பண்டைய கால வரலாற்றை அறிய நமக்குப் பெரிதும் உதவுபவை சங்க இலக்கியங்கள். சங்க இலக்கியங்கள் மன்னர்களின் வரலாறு, ஆட்சிமுறை, போர், கொடைச்சிறப்பு, அவர்களின் வீரத்தன்மை ஆகியவற்றை நமக்குப் படம் பிடித்துக் காட்டும் காலக்கண்ணாடி ஆகும்.

குறுந்தொகைப் பாடல்களில் வரலாற்றுக் குறிப்புகள் அதிகளவில் இடம் பெற்றுள்ளன. சங்க காலம் தொட்டு தமிழ்நாட்டு வரலாற்றை ஆய்பவர்க்கு இது பெரிதும் துணை செய்கிறது. உரையாசிரியர்கள் இக்குறிப்புகளுக்குத் தக்க விளக்கங்கள் தந்துள்ளனர். அதியமான், ஓரி, ஆய் அன்டிரன், பாரி, காரி ஆகிய வள்ளல்கள் பற்றிய குறிப்புகள் ஆங்காங்கே இடம் பெற்றுள்ளன.

போரிலே புறங்கொடுக்காத யானைப் படைகளை உடையவன். பெரிய தோளையும் உடையவன். அவனுடைய போர்க்களத்தின் பக்கத்திலே உள்ள ஊரில் வாழ்கின்றவர்கள் இராக்காலத்திலே தூக்கமில்லாமல் விழித்திருப்பார்கள். அச்சமே அவர்களுக்கு உறக்கத்தைக் கெடுக்கும் என்று அதியமான் அஞ்சியின் சிறப்புகளை இப்பாடல் அடிகள் மூலம் அறிந்து கொள்ள முடிகிறது.

அதியமான் அஞ்சியின் கொடைச் சிறப்பைப் பற்றி சிறுபாணாற்றுப்படையிலும் அறிய முடிகிறது.

“கமழ்பூஞ் சாரல் கவினிய நெல்லி
அமிழ்துவிளை தீங்கனி ஔவைக்கு ஈந்த
உரவுச்சினம் கனலும் ஒளிதிகழ் நெடுவேல்
அரவக்கடல் தானை அதிகனும்”

அதியமான் நெடுமான் அஞ்சி, அதியன், அஞ்சி என்ற பெயர்களைக் கொண்ட அதிகன், தன் பெருமைமிக்க மலையில் மலர்கள் மணம் கமழும் பக்கமலையில் அமிழ்து போன்ற சுவையான நீண்டநாள் வாழும் தகைமை வாய்ந்த நெல்லிக்கனியைத் தான் உண்டு நீண்டநாள் வாழவேண்டுமென்று நினைக்காது, ஔவையார் என்ற புலவருக்குக் கொடுத்தான். வலிமையும் சினமும் நன்னெறியும் ஒளி பொருந்திய நீண்ட வேலையுடையவன் ஆரவாரமுடைய கடல் போன்ற படையையும் கொண்டவன்.

ஓரி கடையெழு வள்ளல்களில் ஒருவன், சிறந்த வில் வீரன், கொல்லிமலைக்கு உரிமையானவன். அம்மலையின் மேற்புறம் அழகிய கொல்லிப்பார்வை இருந்தது என்பதை,

“வல்வில் ஓரிக் கொல்லிகுடைவரைப்
பாவையின் மடவந்தனளே
மணத்தற்கு அரிய பணைப்பெருந்தோளே”

சிறு குடியினர் தங்களுக்கு உணவு கிடைக்காமல் பசியால் வாடும் போது தங்களிடம் உள்ள யானைத் தந்தத்தை விலைக்கு விற்பார்கள். அத்தந்தத்தின் அருமையை அறியாமல் வந்த விலைக்கு மலிவாக விற்று விடுவார்கள். அத்தந்தம் விற்றுக் கிடைத்த விலையைக் கொண்டு உணவுப் பொருளை வாங்கி உண்பார்கள். இத்தகையவர்கள் வாழ்கின்ற கொல்லிமலை வலிமையான வில்லையுடைய ஓரி என்னும் வீரனுக்கு உரிமையுள்ளது. அந்த மலையின் மேற்குப் பக்கத்திலே உள்ள கொல்லிப் பாவையைப் போன்ற அழகுடையவள் என் காதலி அவளுடைய நல்ல தோள்களை இனித் தழுவ முடியாதென்றே நினைக்கின்றேன். இன்னும் நான் இங்கே காத்திருப்பதில் பயனில்லை. நமது இடத்துக்குத் திரும்ப வேண்டியது தான் என்று தலைவன் கூறுவதாக இப்பாடல் அமையப் பெற்றுள்ளது.

