கலைத்துறை மற்றும் அறிவியல் துறைகளை உள்ளடக்கிய அறிவுசார் துறையில் கலைச்சொற்களின் பங்கு இன்றியமையாத ஒன்றாக அமையப்பெற்றுள்ளது. மிகப் பொருத்தமான கலைச்சொற்களை அடிப்படையாகக் கொண்டுதான் எந்தவொரு தகவல் தொடர்பும் முழுமை பெறும். கருத்துத் தொடர்புகளை அடியொற்றி அறிவுப் பகுதியை வரிசைப்படுத்தக் கலைச்சொற்கள் உதவுகின்றன. பொது அறிவியல் கருத்துகளின் தொடர்புகள் மட்டுமின்றி, அறிவியல் துறைகள் ஒவ்வொன்றிற்கும் உரிய கருத்துகளின் தொடர்புகளையும் வரிசைப்படுத்தலாம். ஒவ்வொரு துறைகளில் ஏற்படும் முன்னேற்றம் புதிய கருத்துகளை உருவாக்கும். இப் புதிய கருத்துகளும் கலைச்சொற்களும் ஏற்கனவே உள்ள கருத்துத் தொகுதியோடு ஒத்தமைவு உடையவனாக இருத்தல் வேண்டும். கருத்துகளைக் குறிக்கும் கலைச்சொற்களை உருவாக்கும் பணியும் அறிவியல் மற்றும் வரைவிலக்கணம் சார்ந்தனவாக அமையும். தமிழில் கடந்த 100 ஆண்டுகளில் உருவான கலைச்சொற்களும் அவைகளில் நிலைபேறாக்கம் பெற்ற சொற்களும் நிலைபேறாக்கம் பெற்றிடாத சொற்களும் இக் கட்டுரை வாயிலாக வரலாற்று நோக்கில் பகுப்பாய்வு செய்யப்படுகின்றது. நிலை பேறாக்கம் பெற்றமைக்கான காரணங்களும் நிலைபேறாக்கம் பெற்றிடாமைக்கான காரணங்களும் இக் கட்டுரையில் விளக்கப்பெறுகின்றது.

தமிழகத்தில் Collector என்னும் ஆங்கிலச் சொல்லுக்கு முதலில் வழங்கப்பெற்ற சொல்லாக்கம் வரி வசூல் செய்பவர் என்பதாகும். பின்னர்த் தண்டல்நாயகர் என்றும் தண்டல் நாயகம் என்ற சொல் உருவானது. District Collector என்னும் புதிய ஆங்கிலச் சொல்லாக்கம் உருவானது. தமிழில் மாவட்ட ஆட்சித் தலைவர் என்னும் புதிய கலைச்சொல் உடனே ஏற்படுத்தப்பட்டது. அப்போது மின் வாரியத்தில் Bill Collector என்னும் பணியிடம் இருந்தது. பின்னர்ப் பில் கலெக்டர் பணியிடம் ஒழிக்கப்பட்டது. அதன் பின்னர் District Collectorஇல் இருந்த District நீக்கம் செய்யப்பெற்று Collector மட்டும் இருந்தது. தமிழில் ‘மாவட்ட’ என்பது நீக்கம் செய்யப்பெற்று ஆட்சித் தலைவர் என்றழைக்கப்பட்டது. இந்நிலையில் செயலாளர், பொருளாளர் முறையே செயலர், பொருளர் என்று சுருக்கி அழைக்கப்பட்ட நிலையில் ஆட்சித் தலைவர் என்பது ஆட்சியர் என்று சுருக்கம் செறிவும் பெற்றது. தற்போது Collector என்பதற்கு ஆட்சியர் என்ற சொல் தமிழில் தற்போது நிலைபேறாக்கம் பெற்றுள்ளது. இதற்குச் சுமார் 80 ஆண்டுகாலம் ஆனது என்பது குறிப்பிடத்தகுந்தது. Collector என்ற சொல்லுக்கு ஒவ்வொரு காலக்கட்டத்திலும் ஒவ்வொரு சொல் நிலைபேறாக்கம் பெற்றுப் பின்னர் மறு நிலைபேறாக்கம் பெற்றுமை குறிப்பிடத்தக்கதாகும்.

