‘உலகத்தில் உழைக்காது பிறரை ஏமாற்றி வாழ்வோரை ஏமாற்றுக்கார்கள், எத்தர்கள் என்று அழைப்பர். பிறர் உழைப்பில் சுகங்காண்பவரையும், பிறரை வஞ்சித்துப் பணத்தையோ, பொருளையோ சம்பாதிப்பவரையும் எத்தர்கள் பட்டியலில் அடக்குவர். இவர்கள் எதுவும் செய்யாவிட்டாலும் கூட மற்றவர்களிடம் பொய்கூறி அவர்களைத் தங்களின் ஏமாற்று வலையில் விழ வைப்பர்.

உலகி்ல் அதிக எண்ணிக்கையில் இவ்வெத்தர்கள் வாழ்கின்றனர். அவர்களைச் சுலபமாக அடையாளம் காண இயலாது. அவர்களுடன் நெருங்கிப் பழகிய பின்னர்தான் இது புலப்படும். எங்ஙனம் கொசு அல்லது அட்டை போன்றவை பிறர் அறியாது இரத்தத்தை உறிஞ்சுகின்றதோ அதுபோன்று இவர்கள் பிறரால் அறிந்து கொள்ள முடியாதவாறு செயல்படுவர்.

பொய்கூறி ஏமாற்றுபவர், நடத்தையால் ஏமாற்றுபவர், நயவஞ்சகப் பேச்சால் ஏமாற்றுபவர் என்று பலதரப்பட்ட எத்தர்கள் உலகி் உலவுகின்றனர். இத்தகைய எத்தர்களையும் அவர்தம் பண்புகளையும் நமது முன்னோர்கள் பழமொழிகளின் வழியாக எடுத்துரைத்து நமக்கு விழிப்புணர்வு ஊட்டியுள்ளனர்.

ஏமாற்றுக்காரர்களை எத்தர்கள் என்பர். உழைக்காது பிறரை எத்திப்பிழைப்பதால் எத்தர்கள் என்று அவர்களை வழங்குகின்றனர். எப்போதும் பிறரது உழைப்பினைச்சுரண்டி உண்டு கொழுத்துத் திரிவர். உழைக்காது ஏதாவது கிடைக்குமா? என்று பார்த்துக் கொண்டே இருப்பர். கழுகு போன்று இவர்கள் பிறரை ஏமாற்றி வாழ்வதில் குறியாக இருப்பர். இத்தகையவர்களின் இயல்பினை,

‘‘எத்துல பிள்ளைப்பெற்று
எரவானத்துல தொட்டில் கட்டின மாதிரி’’

என்ற பழமொழி தெளிவுறுத்துகிறது.

பிள்ளைப் பேற்றக்குக் கூட பிறரைப் பணம் செலவு செய்ய வைத்துக் (குழந்தையைப் பெற்று) எரவானத்தில் (தாழ்வாரக் கூரை) தொட்டில் கட்டி ஆட்டுவது இத்தகையோரின் இயல்பாகும். தன்னுடைய செலவைக் கூடப் பிறரை ஏமாற்றிச் செய்ய வைக்கும் கயமைத் தன்மை கொண்டவர்கள் இவர்கள். தனக்குக் கூடப் பிறர் செலவு செய்யவேண்டும் என்று கருதும் மனநிலை கொண்டவர்களாக சமுதாயத்தில் இத்தகையோர் வாழ்கின்றனர். என்பதைக் கூறி அவர்களைக் கண்டறிந்து அவர்களுக்குப் பலிகடாவாக ஆகிவிடாது விழிப்புணர்வுடன் வாழவேண்டும் என்ற வாழ்க்கை நெறியையும் இப்பழமொழி தெளிவுறுத்துகிறது. இவர்களை,

‘‘உள்ளத்தில் ஒன்று வைத்துப் புறத்திலே
ஒன்றைச் செய்து நல்லவர்போல்
நடிப்பார் ஞானத் தங்கமே அவர் நாடகம்
என்ன சொல்வேன் ஞானத் தங்கமே!’’

