபடி மூன்றே முக்கால் நாழிகை கொண்ட நேரம்.

உதாரணம்: ஞாயிறு முகூர்த்தம் ஏழாகும் நன்மதிக்கு ஆறாகும். செவ்வாய்க்கு ஐந்தாகும், புந்திக்கு இரண்டாகும், பொன் மூன்றாம், தூய நல்புகர்க்கு இரண்டாம்; உசனன் தனக்கு ஒன்றாகும், ஆயவியம் முகூர்த்தத்தோட அற்றிடுங் குளிகன் எல்லில் - என்னும் செய்யுளால் அறிக.

ஞாயிறு ஏழரைக்கு மேலும் திங்களில் மூன்றே முக்காலுக்கு மேலும், செவ்வாயில் சூரிய அஸ்தமனத்தின் மேலும், புதனில் இருபத்து இரண்டரைக்கு மேலும், வியாழனில் பதினெட்டே முக்காலுக்கு மேலும், வெள்ளியில் பதினைந்துக்கு மேலும், சனியில் பதினொன்றே காலுக்கு மேலும், முன் கூறியபடி வரும் மூன்றே முக்கால் நாழிகை கொண்ட நேரம்.

உதாரணம்:

“கதிரவன் தனக்கு மூன்றாகும். கவின் மதிக்கு இரண்டாகும்.
சுதிர் பெருஞ் செவ்வாய்க்கு ஒன்றாகும், சாற்றிய புதனுக்கு ஏழாம்.
மதிவளர் பொன்னுக்கு ஆறாம். மன் புகருக்கு ஐந்தாம். நான்கு
கதிர் மகற்கா முகூர்த்தங் காட்டிய பகல் போற் கொள்ளே”

என்றும் குறிப்பிடுகின்றது.

இராசி மண்டலத்தில் பூமிக்கு நேராகத் தினமும் பகல் இரவு நேரங்களில் குறிப்பிட்ட நேரத்தில் குளிகன் தோன்றி மறைந்து விடுவான். இவன் ஒவ்வொரு நாளும் உதயம் நான்கு நாழிகை முன்னதாக வருவான்.

கிழமை	பகல் உதயத்திற்குமேல்	இரவு அஸ்தமனத்திற்கு மேல்
ஞாயிறு	26 நாழிகை	10 நாழிகை
திங்கள்	22 நாழிகை	6 நாழிகை
செவ்வாய்	18 நாழிகை	12 நாழிகை
புதன்	14 நாழிகை	26 நாழிகை
வியாழன்	10 நாழிகை	22 நாழிகை
வெள்ளி	6 நாழிகை	18 நாழிகை
சனி	2 நாழிகை	14 நாழிகை

என்றும் குறிப்பிடுகின்றது. (ரிசிபானந்தர், அதிர்ஷ்ட களஞ்சியம், பக். 76 - 77)

சாதக அலங்காரம் குளிகன் இருக்கும் இராசிக்குத் திரிகோண ராசியிலாவது, அவன் இருக்கும் அம்சத்திலாவது, மக்கள் பிறப்பார்கள் என்று குறிப்பிடுகின்றது. (நடராசர், சாதக அலங்காரம், ப.129) குளிகன் இருக்கும் இராசிநாதன் கேந்திர திரிகோணங்களில் இருந்தால் அந்தச் சாதகன் பெருத்த செல்வத்தையும், தனதான்ய விருத்தியையும், சந்தான நலனையும் உடையவனாக வாழ்வான் என்று குறிப்பிடுகின்றது. (ரிசிபானந்தர், அதிர்ஷ்ட களஞ்சியம், ப.131)

குளிகன் எந்தக் கிரகத்துடன் தொடர்பு பெற்றாலும் அந்தக் கிரகங்களுக்குத் தோடத்தை உண்டாக்குவான். எமகண்டன் எதிரிடையாக நன்மையைத் தருவான். தோடத்தை உண்டாக்குவதில் குளிகனும், சுபத்தை அளிப்பதில் எமகண்டனும் வலிமை பெற்றவர்கள். வேதனை, கெடுதலை உண்டாக்குவதில் அர்த்தபிரகரன், காலன் ஆகியவர்கள் குளிகனில் பாதிபலம் உடையவர்கள். (ரிசிபானந்தர், அதிர்ஷ்ட களஞ்சியம், ப.170)

குளிகன் சூரியனுடன் கூடில் தகப்பனுக்கும், சந்திரனுடன் கூடில் தாயாருக்கும், செவ்வாயுடன் கூடில் சகோதரத்திற்கும் அழிவு உண்டாகும். புதனோடு கூடில் உன்மத்தம் - மயக்கம் பிடித்தவனாவான். தாய் மாமனுக்கு அழிவு உண்டாகும். குருவுடன் கூடில் சந்ததிக்கு குற்றமுண்டாகும். சுக்கிரனுடன் கூடில் களத்திர தோடம் உண்டாகும். இழிந்த பெண்களின் சேர்க்கை உண்டு. சனியுடன் இருப்பின் குட்ட நோய் உண்டு அல்லது அற்ப ஆயுள் உண்டு. இராகுவுடன் இருப்பின் விட நோய் உள்ளவன். கேதுவுடன் இருப்பின் நெருப்பினில் துன்பப்படுவான். குளிகன் எந்தக் கிரகத்துடன் தொடர்பு பெற்றாலும் அக்கிரக காரகங்கள் யாவற்றிற்கும், தோடத்தை உண்டாக்குவான். எமகண்டன் அப்படிக் கூடினால் நன்மையைத் தருவான். தோடத்தை உண்டாக்கும் விசயத்தில் குளிகனும், சுபத்தை உண்டாக்கும் விசயத்தில் எமகண்டனும் பலம் உடையவர்கள். கவலையைக் கொடுக்கும் விசயத்தில் அர்த்தப்பிரகரன், காலன் ஆகிய இவர்கள் பாதி பலம் உடையவர்கள் ஆவார் என்றும் குறிப்பிடுகின்றது. (நடராசர், சாதக அலங்காரம், ப.130)