தமிழர்களின் வாழ்வில் காலையில் காபி, டீ குடிக்கும் வழக்கம் ஆங்கிலேயர் காலத்திலிருந்து தொடங்கிவிட்டது. டீ என்பதற்குத் தேயிலையிலிருந்து வடித்து எடுக்கப்படும் நீர் என்ற அடிப்படையில் தேயிலைநீர் என்பது பின்னர்ச் சுருக்கம் பெற்றுத் தேநீர் என்று நிலைபேறாக்கம் பெற்றுவிட்டது. தேநீர் என்பதில் தேன் போன்ற நீர் என்ற பொருளைத் தந்தாலும் டீ என்பதற்கான கலைச்சொல்லாகத் தேநீர் நிலைபேறாக்கம் பெற்றுத் தேநீரகம், தேநீர் கடை என்று விளம்பரப் பலகையில் இடம்பெறும் அளவிற்கு இச் சொல் நிலைபேறாக்கம் பெற்றுள்ளது. இதே காலக் கட்டத்தில் காபியும் தமிழர்களிடம் அறிமுகமாகி இருந்தது. காபி என்பதன் வேர் சொல் Calf. விலங்குகளின் கால் குளம்பு போன்று காபி கொட்டைகள் இருப்பதால் Calf இலிருந்து காபி என்ற சொல் உருவானது என்ற வரலாற்றை அறிந்த தமிழறிஞர்கள் காபி என்பது குளம்பி என்ற சொல்லை உருவாக்கி மக்கள் புழக்கத்தில் விட்டனர். மக்களிடம் இச் சொல் நிலைபேறாக்கம் பெறவில்லை. காபி கொட்டை வறுத்து அரைக்கப் பெற்றுப் பின்னர்க் கொதிநீரில் இடப்பட்டுப் பின்னர் வடித்தெடுக்கப்பட்டுப் பாலில் கலக்கப்படுவதால் காபி என்பதற்குப் பயன்பாட்டு அடிப்படையில் கொட்டைவடிநீர் என்னும் சொல் உருவானது. கொட்டை என்பது ஆண்களின் சிறுநீர் உறுப்பிற்குக் கீழே இருக்கும் விரையைக் ‘கொட்டை’ என்று அழைக்கும் வழக்கம் ஏற்கனவே இருந்தமையால் காபிக்குக் கொட்டை வடிநீர் என்ற சொல் நிலைபேறாக்கம் அடையவில்லை. 90களுக்குப் பின் தினமணி வாசகர் திருச்சி தி. அன்பழகன் மணநீர் என்னும் புதிய சொல்லை உருவாக்கி அவர் நடத்திய கரவொலி என்றும் சிற்றிதழ் வழியாக மக்கள் புழக்கத்தில் விட்டார். மணநீர் நிலைபேறாக்கம் அடையவில்லை. தி. அன்பழகன் சர்பத் என்பதற்குச் சுவைநீர் என்னும் சொல்லாக்கத்தை உருவாக்கினார். அது நிலைபேறாக்கம் பெற்றுள்ளது. காபி என்னும் ஆங்கிலச் சொல்லுக்கு இதுவரை ஒரு புதிய தமிழ்க் கலைச்சொல் நிலைபேறாக்கம் பெறாத நிலையே நீடித்து வருகின்றது.

Bi-Cycle என்பதற்குத் தூவிச் சக்கர வண்டி என்ற சொல்லாக்கம் பயன்பாட்டு வந்தது. சொல்லாக்கம் சுருக்கமாக இல்லை என்ற குரல் எழுந்தது. பின்னர் ஈருருளி என்னும் சுருக்கமான சொல் தமிழறிஞர் பாவணாரால் உருவாக்கப்பட்டது. இச் சொல் மிகப் பொருத்தமுடையதாக இருந்தாலும் செயல்பாட்டின் அடிப்படையில் மக்கள் மிதிவண்டி என்றே அழைத்தார்கள். மிதிவண்டி, மிதிவண்டி நிலையம் என்றும் சொல் சேர்க்கைகள் ஏற்பட்டு நிலைபேறாக்கம் பெற்றது. இதே வேளையில் கார் என்பதற்கு மகிழ்வுந்து, ஸ்கூட்டர் என்பதற்குத் துள்ளுந்து, லாரி என்பதற்குச் சரக்குந்து, பஸ் என்பதற்குப் பேருந்து என்னும் சொற்கள் ஆக்கம் செய்யப்பெற்றன. இதில் பஸ் என்பதற்கு மட்டுமே பேருந்து என்ற சொல் நிலைபேறாக்கம் பெற்றது. மற்ற உந்துகளுக்குத் தமிழ் வழியில் சொற்கள் நிலைபேறாக்கம் பெறவில்லை.