என்ற கவிஞர் கண்ணதாசனின் பாடல்வரிகள் காட்சிப்படுத்துவது ஒப்பு நோக்கத்தக்கது. இத்தகையோரின் சொல்லுக்கும் செயலுக்கும் ஒரு தொடர்பும் இருக்காது. ஏமாற்றிப் பிழைப்பதையே குறியாகக் கொண்டு இவர்கள் வாழ்வர். இத்தகையோரை இனங்கண்டு கொண்டு அவர்களை ஒதுக்கி வாழ வேண்டும் என்றும் நம்முன்னோர் இப்பழமொழி வாயிலாக நன்கு எடுத்துரைத்துள்ளனர்.

எத்தர்களாகிய ஏமாற்றுக்காரர்கள் எதிலும் பட்டும், படாமலும் நடந்து கொள்வர். ஆளுக்குத் தகுந்தாற்போன்று ஒவ்வொருவரிடமும் நடிப்பர். யாரிடமும் உண்மையாக நடந்து கொள்ள மாட்டார்கள். விரும்பத்தகாத நிகழ்வு ஒன்று நடந்தால் அதனைச் செய்தவரிடமும் அதனால் பாதிப்புக்குள்ளாகியவரிடமும் ஒவ்வொரு விதமாகப் பேசுவர். செயலைச் செய்தவரிடம்,

‘‘நீங்கள் செய்தது சரிதான். நான் உங்க இடத்தில் இருந்திருந்தால் அதனையே செய்திருப்பேன்” என்று கூறுவர்.

பாதிக்கப்பட்டவரிடம், ‘‘அவர் செய்தது சரியில்லைங்க. நீங்க சும்மா விடாதீங்க. நான் உங்களுக்கு உறுதுணையா இருக்கின்றேன். அவனை உண்டு இல்லைன்னு பார்த்துவிடுவோம்’’ என்று தூண்டிவிடுவர்.

இத்தகையோரின் இழிவான குணத்தை,

‘‘மீனுக்கு உடம்பும் பாம்புக்குத் தலையும்
காட்டும் விலாங்கு மீனுமாதிரி’’

என்ற பழமொழி தெளிவுறுத்துகிறது.

விலாங்கு மீன் மீன் வகைகளுள் ஒன்று இதன் தலையைப் பார்த்தால் பாம்பு போன்றுமத் உடலைப் பார்த்தால் மீன் போன்றும் இருக்கும். பாம்பைப் பார்க்கும்போது அவ்விலாங்கு மீன் தன் தலையைக் காண்பித்து தான் பாம்பு என்றும் மீனினத்தைப் பார்க்கும்போது தன் உடலைக் காட்டி மீனினத்தைச் சார்ந்தவன் என்றும் நடந்து கொள்ளும். பாம்பும் மீனும் இதனை உண்மை என்று நம்பி ஏமாந்து போகும். அதுபோன்று எத்தர்கள் ஒவ்வொருவரிடமும் அவர்களுக்குத் தகுந்தாற்போன்று நடந்து கொள்வர். இத்தகையவர்களை இனங்கண்டு அறிந்து அவர்களை ஒதுக்கி வாழ வேண்டும் என்ற கருத்தினை இப்பழமொழி எடுத்துரைக்கின்றது.

இவ்வெத்தர்களை வழக்கில், ‘நாற்றங்கால்’ என்று கூறுவர். விதைகளைப் போட்டு நாற்று வளர்க்கக்கூடிய வயலுக்கு நாற்றங்கால் என்று பெயர். இந்நாற்றங்காலில் விதைகளைப் போட்டு வளர்த்து அவ்விதை முளைத்து வளர்ந்த பின்னர் அது நடுவதற்குத் தயாரானவுடன் அதனைப் பிடுங்கி வெறு வயல்களில் நடுவர். இவ்வாறு இவ்வயல் நாற்றுக்கு மூலகாரணமாக இருப்பதால் இதனை நாற்றங்கால் என்ற பெயரால் மக்கள் வழங்குகின்றனர்.

