* ப்ரிய சகி
மார்கழியின் மன்மதக் கோலங்கள்
உன் புன்னகையின் மிச்சங்கள்

* காலத்தால் அழியாத கோலங்கள்
நம் இளமைக் காலங்கள்

* வண்ண வண்ணக் கோலங்களாய்
என் மனதில் உன் மௌனமொழிகள்

* உன் கொலுசொலிகள் - என் இதயத்தில்
விதைத்ததோ இன்னிசைக் கோலங்கள்

* உன் வாயிற்கோலங்களுக்குப் புள்ளிகளாய் நாமிருவர்
சுற்றிவரும் கோடுகளாய் சுற்றத்தார்

* நடுநிசியில் குடையைத் தேடுகிறேன்
பனிமழையில் நனையாமல் உன் கோலங்களுக்குக் குடைப்பிடிக்க

* உன்னை நான் பார்த்த போது - நாணத்தால்
உன் கால்விரல்கள் வரைந்த காதல் கோலங்கள்

* திருப்பாவை, திருவெம்பாவை எங்கும் ஒலிக்க
என் மனமோ தெருப்பாவை உன்னைத் தேடியது,

* கண்ணீர் மழை பெய்தும்
காணாமல் போகாத அழியாத கோலங்கள் உன்னகத்தே

* மார்கழியின் மாலையிலே அந்தி மேகங்களுக்கிடையில்
கதிரவனின் வண்ணக் கோலங்கள்

* கோலமிட்ட உன் கைகளுக்கு
கோடி கோடி முத்தங்கள்

* மாக்கோலம் போடும் மயிலே
நான் மணக்கோலம் காண்பது எப்போது?

இது முத்துக்கமலம் இணைய இதழின் படைப்பு.