அண்மைக் காலத்தில் மினி பஸ் போக்குவரத்தில் இணைந்துள்ளது. இதனைத் தொடக்கத்தில் மினி பஸ் என்றே ஒலிப்பெயர்ப்பு முறையில் அழைத்தனர். காலம் செல்ல…செல்ல… புதிய ஆக்கம் செய்து சிற்றுந்து என்று அழைத்தனர். சிற்றுந்து என்ற சொல்லைத் தி இந்து தமிழ் நாளோடு பயன்படுத்தியது. “Mini Bus என்பதற்குச் சிற்றுந்து என்பது தவறான பயன்படாகும். பஸ் என்பது பெரிய உந்து என்ற பொருளில் அழைக்கப்படுவதாகப் பொருள்கொள்ளப்பட்டுள்ளது. பேர் என்பது மக்களைக் குறிக்கும் சொல். (எ-டு. எத்தனை பேர்) மக்கள் செல்வதால் அது பேருந்து என்று அழைக்கப்பட்டது. இந்நிலையில் மினி பஸ் என்பதில் மினி என்பதற்குச் சிறு என்றும் பஸ் என்பதற்கு ஏற்கனவே நிலைபேறாக்கம் பெற்றுவிட்ட பேருந்து என்ற சொல்லையும் இணைத்துச் சிறு பேருந்து என்று அழைப்பதே பொருத்தமுடையாதாக இருக்கும்” என இக் கட்டுரையாளரால் தி இந்து நாளேட்டிற்கு விளக்கம் எழுதப்பட்டுள்ளது. ஆனால் சென்னை, மயிலாடுதுறை, திருச்சிராப்பள்ளி போன்ற இடங்களில் சிற்றுந்து என்ற சொல்லே நிலைபேறாக்கம் பெற்றுள்ளமையைக் காணமுடிகின்றது.

Cellular Phone 80களின் இறுதியில் தமிழர்களுக்கு அறிமுகம் ஆனது. அதனை முதலில் ஒலிபெயர்ப்பு அடிப்படையில் தமிழில் செல்லுலார் போன் என்றே அழைக்கப்பட்டது. ஏற்கனவே இல்லங்களில் இருந்த போன் என்ற கருவிக்குத் தொலைபேசி என்ற கலைச்சொல் நிலைபேறாக்கம் பெற்றிருந்தது. ஆங்கிலத்தில் வழங்கப்பெற்ற Cellular Phone - Cell Phone என்று சுருக்கி அழைக்கப்பட்டது. தமிழில் உடனே செல்பேசி என்று அழைக்கப்பட்டது. செல்லுகின்ற இடத்திலிருந்து இந்தப் போன் வழியாகப் பேசமுடிவதால் செல்லிடப் பேசி என்று அழைக்கப்பட்டது. கையில் வைத்துப் பேசுவதால் கைப்பேசி என்று அழைக்கப்பட்டது என்றாலும் ஒருவகையில் நிலைபேறாக்கத்தை இச் சொல் பெற்றது. Cell Phone என்பதற்குக் கைபேசி சரியான கலைச்சொல் இல்லை என்பதால் செல்போன்கள் Micro Waves மூலம் செயல்படுகின்றது என்ற அடிப்படையில் நுண்அலைபேசி என்ற ஒரு புதிய சொல் உருவாக்கப்பட்டது. அதில் இருந்த நுண் என்ற சொல் தேவையற்ற சொல்லாகக் கருதப்பெற்றுத் தற்போது அலைபேசி என்றழைக்கப் படுகின்றது. இச் சொல் தற்போதைக்கு நிலைபேறாக்கம் பெற்ற சொல்லாக உள்ளது. கைப்பேசி என்ற சொல்லும் மக்கள் புழக்கத்தில் உள்ளது.

Ph.D. என்னும் உயர்கல்வியின் ஆய்வு சார்ந்த பட்டப்படிப்பின் விரிவாக்கம் Doctor of Philosophy என்பதாகும். தத்துவம், கொள்கையைக் கண்டுபிடித்தவர் என்ற பொருளில் மேற்சொன்ன சொல் வழங்கப்பட்டு வந்தது. இலங்கையில் தமிழர்களின் வாழ்நிலப் பகுதிகளில் ஒன்றான யாழ்பாணத்தில் உள்ள யாழ் பல்கலைக்கழகத்தில் Doctor of Philosophy என்னும் ஆங்கிலச் சொல்லுக்குப் பண்டாரகர் என்னும் சொல் ஆக்கம் செய்யப்பட்டு மக்கள் புழக்கத்திற்கு வந்தது. இது கோயில்களில் பூசை செய்வோரைப் பண்டாரம் என்று அழைக்கும் இருந்து வந்தது. இச் சொல் தமிழகத்தில் ஏற்புடையதாக அமைந்திருக்கவில்லை. இதனைத் தொடர்ந்து யாழ்ப்பாணத் தமிழறிஞர்கள் கலாநிதி என்னும் புதிய சொல்லை உருவாக்கினார்கள். இந்தச் சொல்லும் தமிழகத்தில் ஏற்கப்பட வில்லை. 80களின் தொடக்கத்தில் முனைவர் என்னும் தமிழகத்தில் உருவாக்கப்பட்டு மக்கள் வழங்கிய ஏற்பின் அடிப்படையில் இச்சொல் நிலைபேறாக்கம் பெற்றுள்ளது. 90களின் பின்னர் முனைவர் என்ற சொல்லாகத்திற்குப் பதிலாகச் சொல்லாய்வாளர் மா.சே. விக்டர் என்பார் தக்கார் என்னும் சொல்லை அவர் எழுதிய நூல்களின் வழியாக மக்களின் புழகத்திற்கு விட்டார். இச் சொல் நிலைபேறாக்கம் பெறவில்லை என்பது குறிப்பிடத் தகுந்ததாகும்.

