1. முன்னால் போனால் எவரையும் காட்டும்;
முதுகை உரித்தால் எதையுமே காட்டாது - அது என்ன?

2. ஒரே குளத்தில் ஒரே மீன்.
வெளியே எட்டிப் பார்த்தாலும்
வேறு குளம் போகாது - அது என்ன?

3. வேகமாய்ப் போகிற அம்மணிக்கு,
விழுந்த கைக்குட்டையை எடுக்க நேரமில்லை. - அது என்ன?

4. என் பெயரைக் கேட்பவர் பலர்.
என்னைப் போட்டு மிதிப்பவரும் பலர்.
நான் யார் பெயரையும் கேட்பதுமில்லை;
எவரையும் போட்டு மிதிப்பதும் இல்லை. - நான் யார்?

5. வெள்ளை வெள்ளைச் சீமாட்டிக்கு
விளக்கு எரியுது தலைக்கு மேலே. - யார் இவள்?

6. காலையில் கடை திறக்கும்
இரவு வந்தால் இறுக மூடும்.- என்ன இது?

7. கஷ்டப்பட்டு நூல் நூற்பார்;
கட்டிக் கொள்ளத் துணியில்லை. - யார் இவர்?

8. உயிரில்லாத நீதிபதி
ஒழுங்காய்த் தீர்ப்பு வழங்குவார். - யார் இவர்?

9. மேலே செல்லும்; விமானம் அல்ல.
தண்ணீர் உண்டு; நதியும் அல்ல. - என்ன இது?

10. அங்குல மாட்டுக்கு
அரைமைல் வால். - என்ன இது?

1. கண்ணாடி

2. நாக்கு

3. பறவை இறகு

4. தெரு

5. மெழுகுவர்த்தி

6. கண்கள்

7. சிலந்தி

8. தராசு

9. மேகம்

10. ஊசி நூல்

இது முத்துக்கமலம் இணைய இதழின் படைப்பு.