முந்தைய பதிவின் தொடர்ச்சி...

1930க்கு பிற்பட்ட காலம் இலங்கையின் தேசியக் கலைகளின் மறுமலர்ச்சிக்கு வித்திட்ட காலமாகும். தமிழகத்தில் இக்காலத்தே நடனமேதை ருக்மணிதேவி அருண்டேல் மற்றும் கலாமேதை கிருஷ் ஐயர் போன்றவர்கள் எவ்வாறு பரதக்கலை மீட்சியுற அரும்பணியாற்றினரோ அதேதன்மையில் இலங்கையிலும் கண்டிய நடனத்தின் மறுமலர்ச்சிக்கு திருமதி சித்திரலேகா மற்றும் திருமதி மரியன் டி சொய்சா ஆகியோர் பெரும் தொண்டாற்றினர். அவர்களைத் தொடர்ந்த காலத்தே கண்டிய நடன ஆசான்களாக விளங்கிய கிரிகணித குருநான்ஸே, ரங்கம குணமனாகுரு, தித்த சஜ்ஜல கரம்பகுரு, உக்குவ குரு போன்றவர்களும் பின்னர் கலாநிதி பணிபாரத, ரங்கனா மற்றும் இந்துள் கொடகே போன்றவர்களும் அவர்களை அடியொற்றி புதவத்தகுரு நான்ஸே, மிரண்டா ஹேமலதா, சித்ரா உல்கம, குணவதி துண்டலியத்த, கமலா நயன ரத்நாயக்க, மாலதி உல்கம போன்ற நடன மேதைகள் கண்டிய நடனத்தின் வளர்ச்சிப் போக்கில் பெரும் பங்காளிகளாகத் திகழ்கின்றனர். மேலும் R.W.G. சுறம்ப குருனான்ஸே, அவரது புத்திரி R.W.G. வைத்தியாவதி றாஜபக்சே, பொல்காவலயில் நடனப் பாரம்பரியத்தில் வந்த கலாமேதை பியசர சில்பாதிபதி போன்ற நாட்டியமேதைகளும் இதில் முக்கியத்துவம் பெறுகின்றனர்.

உலகப் புகழ்பெற்ற நடனக் கலைஞர் டாக்டர் சித்திரசேன டயஸ் சிங்கள மக்களது பாரம்பரிய நடனக் கலைகளின் புத்தாக்கத்திற்கு பெரும்பணியாற்றிய சிறப்பிற்கு உரியவராகின்றார். கண்டிய நடனத்தை அக்காலத்தே புகழ்பெற்ற நடன ஆசான்களான அல்கம கிரிகநிதய குருநான்ஸே, முத்தனாவே அப்புவ குருநான்ஸே மற்றும் பெவில்கமுவ குருநான்ஸே ஆகியோரிடம் முறையாகப் பயின்ற பின்னர் திருவாங்கூர் அரண்மனைக் கலைஞரான ஸ்ரீகோபிநாத் இடமும் பின்னர் கேரள கலாமண்டலத்திலும் கதகளியை முறையாகப் பயின்றார். 1945ல் கல்கத்தாவிலுள்ள கலாமேதை ரவீந்திரநாத்தாகூரின் சாந்திநிகேதனில் இணைந்து அங்கு பல்வேறு நடன நுணக்கங்களையும் கற்றுத் தேர்ந்தார். அங்கு பயின்ற காலத்தில் வட இந்தியாவின் பல்வேறு பகுதிகளுக்கும் சென்று நடன நிகழ்வுகளைச் செய்தார். கொழும்பு நகரில் 1944ல் ‘சித்ரசேன கலயதனய’ நடனப் பள்ளியை ஆரம்பித்தார். இக்காலத்தே இலங்கையின் தலைசிறந்த கலைஞர்கள் பலர் சித்தரசேனவுடன் இணைந்து பணியாற்றினர். சித்ரசேனவின் பாரியார் கலாசூரி வஜிரா சித்ரசேன, ஆனந்த சமரக்கோன், சதிரிஸ் சில்வா, அமரதேவா, சுனில் சந்தா, ஹென்றி ஜெயசேன, சோமபந்து, எட்வின் சமரதிவகர, W.B.மகுலொலுவ, லயனல் அல்கம, சோமதாஸ எல்விட்டிகல, R.L. விமலதர்ம, செல்ரன் பிரேமரத்ன போன்ற தலைசிந்த கலாவித்தகர்கள் இதில் அடங்குவர். 1943ல் ராமா சீதா நாட்டிய நிகழ்வு மூலம் ஆரம்பித்த இவரது கலைப்பயணம் 1986ல் நிருத்த பூஜா நாட்டிய நிகழ்வுவரை தடையின்றித் தொடர்ந்தது. அனைத்து நிகழ்விலும் சித்ரசேனாவே முக்கிய பாகமேற்று ஆடினார்.