Physics என்னும் சொல்லுக்குக் கல்விசார் நிலையில் 1975இல் பௌதிகம் என்ற சொல்லாக்கம் ஏற்பட்டது. இதற்கு முன்பு இச் சொல்லுக்குப் பூதவியல் என்னும் சொல் இலங்கைத் தமிழர்களிடமும் இந்தியத் தமிழர்களிடம் புழக்கத்தில் இருந்தது. பூதம் என்பது தமிழர் வாழ்வியல் சூழலில் அச்சமூட்டும் சொல்லாக இருந்தமையால் மேற்சொன்ன பௌதிகம் என்ற சொல் பயன்பாட்டில் இருந்து வந்தது. தமிழ்நாடு அரசின் பாடநூல் நிறுவனம் மேல்நிலை வகுப்பு Physics பாடநூலைத் தமிழில் பௌதிகம் என்னும் பெயரில் வெளியிடாமல் இயற்பியல் என்று வெளியிட்டது. இயல்பு + இயல் என்பது புணர்ச்சி பெற்று இயற்பியல் என்று அழைக்கப்பட்டது. இயற்பியல் என்பது தவறான பயன்பாடு என்பதை மயிலாடுதுறை ஏவிசி கல்லூரியின் தமிழ்த்துறையின் முன்னைத் தலைவர் முனைவர் கி.செம்பியன் நூல்களில் எழுதியும் இலக்கியக் கூட்டங்களில் உரை நிகழ்த்தும்போது இக் கருத்தை வெளியிட்டார். மேலும் ஏவிசி கல்லூரியில் முதன்மைப் பாடமாக இருந்த இயற்பியல் வகுப்புக்கான மாணவர் வருகை பதிவேட்டில் இயல்பியல் என்றே எழுதவேண்டும் என்று உடன் பணியாற்றிய ஆசிரியர்களை அறிவுறுத்தினார். (1997-2005வரை கட்டுரையாளர் முனைவர் கி.செம்பியனுடன் பணியாற்றியவர்) பொருள்களின் இயல்பை விளக்கும் இயல் என்பதால் இயல்பியல் என்று அழைப்பதே பொருத்தமுடையது எனப் பல அரங்குகளில் விவாதித்துள்ளார். எனினும் இயல்பியல் என்னும் சொல் நிலைபேறாக்கம் பெறாது இயற்பியல் என்ற சொல்லே நிலைபேறாக்கம் பெற்றுமையைத் தமிழ்நாடு அரசு பாட நூல்களின் வழி அறியமுடிகின்றது.

Chemistry என்பதற்கு 1903இல் இலங்கையில் வெளிவந்த வேளாண்மை இதழான கமத்தொழில் என்னும் இதழில் இயைபியல் என்னும் சொல் பயன்படுத்தப்பட்டுள்ளது. தமிழகத்தில் இராசயனம் என்ற சொல்லே 80கள் வரை பயன்படுத்தப்பட்டது. பின்னர்த் தமிழ்நாடு பாடநூல் நிறுவனம் வேதியல் என்ற ஒரு புதிய சொல்லை உருவாக்கிப் புழகத்தில் விட்டது. வேதியல் என்னும் சொல் வேதியியல் என்றழைப்பதே பொருத்தமுடையது என்பதை மேற்சொன்ன முனைவர் கி.செம்பியன் வலியுறுத்தி வேதியல் மாணவர் வருகைப் பதிவேட்டில் வேதியியல் என்றே குறிப்பிட்டார். இயற்பியல் போலவே பரும்பான்மை மக்களால் வேதியல் என்பதே நிலைபேறாக்கம் பெற்றுமையை உணரமுடிகின்றது.

