புட்டிகளில் அடைத்துவிற்கும் குளிர்பா னங்கள்
     புதைத்துள்ளே வைத்திருக்கும் பலவாய் நோய்கள்
எட்டிநின்று பார்த்தாலோ அழகுக் கோலம்
     ஏந்தியதைக் குடித்தாலோ எமனின் பாலம் !
பட்டிதொட்டி எல்லாமே பரவி யின்று
     பார்த்தினியம் கருவேலம் போல நின்று
திட்டமிட்ட உலகமய சூழ்ச்சி யாலே
     தினம்உடலை அழிக்கிறது வயலைப் போல !

முன்னோர்கள் நமக்காக வளர வைத்து
     முடிமீது அமுதத்தின் கலசம் வைத்து
தென்னையெனும் மரந்தன்னைக் கண்கள் முன்பு
     தேர்ந்தெடுத்துப் பருகுதற்கு விட்டுச் சென்றார் !
அன்னைதரும் முலைப்பாலின் தூய்மை யோடும்
     அருஞ்சத்து நிறைந்திருக்கும் தன்மை யோடும்
பன்நோய்க்கு மருந்தாயும் இலங்கு கின்ற
     பசுங்காயின் இளநீர்க்கே மாற்று முண்டோ !

பதநீராய் விற்கின்றார் ! சாலை யோரம்
     பந்தலிட்டுக் குலைகுலையாய் அடுக்கி வைத்துப்
பதமாகத் தலைசீவி ஓட்டை யிட்டுப்
     பகல்பொழுதின் சூடுதனைத் தணிப்ப தற்கே
இதமாகத் தருகின்றார் ! இயற்கை யன்னை
     இளநீரை வளநீராய் அளிக்கும் போது
நிதமதனைப் பருகிடாமல் மேலை நாட்டின்
     நின்றழிக்கும் நச்சுநீரைப் பருக லாமா !

இது முத்துக்கமலம் இணைய இதழின் படைப்பு.