இந்நாற்றங்காலைப் போன்று சிலர் பிரச்சனைகள், கலகங்கள், குழப்பங்கள் தோன்றுவதற்கு மூலவேராக இருப்பர். இவர்கள் பிரச்சனைகளைச் சமுதாயத்தில் உருவாக்கி விட்டுவிட்டு அதனைத் தீர்த்து வைப்பதாகக் கூறி மக்களை ஏமாற்றுவர். தங்களது தவறுகளைச் சிலர் மறைப்பதற்குப் பிறரின் கவனத்தைத் திசை திருப்ப இவ்வாறு நடந்து கொள்வர். இவர்களின் இத்தகைய சுயநலப் பண்பினை,

‘‘பிள்ளையையும் கிள்ளிவிட்டுத்
தொட்டிலையும் ஆட்டுவது மாதிரி’’

‘‘பாலுக்குங் காவல் பூனைக்குங் காவல்’’

என்ற பழமொழிகள் தெளிவுறுத்துகின்றன.

பிள்ளையைக் கிள்ளிவிட்டு அழ வைத்துப் பின்னர் தொட்லை ஆட்டிவிட்டுக் குழந்தையின் அழுகையை நிறுத்த முயற்சிப்பது பிரச்சனையை உருவாக்கி விட்டுவிட்டு அதனைத் தீர்க்க முயற்சிப்பது போல் நடப்பதனைக் குறிக்கும் இத்தகைய செயல் பிரச்சனைகளை மேலும் மேலும் அதிகரிக்குமே தவிர அதனைத் தீர்க்காது.

பாலுக்கும் பூனைக்கும் காவலாக ஒரே நபர் இருக்க முடியாது. ஏதேனும் ஒன்றனுக்கு மட்டுமே காவலாக இருக்க முடியும். இத்தகைய ஏமாற்றுக்காரர்கள் ஒரே நேரத்தில் பிரச்சனைக்குரிய இருவரிடமும் சார்புடையவரைப் போல் இருந்து நடித்து இருவரையும் ஏமாற்றிப் பிழைப்பார்.

இத்தகையவர்களிடம் சிறிது ஏமாந்தாலும் அனைத்தும் காலியாகிவிடும். இத்தகைய குணங்கெட்ட கொடியவர்களைக் கண்டறிந்து எச்சிககையுடனும் விழிப்புடணும் நடந்து கொள்ள வேண்டும் என்ற வாழ்வியற் பண்புகளை இப்பழமொழிகள் தெளிவுறுத்துகிறது.

இப்பண்புடையவர்கள் கூடவே இருப்பர், உண்பர், உறைவர். ஆனால் பாதகம் செய்வர். இழிவாகப் பேசுவர். இத்தகையோர் இழிகுண எத்தர்கள். தாம் எதையும் செய்யாது தமது தவறை மறைக்கப் பிறரை வேண்டுமென்றே பழிதூற்றுவர். இவர்கள் இறைவனின் தண்டனைக்கு உட்பட்டவர்கள் என்பதையும் இப்பழமொழிகள் தெளிவுறுத்துகின்றன.

சிலர் எதிலும் ஈடுபாடு கொள்ளாதது போன்றும், ஈடுபாடு உள்ளது போன்றும் நடந்து கொள்வர். எதிலும் அவர்கள் தாங்கள் அகப்பட்டுக் கொள்ளக் கூடாது என்று நினைப்பதுடன் பிறரை ஏமாற்றுவதிலும் தனக்கு லாபம் கிடைப்பதிலும் கவனமாகச் செயல்படுவர்.