தமிழ்நாட்டிலும் தமிழர்கள் வாழும் பிறநாடுகளிலும் மிக வேகமாகச் சொற்கள் நிலைபேறாக்கம் பெற்ற துறையாக விளங்குவது கணினித் துறையாகும். Computer என்பது கால்குலேட்டர் என்னும் கணிப்பான் என்னும் கணக்கீட்டு கருவியின் தொடர்ச்சியாகவும் நீட்சியாகவும் கண்டுபிடிக்கப்பட்டது என்பதால் கம்பியூட்டர் என்பதற்குக் கணிப்பொறி என்றழைக்கப்பட்டது. கல்விசார் நிலையில் Computer Science என்பது கணிப்பொறி அறிவியல் என்னும் BCA (Bachelor of Computer Application) கணினிப் பயன்பாட்டியல் என்று தமிழாக்கம் செய்யப்பட்டுத் தற்போது நிலைபேறாக்கம் பெற்றுள்ளது. தற்போது கம்பியூட்டர் என்பதற்குச் சுருக்கமான சொல்லாக்கமாகக் கணினி என்பது நிலைபேறாக்கம் பெற்றுள்ளது. மேலும் இத்துறை சார்ந்த Montor - காட்சி திரை, Printer - அச்சுப்பொறி, Mouse - தொடக்கத்தில் சுட்டெலி என்றும் தற்போது சுட்டி என்றும் நிலைபேறாக்கம் பெற்றுள்ளது. CPU என்னும் Central Process Unit மைய நிகழ்த்தகம் என்றும் மையச் செயல்பாட்டகம் என்றும் வழங்கப்பட்டு வருகின்றது. Software என்பதற்கு மென்பொருள் என்னும் சொல் நிலைபேறாக்கம் பெற்றிருந்த நிலையில், பாரதிதாசன் பல்கலைக்கழத்தின் தமிழ்த்துறையின் முன்னைத் தலைவர் முனைவர் இராதாசெல்லப்பன் மென்மம் என்னும் புதிய சொல்லாக்கத்தைத் தன்னுடைய நூல்களின் வழியாகப் புழக்கத்தில் விட்டார். இதைப் பலரும் ஏற்றுத் தங்களின் நூல்களில் இடம்பெறச் செய்துள்ளனர். Hardware என்பதற்கு வன்பொருள் என்னும் மென்பொருளைப் போன்று ஆக்கம் செய்யப் பெற்றது. வன்பொருள் என்றால் கடினமான பொருள் என்னும் தன்மையை வெளிப்படுத்தி நின்றது. இராதாசெல்லப்பன் வன்பொருள் என்பதைவிட கருவியகம் சிறப்பாக இருக்கும் என அச்சொல்லை ஆக்கம் செய்தார். தற்போது கருவியகம் நிலைபேறாக்கம் பெற்றுள்ளது, மேலும் இத்துறையில் பதிவேற்றம், பதிவிறக்கம், உள்ளீடு, வெளியீடு, மொழிமாற்றி, நினைவகம் போன்ற சொல்லாக்கங்கள் ஏற்பட்டு நிலைபேறாக்கம் பெற்றுள்ளமையைக் காணமுடிகின்றது. CD என்பதற்குக் குறுந்தட்டு, குறுவட்டு என்னும் சொல்லாக்கம் ஏற்பட்டுள்ளன. அண்மையில் மக்களின் புழக்கத்தில் உள்ள Pendrive என்பதற்கு எழுதிஇயக்கி, சேமிப்பகம் போன்ற சொற்கள் புழக்கத்தில் இருந்தாலும் இச் சொல்லுக்கு நிகரான தமிழ்ச் சொல்லாக்கம் நிலைபேறாக்கம் பெறாது உள்ளது.

