சும்பன், நிசும்பன் என்ற அண்ணன், தம்பி இருவரும், அரக்கர்கள். அவர்களது ஆட்சியின் கொடுமை தாங்காமல், மக்கள் தவித்திருக்கின்றனர். இந்த அரக்கர்களை எப்படியாவது அழித்து மக்களைக் காப்பாற்ற வேண்டும் என்று மும்மூர்த்திகளான சிவபெருமான், விஷ்ணு, பிரம்மா ஆகியோரிடம் தேவர்கள் முறையிடுகின்றனர்.

மும்மூர்த்திகளும், மகாசக்தியைத் தோற்றுவித்து, அவளுக்குத் தங்களது சக்தியையும், ஆயுதங்களையும், வாகனங்களையும் அளித்தனர்.தேவி, அழகிய பெண் உருவம் எடுத்துப் பூலோகத்திற்கு வந்தாள்.

அரக்கர்களின் வேலையாட்களான சண்டன், முண்டன் இருவரும் இந்த அழகுப் பதுமையான மகாசக்தியைப் பார்த்ததும், தங்களது அரசர்களுக்கு ஏற்றவள் இவள் என முடிவு செய்து, தேவியிடம், தங்களது ராஜாக்களில் ஒருவரைத் திருமணம் செய்து கொள்ளும்படி வற்புறுத்தினர்.

அப்போது தேவி, “யார் என்னைப் போரில் வெல்கின்றனரோ, அவர்களைத்தான் நான் மணப்பேன்’ என்று தான் சபதம் செய்திருப்பதாகத் தெரிவிக்கிறாள்.

அதற்குச் சண்டனும், முண்டனும், “தேவர்கள், அசுரர்கள் எல்லாருமே, எங்கள் ராஜாக்களுக்கு அடிமை. சாதாரண பெண்ணான நீ எங்களிடம் வீணாகப் பேசுவதா? பேசாமல் எங்களுடன் வா...” என்றனர்.

அதற்கு தேவி, “நான் தெரிந்தோ, தெரியாமலோ சபதம் செய்து விட்டேன். நீங்களிருவரும் உங்கள் அரசர்களிடம் சொல்ளுங்கள். அவர்கள் என்ன சொல்கிறார்கள் என்று கேட்டு வாருங்கள்…” என்றாள்.

இதை சும்பன், நிசும்பன்களிடம் சொன்னதும், இருவரும் தங்களது படையிலிருக்கும் அசுரர்கள் ஒவ்வொருவராக அனுப்பினர்.

அவர்கள் அனைவரையும் தேவி அழித்தாள். அதில், ரக்த பீஜன் என்று ஒரு அரக்கன். அவன் கடுந்தவம் செய்து, அவன் உடம்பிலிருந்து விழும் ஒவ்வொரு சொட்டு இரத்தத்திலிருந்தும், மீண்டும் ஒரு ரக்த பீஜன் தோன்றுவான் என்றும், அவனும் ரக்த பீஜன் போலவே ஆற்றலுடன் இருப்பான் என்றும் ஒரு வரம் பெற்றிருந்தான்.

தேவி ரக்த பீஜனை அழிக்கத் துவங்கிய போது, கீழே விழும் ஒவ்வொரு துளி ரத்தத்திலும், ஒரு ரக்த பீஜன் தோன்றிக் கொண்டேயிருந்தான். அதனால் உலகமே ரக்த பீஜர்களால் நிறைந்தது. இதைக் கண்ட தேவி, தன்னிடம் உள்ள சாமுண்டி என்ற காளியை, வாயை அகலமாகத் திறந்து, ரக்த பீஜனின் உடம்பிலிருந்து விழும் ஒவ்வொரு துளி ரத்தத்ததையும் குடித்து விடச் சொன்னாள்.

சாமுண்டியும், தேவியின் கட்டளையை நிறைவேற்றினாள். கடைசியில் ரக்த பீஜன் தன் ரத்தமெல்லாம் வெளியேறி, இறந்து போனான்.

கடைசியாக சும்பன், நிசும்பன் இருவரும் தேவியால் அழிக்கப்படுகின்றனர்.

இதனடிப்படையிலேயே தேவியை நவராத்திரி நாட்களில் வணங்கும் வழக்கம் தொடங்கியது என்று தேவி மகாத்மியத்தில் வரும் புராணக்கதையில் சொல்லப்பட்டிருக்கிறது.

நவராத்திரி புண்ணிய காலமானது ஒன்பது தினங்களைக் கொண்டது. நவராத்திரி நோன்பு புரட்டாசி மாதத்தில் நவக்கிரகங்களில் தலைமையாக உள்ள சூரியன், கன்னி இராசியில் இருக்கும் காலம் தட்சணாயண காலமாகும். இக்காலம் தேவர்களுக்கு இரவுக் காலமாகும். கன்னி ராசிக்கு அதிபதியானவன் புதன். வித்யாகாரகன் எனப்படுபவன். கல்வி, புத்தி, தொழில் நிலை சரியாக அமைய புதனின் பார்வை முக்கியமானது என்று சொல்வதுண்டு. இந்தக் காலத்தில் நவராத்திரி கொண்டாடுவது சாலச் சிறந்தது என்று கருதி வந்துள்ளனர்.

தேவியை வழிபட உத்தராயணத்தில் வசந்த நவராத்திரி, தட்சணாயன காலத்தில் சாரதா நவராத்திரி என்று இரு நவராத்திரிகள் இருப்பினும் புரட்டாசி மாதத்தில் வரும் சாரதா நவராத்திரியே அனைவராலும் கொண்டாடக் கூடியதாக இருக்கிறது. புரட்டாசி மாதத்தில் வளர்பிறைப் பிரதமை முதல் நவமி வரை ஒன்பது நாட்கள் கடைப்பிடிக்கப்படும் நோன்பு சாரதா நவராத்திரி நோன்பு எனப்படுகிறது.

அலைமகள், மலைமகள், கலைமகள் என முப்பெரும் தேவியரையும் வணங்கி வழிபட்டு, இந்த உலக வாழ்கை சிறப்பாக அமையத் தேவையான கல்வி, செல்வம், வீரம் எனும் மூன்றையும் முப்பெரும் தேவிகளிடம் வேண்டிக் கடைப்பிடிக்கப்படும் இந்த ஒன்பது நாட்கள் கொண்ட சாரதா நவராத்திரி நோன்புக் காலத்தில், முதல் மூன்று நாள்கள் தமோ குணமுடையவளான துர்கா பரமேஸ்வரியை வீரம், துணிவு வேண்டியும், அடுத்த மூன்று நாள்கள் ராஜோ குணமுடையவளான மகாலட்சுமியைச் சகல செல்வங்களையும் அளிக்க வேண்டியும், கடைசி மூன்று நாள்கள் சாத்வீகக் குணமுடையவளான சரஸ்வதியை கல்வி, அறிவு என்று அனைத்துக் கலை ஞானங்களையும் அளிக்க வேண்டியும் வழிபடுகிறார்கள்.

நவராத்திரி நாட்களில் அம்பிகையை ஒவ்வொரு நாளும் ஒரு உணவைப் படைத்து ஒவ்வொரு தேவியாக வணங்க வேண்டுமென்கிற நடைமுறை வழக்கத்திலிருக்கிறது. அது குறித்த அட்டவணையைக் கீழே காணலாம்.

இது முத்துக்கமலம் இணைய இதழின் படைப்பு.