இத்தகையோர் மிகுந்த ஆபத்தை விளைவிப்பவர்களாவர். இவர்கள் மற்றவர்களை எதிலாவது சிக்க வைத்து நழுவிவிடுவர். இவர்களின் இத்தகைய பண்பினை,

‘‘கழுவுற மீனுல நழுவுற மீனு மாதிரி’’

என்ற பழமொழி எடுத்துரைக்கின்றது.

ஆற்றிலோ, குளம், கடல் போன்றவற்றிலோ பிடித்த மீன் கழுவுகின்ற போது நழுவிச் சென்று விடும். அதுபோன்று சில எத்தர்கள் இருப்பர்.

இப்பழமொழியைப் பின்வரும் கதை வாயிலாக விளக்கலாம்.

ஒரு பெரிய காட்டில் நரி ஒன்ற வாழ்ந்து வந்தது. அது வஞ்சக எண்ணம் கொண்டது. பிறரை ஏமாற்றி வாழக்கூடிய இயல்பினை உடையது. அதே காட்டில் கழுதை ஒன்று வாழ்ந்தது. இக்கழுதை எதையும் எளிதில் நம்பும் தன்மை கொண்டது. இக்கழுதையுடன் நரி நட்புடன் பழகியது.

தினமும் கழுதை காட்டில் மேய்ந்துவிட்டுத் தனது இருப்பிடத்திற்குச் சென்றுவிடும். நரி கழுதை மேயும் இடத்திற்கு வந்து கழுதையுடன் பேசிவிட்டுச் சென்றுவிடும். ஒருநாள் கழுதையைக் கண்ட நரி, ‘‘நண்பா, இக்காட்டின் அருகில் உள்ள தோட்டத்தில் நல்ல விளைச்சல் விளைந்துள்ளது. என்னுடன் வந்தால் அதனைத் தின்று கொழு கொழுவென்று நீ பெருத்துவிடலாம். வருகிறாா?’’ என்று கேட்டது. ஆனால் கழுதை இதற்குச் சம்மதிக்கவில்லை.

நரியோ தோட்டத்திலுள்ள தோட்டக்காரனின் ஆட்டுக்குட்டியை எவ்வாறேனும் உண்ண வேண்டும் என்ற எண்ணத்துடன் கழுதையைக் கூட்டிச் சென்று தோட்டக்காரனின் கவனத்தைத் திசை திருப்பிவிட்டு ஆட்டுக்குட்டியைக் கவர்ந்து உண்ண வேண்டும் என்று திட்டம் போட்டது.

மறுபடியும் நரி கழுதையிடம் வந்து ‘‘நண்பா நீ எலும்பும் தோலுமாக இருப்பது எனக்கு வருத்தமாக உள்ளது நீ இவ்வாறு இருப்பதை என்னால் பார்த்துக் கொண்டிருக்க இயலாது. நான் உனக்குபாதுகாப்பாக இருக்கும்போது எனக்கு ஏதும் துன்பம் நேராது. கவலைப்படாமல் என்னுடன் வா’’ என்று வற்புறுத்தி அழைத்தது.

கழுதையும் சரி நண்பன் அழைக்கின்றானே என்று நரியுடன் சென்றது. தோட்டத்தில் வெள்ளரிக்காய்கள் நிறையக் காய்த்துக் கிடந்தது. அதனை உண்ண கழுதை ஆவலுடன் சென்றது. நரி, ‘‘நண்பா நன்கு சாப்பிடு நான் ஆள் எதுவும் வருகிறார்களா என்று பார்த்துக் கொள்கிறேன். யாராவது வந்தால் உனக்கு எச்சரிக்கைவிடுகிறேன்’’ என்று கூறிவிட்டுத் தோட்டக்காரன் ஆடுகளை அடைத்து வைத்திருக்கும் இடம் நோக்கிச் சென்றது.