கணினி மற்றும் Smart Phone என்னும் பல்லூடக அலைபேசி (இச் சொல்லாக்கம் கட்டுரையாளரால் முன்மொழியப்பட்டுப் புழக்கத்தில் விடப்பட்டுள்ளது) வழி இயங்கும் இண்டர்நெட் என்பதற்கு முதலில் தொடர்பின்னல், வலைப்பின்னல், வலையகம், பிணையம் என்ற சொற்கள் தொடர்ந்து உருவாக்கப்பட்டுக் கொண்டிருந்தது. பாலாப்பிள்ளை அவர்கள் இணையம் என்ற சொல்லை உருவாக்கிப் புழக்கத்தில் விட்டார். இச்சொல் மிக எளிமையாக நிலைபேறாக்கம் பெற்றது. வெப்சைட் என்பதற்கு முதலில் வலைதளம் என்றழைக்கப்பட்டது. தற்போது இணையத் தளம் என்றழைக்கப்படுகின்றது. மேலும், மின்னஞ்சல், மின்-அஞ்சல், நேர் அரட்டை, குரல் அரட்டை, காணொளி அரட்டை, சமூக வலைதளங்கள், மின்நூலகம், மின்நூல், முகநூல், இணைய இதழ்கள், இணையச் சிற்றிதழ்கள், இணையத்தில் தொடர்ந்து இயங்குவோரைக் குறிக்க முன்னர் வலைவாசி என்றும் தற்போது இணையவாசி என்றும் சொற்கள் பயன்படுத்தப்படுகின்றன. இதுபோன்ற பல புதிய சொல்லாக்கங்கள் கணினித் துறையில் நிலைபேறாக்கம் பெற்றுள்ளன. இணையத்தில் Blogspot என்பதற்கு வலைப்பூ என்னும் சொல்லாக்கத்தை இணையம் வழியாகப் புழக்கத்தில் விட்டு அச்சொல் நிலைபேறாக்கம் பெறுவதற்கு உழைத்தவர் தமிழ்மரபு அறக்கட்டளையின் துணைத் தலைவர் சுபாஷினி ஆவார். தமிழ்மரபு அறக்கட்டளையின் தலைவர் முனைவர் நா. கண்ணன் அவர்கள் வீடியோ என்பது ஏற்கனவே புழக்கத்திலிருந்த காணொளிக்குப் பதிலீடாக விழியம் என்னுமோர் புதிய சொல்ல உருவாக்கினார். இன்று இணையத்தில் இச்சொல் நிலைபேறாக்கம் பெற்றுள்ளமையைக் காணமுடிகின்றது. மேலும் முனைவர் நா. கண்ணன் Youtube என்பதற்கு உன்குழல் என்னும் சொல்லாக்கத்தை முன்வைத்தார். அச்சொல் நிலைபேறாக்கம் பெற்றாக அறிய இயலவில்லை.

மக்களுக்கு மிகவும் அணுக்கமான தொடர்புடைய துறைகளில் நீதித் துறையும் ஒன்று. ஆங்கிலத்தில் Court என்பதற்குத் தமிழில் நீதிமன்றம் எனச் சொல்லாக்கம் செய்யப்பட்டது. நீதி வடமொழி சார்ந்த சொல் என்பதால் தமிழறிஞர்களில் குறிப்பாகப் பெருஞ்சித்திரனார் தன் வெளியிட்ட தமிழர் நிலம், தென்மொழி, தமிழ்ச் சிட்டு போன்ற இதழ்களில் அறங்கூறும் அவையம் என்ற சொல்லை உருவாக்கினார். இச் சொல் சுருக்கமாக இல்லாமல் இருக்கின்றது என்ற பின்னூட்டம் அறிந்து அறமன்றம் என்னும் புதிய சொல்லை ஆக்கம் செய்தார். இச் சொல் நிலைபேறாக்கம் அடையவில்லை. நீதிமன்றமே நிலைபேறாக்கம் பெற்றது. நீதி மன்றம், உயர்நீதி மன்றம், உயர்நீதி மன்றக் கிளை, உச்சநீதி மன்றம் என அத்துறை தொடர்பாகச் சொற்கள் உருவாக்கப்பட்டன. இச்சொல் நிலைபேறாக்கம் சென்னை, மதுரை பகுதிகளில் பெற்றுவிட்ட நிலையில், தமிழ்நாட்டின் மையப்பகுதியான திருச்சிராப்பள்ளியில் இயங்கும் பேருந்துகளின் பெயர் பலகைகளில் ‘வழி : கோர்ட்’ என்றே உள்ளது. நீதிபதி, நீதியரசர், வழக்குரைஞர், வழக்கறிஞர், தீர்ப்பு, மேல்முறையீடு, காப்புத் தொகை, பிணை, நேர்நிறுத்துதல், ஆட் கொணர் மனு, இடைக்காலத் தடை, அழைப்பாணை, வக்கலாத்து, முதல் தகவல் அறிக்கை, குற்றப்பத்திரிகை, குற்றச்சாட்டு, குற்றச்சாட்டுப் பதிவு, அரசு தரப்பு, குற்றவாளி தரப்பு என்பது தற்போது குற்றம் சாட்டப்பெற்றவர் தரப்பு, உரிமையியல் நீதிமன்றம், குடும்ப நல நீதிமன்றம், முத்திரைத்தாள் போன்ற பலசொற்கள் நிலைபேறாக்கம் பெற்றுள்ளமையைக் காண முடிகின்றது.