“நறும்போது கஞலிய நாகுமுதிர் நாகத்துக்
குறும்பொறை நன்னாடு கோடியர்க்கு ஈந்த
காரிக் குதிரைக் காரியொடு மலைந்த
ஓரிக்குதிரை ஓரியும் எனவாங்கு”

வல்வில் ஓரி ஆதனோரி என்று அழைக்கப்பெறும் ஓரி கொல்லிமலைத் தலைவனாக விளங்கியவனாவான். சுரபுன்னை மரங்கள் மிகுதியாக உள்ள மலை, நெருங்கிய கிளைகளில் மணம் மிகுந்த மலர்கள் நெருக்கமாக அச்சுரபுன்னை மரங்களில் பூத்திருந்தன. பலசிறு மலைகளை (பொற்றைகளை) யுடைய தனது நல்லவளமுடைய நாட்டைக் கூத்தாடுவோர்க்குக் கொடுத்தவன் ஓரி. அவன் காரிக் குதிரையையுடைய மலையமான் திருமுடிக்காரியுடன் போரிட்ட ஓரிக் குதிரையையுடைய ஓரி என்ற செய்தியை அறிந்து கொள்ள முடிகிறது.

ஆய் அண்டிரன் பொதியமலையின் தலைவன் என்பதையும் மலையில் வேங்கையும், காந்தளும் மலர்ந்து மணம் வீசும் என்பதையும் அறிகிறோம். இவன் கடையெழு வள்ளல்களில் ஒருவன்,

“கழல்தொடி ஆ அய்மழை தவழ் பொதியில்
வேங்கையும் காந்தளும் நாறி”

என் மகள் மீது எப்பொழுதும் நறுமணம் வீசிக் கொண்டேயிருக்கும். ஆய் என்னும் வள்ளளுக்கு உரிமையான பொதிகை மலையிலே உள்ள வேங்கை மலரும், காந்தள் மலரும் மிகவும் நறுமணம் கமழ்கின்றவை. அவற்றின் நறுமணத்தை என் மகளிடத்திலே காணலாம். அன்றியும், ஆம்பல் மலரைக் காட்டிலும் குளிர்ச்சியான மேனியை உடையவன். அவன் இன்றிரவு என் அண்டையிலே படுத்திருந்த போது அன்புடன் அவளை அணைத்து முத்தமிட்டேன் என்ற செய்தியை அறியமுடிகிறது.

மேலும் சிறுபாணாற்றுப் படையில் ஆய் அண்டிரனின் சிறப்பியல்புகள் எடுத்துக் கூறப்பட்டுள்ளன.

“நீல நாகம் நல்கிய கலிங்கம்
ஆலமர் செல்வர்க்கு அமர்ந்தனன் கொடுத்த
சாவம் தாங்கிய சாந்துபுலர் திணிதோள்
ஆர்வ நன்மொழி ஆயும்”

வேள் ஆய், ஆய் அண்டிரன் என்றும் அழைக்கப் பெற்றான் ஆய். வில்லைத் தாங்கிய சந்தனம் பூசிய திண்மையான தோள்களையுடையவன் ஆய். நற்சொற்களை விரும்பி பேசுபவன். கல்லால நிகலில் இருந்த இறைவன் சிவனுக்கு மகிழ்வோடு நாகம் ஈன்ற நீல மணியையும், ஆடையையும் கொடுத்துத் தன்னுடைய கொடைத் தன்மையை புலப்படுத்தியதையும் அறிய முடிகிறது.

கொல்லிமலை சேரர்கட்குச் சொந்தமானது. கொல்லிப்பாவை அம்மலையில் அமைந்திருந்தது.