ஆடுகள் அடைத்துள்ள இடத்திற்கு வந்த நரி சிறிய ஆட்டுக் குட்டியைப் பிடிப்பதற்குத் தயாராக இருந்தது. ஆடுகளை அடைத்து வைத்துள்ள இடத்திற்குச் சற்று தள்ளி தோட்டக்காரன் நின்று தோட்டத்தைச் சுற்றுமுற்றும் பார்த்துக் கொண்டிருந்தான். அவனது கவனம் ஆடுகளின் மீது இல்லை என்பதைத் தெரிந்து கொண்ட நரி மெதுவாகச் சென்று சிறிய ஆட்டுக் குட்டியின் குரலை்வளையைக் கடித்துக் கொன்று அதனைப் புதர்ப்பக்கம் இழுத்துச் சென்றது அதே நேரத்தில் தோட்டக்காரன் கழுதை வெள்ளரிக்காய்களைத் தின்று கொண்டிருப்பதைக் கண்டு அதனை விரட்டுவதற்கு வேகமாகத் தடியை எடுத்துக் கொண்டு சென்றான்.

சரி இதுதான் சமயமென்று ஆட்டுக் குட்டியை இழுத்துக் கொண்டு தோட்டத்திற்கு வெளியே தப்பித்து ஓடிக் காட்டுக்குள் மறைந்தது. தோட்டக்காரன் வருவதை அறியாத கழுதை வேகவேகமாக வெள்ளரிக்காய்களைத் தின்று கொண்டிருந்தது. வேகமாக ஓடிவந்த தோட்டக்காரன் கழுதையைக் குறிவைத்துத் தடியை எறிந்தான். தடி கழுதை மேல் பட்டவுடன் வலிதாள முடியாது கழுதை திரும்பிப் பார்த்துக் கத்தி ஓட முயன்றது. நரி இவ்வாறு தன்னை ஏமாற்றி அழைத்து வந்து சிக்கலில் மாட்டிவிட்டதே என்று வருந்தி அங்குமிங்கும் ஓடியது தோட்டக்காரன் நன்கு நையப்புடைத்துக் கழுதையை விரட்டிவிட்டான். கால் ஒடிந்த கழுதை நரியின் பேச்சைக் கேட்டு ஏமாற்றம் அடைந்து துன்புற்றோமே என்று வருந்தி ஒடிந்த காலுடன் கட்டுக்குள் மெதுவாக ஓடியது பின்னர் இத்தகைய நண்பர்களுடன் சேரக்கூடாது என்று முடிவு கட்டியது.

நரி தான் பிழைக்க கழுதையைக் கருவியாகப் பயன்படுத்தியது போன்று பலர் இன்றும் வாழ்கின்றனர். கழுவுகின்றபோது நழுவும் மீனைப் போன்று எந்தச் சிக்கலிலும் அவர்கள் மாட்டிக் கொள்ளாது பிறரை ஏமாற்றிச் சிக்கலில் சிக்க வைத்துவிட்டு நரிபோலச் சென்று விடகின்றனர். இத்தகைய நயவஞ்சகர்களிடமிருந்து ஒவ்வொருவரும் தங்களைத் தற்காத்துக் கொள்ளவேண்டுமென்று இப்பழமொழி தெளிவுறுத்துவது குறிப்பிடத்தக்கது.

ஏமாறுகிறவன் இருக்கின்றவரை ஏமாற்றுகின்ற எத்தர்கள் இருந்து கொண்டே இருப்பர். இதனை உணர்ந்து விழிப்புணர்வுடன் வாழ்வதற்கு நம்முன்னோர்கள் கூறிய பழமொழிகள் நமக்கு உறுதுணையாக உள்ளன. ஏமாற்றாது, ஏமாறாது நேரிய வழியில் நடந்து தூய வாழ்வு வாழ்வோம்.

இது முத்துக்கமலம் இணைய இதழின் படைப்பு.