தமிழ் ஊடகங்களில் குறிப்பாக அச்சு ஊடகமான இதழியலில் தொடக்கக் காலத்தில் சமஸ்கிருதம், வடமொழி கலந்தும் ஆங்கிலச் சொற்கள் தமிழ் ஒலிபெயர்ப்பு முறையிலும் அமைக்கப்பட்டுச் செய்திகள் வெளியிடப்பட்டன. சி.பா.ஆதித்தனார் தினத்தந்தி தொடங்கி இயன்றவரை எல்லாச் சொற்களுக்கும் தமிழில் சொல்லாக்கம் செய்தார். இவர் தன்னுடைய நாளிதழில் புதுபுது சொல்லாக்கங்களை உருவாக்க உதவியாகத் தந்தை பெரியார், பேரறிஞர் அண்ணா, கலைஞர் மு. கருணாநிதி, நாவலர் நெடுஞ்செழியன், பேராசிரியர் க. அன்பழகன், ஈ.வெ.கி. சம்பத், மா.பொ.சிவஞானம் போன்ற தமிழ்நாட்டு தலைவர்களின் உரைகள், எழுத்துகள் அமைந்திருந்தன. பேரவைத் தலைவர், பெரியோர்களே, தாய்மார்களே, சட்டமன்றம், சட்டப்பேரவை, சட்டப்பேரவைத் தலைவர், சட்டமன்ற உறுப்பினர், அவை முன்னவர், Wib என்பதற்குக் கொறடா, சட்டமன்ற மேலவை உறுப்பினர், சட்ட முன்வரைவு, அனுமதி கோருதல், கேள்வி நேரம், நேரமில்லா நேரம் (ஜீரோ ஹவர்), ஒத்திவைப்பு தீர்மானம், சிறப்பு கவன ஈர்ப்பு தீர்மானம், துணைக் கேள்வி, ஒழுங்கு நடவடிக்கை, அவையிலிருந்து வெளியேற்றம், வெளிநடப்பு, முதலமைச்சர், முதல்வர், அமைச்சர், துணை அமைச்சர், குடியரசுத் தலைவர், துணைக் குடியரசுத் தலைவர் என்று பல சொற்கள் நிலைபேறாக்கம் பெற்றுள்ளன. தினமணி 90களுக்குப் பின் செய்தி வழங்குதலில் நிறைய தமிழ் சொல்லாக்கங்களை அறிமுகம் செய்தது. குறிப்பாகச் சஸ்பெண்ட் என்பதற்குத் தற்காலிக நீக்கம் என்பதற்குப் பதிலாகப் பணிஇடைநீக்கம், Values என்பதற்கு மதிப்பீடு என்பதைவிட விழுமியம் என்ற சொல்லை அறிமுகம் செய்து வைத்தது. சுநாமிக்குக் கடல் சீற்றம் என்றும் கடல் கொந்தளிப்பு என்ற பெயரில் அழைக்கப்பட்டது. பின்னர்க் கடல்கோள் என்னும் பழந்தமிழ் சொல்லால் அழைக்கப்பெற்றது. சென்னை வானிலை ஆராய்ச்சி மையத்தால் ஆழிப்பேரலை என்னும் தொலைக்காட்சியில் அறிமுகமானது. இச்சொல் நிலைபேறாக்கம் அடையத் தினமணியைத் தொடர்ந்து பல அச்சு ஊடகங்கள், மின் ஊடகங்களில் புதிய தலைமுறை தொலைக்காட்சி, தந்தித் தொலைக்காட்சி, இமயம் தொலைக்காட்சி, சென்னை பொதிகைத் தொலைக்காட்சி, அகில இந்திய வானொலி போன்றவை உறுதுணையாக இருந்து வருகின்றன. மேலும் தமிழுக்குப் புதிய சொற்களை ஆக்கம் செய்து அறிமுகம் செய்து வைத்ததில் பட்டாளி மக்கள் கட்சியின் நிறுவுநர் மருத்துவர் இராமதாசு அவர்களை ஆசிரியராகக் கொண்டு வெளிவந்த தமிழ் ஓசைக்குப் பெரும் பங்குண்டு. இந்த இதழ் அறிமுகம் செய்து வைத்த சொற்கள் ஆட்டோ-தானி, வேன் - மூடுந்து, லாரி, சரக்குந்து, பிணை, நேரலை, முன்வைப்பு, நேர் நிறுத்துதல், பிணை மறுப்பு, உண்ணாநிலை போன்ற பல்வேறு சொற்கள் இதில் அடங்கும்.