“பெரும்பூண் பொறையன் பேஎழுதிர் கொல்லிக்
கடுங்கண் தெய்வம் குடவரை எழுதிய
நல்லியல் பாவை … … … … … ”

கொல்லிமலை சிறந்த அணிகலன்களையுடைய சேரனுக்கு உரிமையுள்ளது. அந்த மலையிலே வாழ்கின்ற தெய்வம் பிறருக்கு அச்சத்தைத் தரும் தன்மையுடையது. கரிய கண்களையுடையது அத்தெய்வம் என்பதை அறிய முடிகிறது.

தொண்டி மேற்கு கரையில் உள்ள நகரம் இதுவும் சேரர்களுக்குச் சொந்தமானது என்பதை,

“திண் தேர்ப் பொறையின் தொண்டி முன்துறை”

என்ற பாடல் அடிமூலம் அறிய முடிகிறது.

உறையூர் என்பது உறந்தை என்று அழைக்கப்படுகிறது. இது சோழர்களின் தலைநகர். இதற்குப் பக்கத்தே காவிரியாறு ஓடுகிறது என்பதை,

“வளங்கெழு சோழர் உறந்தைப் பெருந்துறை”

என்ற பாடல் அடிமூலம் அறியமுடிகிறது.

கடையெழு வள்ளல்களில் பாரியும் ஒருவன் ஆவான்.

“பாரி பறம்பில் பனிச்சுனைத் தெண்ணீர்”

பாரி வள்ளல் வாழ்ந்த மலை பறம்பு மலை ஆகும். அந்த மலையிலே இருந்த சுனைநீர் மிகவும் இனிமையாகவும், குளிர்ச்சியும் உடையது. அதுவும் தை மாதத்துக் குளிர்ச்சியான நீரைக் கொடுத்தாலும், அது உமக்குப் பிடிக்கவில்லை என்ற செய்தியை அறியமுடிகிறது.

பாரியின் கொடைத்தன்மை பற்றியும், சிறப்புகளையும் சிறுபாணாற்றுப்படை காட்டுகிறது என்பதை,

“நறுவீ உறைக்கும் நாக நெடுவழிச்
சிறுங் முல்லைக்குப் பெருந்தேர் நல்கிய
பிறங்கு வெள்ளருவி வீழும் சாரல்
பறம்பின் கோமான் பாரியும்”

பறம்பு மலைத் தலைவன் பாரி, பல அருவிகள் விழும் வளமுடையது அம்மலை. சுரபுன்னையையும் முல்லைக் கொடிகளையும் உடையது அம்மலை. வண்டுகள் உண்ணும் தேன் பிலிற்றுகின்ற சிறிய மலர்களையுடைய முல்லைக் கொடி கொழுகொம்பு இன்றிப்படரத் தவித்தது தன் பெரிய தேரையே அக்கொடி படரக் கொடுத்த வள்ளல் பாரி என்பதை அறிந்து கொள்ள முடிகிறது.

கடையெழு வள்ளல்களில் மலையன் என்பானும் ஒருவன். இவனுடைய முழுப்பெயர் மலையமான் திருமுடிக்காரி என்பதாம்.

“… … … … … அடும்போர்
எஃகு விளங்கு தடக்கை மலையன் கானத்து
ஆரம் நாறும்… … … … … ”

பகைவரைக் கொள்ளும் வேற்படையையுடையவன் மலையமான் திருமுடிக்காரி என்பவன். அவனுடைய முளிர்க் கானம் சிறந்த செல்வங்களையுடையது. செழிப்புள்ளது அக்கானத்திலே வளர்ந்த சந்தன மரங்கள் மிகுந்த நறுமணம் தருவன என்ற செய்தியை அறிய முடிகிறது.

குறுந்தொகையில் வரலாற்றுச் செய்திகள் என்ற கட்டுரையில் கடையெழு வள்ளல்களில் இடம் பெறுகின்ற பாரி, காரி, ஓரி, ஆய் அண்டிரன், அதியமான் போன்றோரின் கொடைத்தன்மை, வீரம், போர்ப்படைகளின் சிறப்பு, பண்பு நலன்கள் ஆகிய செய்திகள் கூறப்படுகின்றன.

வேளீர், கொங்கர் மற்றும் இது போன்ற குறுநில மன்னர்களின் சிறப்புகள் இந்த கட்டுரையில் கூறப்பட்டுள்ளது.

*****

இது முத்துக்கமலம் இணைய இதழின் படைப்பு.