பசியுடன் காத்திருக்கும்
வரிசையில் பிச்சைக்காரர்கள்
கருவறையில் இறைவன்

*****

சாலையோர ஓவியம்
வரைந்ததும் விழுகிறது
வஞ்சிக்கும் மழை

*****

இலைகளில் தெரியும்
அழகிய ஓவியம்
இரையுண்ணும் வண்டு

*****

மழை ஓய்ந்த பின்
சாலைகளில் தென்படுகிறது
சிறு பெரு குளங்கள்

*****

வாசலில் மாக்கோலம்
அழகாய்த் தெரிகிறது
எறும்பின் வரிசை

*****

சாலையோரப் பிச்சைக்காரன்
பாத்திரத்தில் நிற்கிறது
இடைவிடாத மழைநீர்

*****

கடவுள் முகம் தெரிகிறது
கோவில் வாசலில்
நாய்க்கு இரையிடும் பிச்சைக்காரி

*****

தரையில் உருண்டோட
கோலம் வரைகிறது
சிறுவன் கழிக்கும் சிறுநீர்

*****

சிறை வாசலுக்கு
தினமும் வந்து போகும்
எசமானரைத் தேடி நாய்

*****

மழை இரவின் தனிமையில்
துணையாய் வருகிறது
தவளைகளின் சத்தம்

இது முத்துக்கமலம் இணைய இதழின் படைப்பு.