மக்கள் தொலைக்காட்சி Live என்பதற்கு நேரலை என்னும் கலைச்சொல்லைப் புழக்கத்தில் விட்டது. அதற்கு முன் நிகழ், நேரடி, தொடரலை என்றிருந்தது. இலண்டன் பிபிசி தமிழோசை வானொலி நிகழ்ச்சியில் 90களில் தேர்தலின்போது நடைபெறும் பிரசாரத்தைப் பரப்புரை என்று ஆக்கம் செய்து நிகழ்ச்சிகளில் ஒலிபரப்பியது. 2014ஆம் ஆண்டு நடைபெற்ற இந்திய நாடாளுமன்றத் தேர்தலின்போது புதியதலைமுறை தொலைக் காட்சி தன்னுடைய செய்தி ஒளிபரப்பில் பரப்புரை என்னும் சொல்லாக்கத்தைப் பயன்படுத்தியது. இலண்டனிலிருந்து ஒலிபரப்பப்படும் பிபிசி தமிழோசையில் 80கள் தொடங்கிப் புதிய கலைச்சொற்கள் புழக்கத்திற்கு வருவதற்குப் பெரும்துணையாக நின்றது. விமானம், ஆகாய விமானம் - வானுர்தி, ஹெலிகாப்டர் - உழங்கு வானுர்தி, கொரில்லா படையினர் - கரந்தடிபடையாளர், வயது-அகவை, விபத்து - நேர்ச்சி, இலஞ்சம் - கையூட்டு, தேர்தலில் வெற்றி பெற்றர்-தெரிவு செய்யப்பெற்றார், தோல்வி அடைந்தார் - தெரிவு செய்யப்படவில்லை எனப் பல சொல்லாக்கங்களைப் பிபிசி முன் வைத்தது. இந்த ஒலிபரப்பு தமிழுக்கு ஆக்கம் செய்வதாக அமைந்திருந்தது என்றால் மிகையில்லை. ஆனால் தமிழகத்தின் ஊடகங்கள் இதுபோன்ற பிறமொழிச் சொற்களுக்கு அறிமுகப்படுத்தப்பட்ட பல சொற்களை மக்களின் புழக்கத்திற்கு விடவில்லை. மாறாகப் பிபிசிக்குப் போட்டியாகப் பிலிப்பைன்ஸ் நாட்டின் வெரித்தாஸ் தமிழ் ஒலிபரப்பு, சீனாவின் பெய்ஜிங் ஒலிபரப்பு, சிங்கப்பூர், மலேசிய வானொலி, தொலைக்காட்சி போன்ற ஊடகங்கள் தமிழ்மொழிக்கும் ஆக்கம் சேர்க்கும் வகையில் சொற்களை அறிமுகம் செய்து வைத்தன.

தமிழகத்தில் கடந்த ஓரு நூற்றாண்டு காலம் ஒலிபெயர்ப்பு, மொழிபெயர்ப்பு, புதிய ஆக்கம் என்ற நிலையில் தமிழுக்கு அறிமுகம் செய்து வைக்கப்பெற்ற சொற்களில் நிலைபேறாக்கம் பெற்ற சொற்கள் குறித்தும் நிலைபேறாக்கம் பெற்றிடாத சொற்கள் குறித்தும் வரலாற்றின் துணைக் கொண்டு நோக்கப் பெற்றுச் சில செய்திகள் மட்டுமே இக் கட்டுரையின்கண் முன் வைக்கப்பட்டுள்ளது. கலைச்சொற்கள், புதிய சொற்கள் நிலைபேறாக்கம் பெறுவதற்கு அரசின் துணை என்பது இன்றியமையாதாகும். தமிழ்நாட்டில் ஸ்ரீரங்கம் (திருவரங்கம்), ஸ்ரீவைகுண்டம் (திருவைகுண்டம்), ஸ்ரீவில்லிப்புத்தூர் (திருவில்லிப்புத்தூர்) வேதரண்யம் (மரைக்காடு), கரூர் (கருவூர்), ஈரோடு (ஈரோடைக்), குளித்தலைக் (குழித்தலை), விருத்தாசலம் (திருமுதுகுன்றம்) இலால்குடி (திருத்தவத்துறை) இதுபோன்று பல ஊர்பெயர்கள் தமிழாக்கம் செய்யப்படாமல் உள்ளன. அண்மையில் உள்ள கர்நாடக மாநிலத்தில் பெங்களூர் - பெங்களூரு, மைசூர் - மைசூரு என்றும் கேரள மாநிலத்தில் ஆங்கிலத்தில் Trivandram - திருவனந்தபுரம், Calicut - கோழிக்கோடு, Kannur - கண்ணனூர் என்று மிக எளிதாக ஊர்ப் பெயர்களை மாற்றம் செய்துள்ளன. இதை முன்மாதிரியாகக் கொண்டு செயல்படத் தமிழ்நாடு முன்வரவேண்டும்.

*****

இது முத்துக்கமலம் இணைய இதழின் படைப்பு.