இலக்னத்திற்கு நான்காமிடத்தில் கேதுவும், குளிகனும் சேர்ந்திருக்கப் பிறந்தவர் குடியிருக்க வீடு இன்றி தவிப்பர். தாயாருக்கு கண்டம் ஏற்படும். எந்த வித நன்மையும் பெற முடியாது. இது நாக தோடமாகும். பரிகாரம் செய்ய நன்மை பெறலாம் என்றும் குறிப்பிடுகின்றது. (ரிசிபானந்தர், அதிர்ஷ்ட களஞ்சியம், ப.148) குளிகனின் தன்மை குறித்து குளிகன் எந்த இராசியில் இருந்தாலும் அல்லது எந்தக் கிரகத்துடன் சேர்ந்திருந்தாலும் கெடுதலையேச் செய்வான். ஆனால் குருவின் சேர்க்கையோ, பார்வையோ பெற்றிருப்பின் தோடம் நிவர்த்தி ஆகும் என்றும் குறிப்பிடுகின்றது. (ரிசிபானந்தர், அதிர்ஷ்ட களஞ்சியம், ப.83)

குளிகன் நின்ற ராசிநாதன் கேந்திரம் அல்லது திரிகோணம் ஒன்றில் இருந்தால் அந்த ஜாதகர் பெரும் செல்வத்திற்கு அதிபதியாகவும், நவதான்ய விருத்தியும், புத்திர பாக்கியமும் பெற்று சிறப்புடன் வாழ்வர் என்றும் குறிப்பிடுகின்றது. (ரிசிபானந்தர், அதிர்ஷ்ட களஞ்சியம், ப.165)

குளிகன் இலக்னத்தில் இருந்தால் அந்தச் சாதகன் களவு செய்பவனும், கெட்ட குணமுள்ளவனும், வணக்கம் இல்லாதவனும், வேத சாஸ்திரார்த்த உணர்ச்சியில்லாதவனும், மெலிந்த தேகமுடையவனும், கண்கள் விகாரமுடையவனும், மூடனும், அதிக சந்ததி இல்லாதவனும், அதிக உணவு உண்பவனும், செல்வம் இல்லாதவனும், விசயங்களை அறிவதில் விருப்பமுடையவனும், தொழில் உபாயம் இல்லாதவனும், சூரம் - தனம் - வித்வத்துவம் இல்லாதவனும், எப்போதும் கலகமும், கோபமும் உடையவனும் ஆவான் என்றும் குறிப்பிடுகின்றது. (நடராசர், சாதக அலங்காரம், ப.128) குளிகன் தனித்து இருந்தால் உடலில் காயம் ஏற்படுதல், பல வித நோய்களுக்கு ஆளாகுதல் கூடும். உயர்ந்த பதவியும், வாகன யோகமும் பெற்று வசதியுடன் வாழ்வும் வாய்ப்பு உண்டாகும். அத்துடன் துன்பங்களும் இருக்கும் என்றும் குறிப்பிடுகின்றது. (ரிசிபானந்தர், அதிர்ஷ்ட களஞ்சியம், ப.94)

சாதக அலங்காரம் எனும் நுால் இரண்டாமிடமான தனஸ்தானத்தில் குளிகன் இருந்தால் அந்தச் சாதகன் திறமையாகப் பேச அறியாதவனும், கலகம் செய்பவனும், தனதான்ய செல்வம் இல்லாதவனும், வெளி தேசத்தில் வசிப்பவனும், சொல்லிலும், வழக்கிலும் சூட்சமமான அர்த்தத்தை அறியாதவனுமாவான். (நடராசர், சாதக அலங்காரம், ப.128) கல்வியறிவு பெறுவது கடினம். பிடிவாத குணம் கொண்டவராக இருப்பர். பொருளாதாரத் துறையில் சீரழிவு இருக்கும். சண்டைசச்சரவு புரிபவராக இருப்பர். வெளியூரில் வாசம் செய்பவர். கலகப் பிரியன். கண்களில் ஊனம் அல்லது நோய் ஏற்படக் கூடும் என்றும் குறிப்பிடுகின்றது. (ரிசிபானந்தர், அதிர்ஷ்ட களஞ்சியம், ப.97)

சாதக அலங்காரம், மூன்றாமிடமான தைரிய ஸ்தானத்தில் குளிகன் இருந்தால் அந்தச் சாதகன் நான் எனது என்னும் அகங்காரம் மதம் இவைகளை உடையவனும், கோபத்தினால் பொருள் சம்பாதிக்கப்பட்டவனும், திறமையாளனும், சோகமில்லாதவனும், சகோதர அழிவும் உடையவனும் ஆவான் என்றும் குறிப்பிடுகின்றது.(நடராசர், சாதக அலங்காரம், ப.129) அஞ்சா நெஞ்சம், முன்கோபக்காரர், சகோதரர்கள் இருப்பின் அழிவு ஏற்படல் அல்லது அவர்களை விட்டுப்பிரிதல், கடன் வாங்குதல், வாக்கு வன்மை மிகுதல், விரதங்களை மேற்கொள்பவர் என்றும் குறிப்பிடுகின்றது. (ரிசிபானந்தர், அதிர்ஷ்ட களஞ்சியம், ப.100)