இவரின் ஆக்கப்பணிகளில் கண்டிய நடனத்தை மேடைகளில் ஆடுவதற்கு ஏற்றவாறு அமைத்ததுடன் தனது மேடை நடன நிகழ்வுகளில் கண்டிய நடன அசைவுகளையும் ஏனைய அம்சங்களையும் பயன்படுத்தியமை மிகுந்த முக்கியத்துவம் பெறுவதாகும். மக்கள் மத்தியில் இவருக்கிருந்த புகழும் செல்வாக்கும் இந்நடனம் தொடர்பாக இருந்துவந்த சாதியத் தடைகளை உடைப்பதற்கு உதவியதுடன் கண்டிய நடனத்தை நகர்ப்புற மக்களும் சுவைஞர்களும் ஏற்றுக்கொள்ளத்தக்க வகையில் நவீனத்துவப்படுத்த உதவியது. இவர் நிறுவிய நடனப்பள்ளி இன்றுவரை பெரும் பணியாற்றிக்கொண்டிருப்பதை இங்கு முக்கியமாகக் குறிப்பிட்டாகவேண்டும்.

இலங்கையில் நாட்டியக் கலையின் மறுமலர்ச்சியல் சித்ரசேனவின் பங்களிப்பு இமயம் நிகர்த்தாகும். அவருக்கு கிடைத்த தேசமான்ய, கலாபூஷண், கலாகீர்த்தி, கலாசூரி, களனிப் பல்கலைக்கழகத்தின் டாக்டர் பட்டம் போன்ற உயர்விருதுகள் அவரின் மறைவுக்குப் பின்னரும் பெருமை சேர்ப்பனவாகும்.26

கண்டிய நடனமானது இன்று இலங்கையில் அரசின் முழு ஆதரவுடன் பல்கலைக்கழகங்களிலும் உயர்கல்வி நிறுவனங்களிலும் பொதுவாக எல்லாச் சிங்கள மொழிப் பாடசாலைகளிலும் பயிற்றுவிக்கப்படுவதோடு தனியார் நடன நிலையங்களும் இந்நடனத்தை போதிக்கவே செய்கின்றன. கடந்த அரை நூற்றாண்டுகாலக் கணிப்பில் இந்நடனம் பாரிய வளர்ச்சியை எட்டியுள்ளமை அதன் சிறப்பியல்பை தொடர்ந்தும் வெளிப்படுத்துமெனலாம்.



அடிக்குறிப்புகள்:

01. Paranavitana S, EZ volume III -London 1943, page: 191- 196
02. Ibin Batuta, Te Rehla - Broda pp:223- 224
03. கவிக்கோ வெல்லவூர்க்கோபால், மட்டக்களப்பு வரலாறும் வழக்காறும்,மனுவேதா, மட்டக்களப்பு, 2013 - பக்:158
04. Mahuloluwa W B, Dances of Ceylon - p:32
05. Sarachandra E R, Folk Drama of Ceylon 1966- P:15
06. பொலநறுவை வானவன் மாதேவி ஈஸ்வரம் கல்வெட்டு
07. Sarachandra ER, Folk Drama of Ceylon, 1966 p:6
08. -do-
09. கங்கை முத்துப்பிள்ளை, நடனாதி வாத்ய ரஞ்சனம் - திருநெல்வேலி 1893
10. ஆனந்த குமாரசுவாமி, கட்டுரை, சித்தாந்த தீபிகை 1912
11. Sarachandra ER, Folk Drama of Ceylon, 1966
12. Mahavamsam 10,87
13. Mahavamsam 24,25,31,37
14. Chulavamsam 70- 31
15. -do- 64-4, 69 - 22, 26
16. Ragavan.M.D, Sinhala Natum - Colombo P:24
17. -do- P: 22,23
18. -do- P: 31,32
19. Wickramasingha Martin, Sinhala Liturature, Colombo P:174
20. Ragavan M.D, Sinhala Natum, Colombo, P:33
21. Sarathchandra E.R, The Folk Drama of Ceylon, Colombo - 1969 P:11
22. லீலாம்பிகை செல்வராஜா, நடன சாரம் - யுனி ஆர்ட்ஸ் 2001 பக்:182,183
23. சிவசாமி,வி,பேராசிரியர், இலங்கையின்வெளி சாஸ்திரிய நடனங்கள் பக்: 05, ஏழாலை 2011
24. Almut Jayaweera - Vannama:A Clasical Dance Form and its Musical Structure P:1
25. சிவசாமி,வி.பேராசிரியர; தென்னாசிய சாஸ்திரிய நடனங்கள்.1998 பக்: 115)
26. Coomaraswamy Rathika. The Art of Chithrasena. Tamil Week News 2006.

முற்றும்

*****

இது முத்துக்கமலம் இணைய இதழின் படைப்பு.