நுகர்வோர் பாதுகாப்புச் சட்டம் (The Consumer Protection Act, 1986) நுகர்வோரின் உரிமைகளைப் பாதுகாக்கவும், குறைபாடுள்ள பொருட்கள் அல்லது சேவைகள், நியாயமற்ற வணிக நடைமுறைகள் போன்றவற்றில் இருந்து அவர்களுக்கு பாதுகாப்பு அளிக்கவும் உருவாக்கப்பட்ட சட்டமாகும். பல் மருத்துவர்களின் அலட்சியம் அல்லது கவனக்குறைவு அல்லது அசட்டை அல்லது புறக்கணிப்பு அல்லது அக்கறையின்மை காரணமாக பல் மருத்துவ நோயாளிகளுக்கு ஏற்படும் மருத்துவச் சிக்கல்களை நுகர்வோர் நீதிமன்றம் கவனமாக ஆராய்கிறது.

* பல் பிடுங்கும் போது நோயாளியின் தாடை முறிவு அல்லது விரிசல் விடுதல்

சண்டிகாரில் ஒரு நோயாளிக்கு அறிவுப்பல்லை அகற்றும் போது நோயாளியின் தாடை முறிந்தது. இதனைச் சிகிச்சையின் போது பல் மருத்துவர் கண்டுபிடிக்கவில்லை. இதனை மாவட்ட நுகர்வோர் குறைதீர்ப்பாயம் (District Consumer Disputes Redressal commission DCDRC) விசாரித்துத் தொடர்புடைய பல் மருத்துவர் சார்ந்த பல் மருத்துவமனைக்கு ஒரு லட்சம் ரூபாய் அபராதத்தை அறிவித்தது.

* கவனக்குறைவான பல் அகற்றல் பல் மருத்துவச் சிக்கல்களுக்கு வழி வகுக்கும்

கோயமுத்தூரில் ஒரு பல் மருத்துவர் தனது நோயாளியின் சொத்தைப்பல் பிடுங்கும் போது கவனக்குறைவாகச் செயல்பட்டு நோயாளிக்கு அதீதவலி, சீழ் கோர்ப்பு, ஆரோக்கியமான பல் இழப்பு, இரத்த நாளத்தில் இரத்தக் கசிவு ஏற்படுத்தினார். அதனை விசாரித்த நுகர்வோர் நீதிமன்றம் கோவை பல் மருத்துவருக்கு ஒரு லட்சம் அபராதம் விதித்தது.

* நோயாளிக்குப் பல் கிளிப் பொருத்தும் போது பல் சேதம்

பெங்களூருவில் ஒரு பல் நோயாளி பல் மருத்துவரிடம் தனது புன்னகையை மேம்படுத்த வேண்டினார். பல் கிளிப்புகள் பொருத்தப் பட்டன. அதனால் பல் எனாமல் சேதாரம் மற்றும் ஈறுகள் காயம் ஏற்பட்டது. பல் கிளிப்பும் முரட்டுத்தனமாக அகற்றப்பட்டது. நுகர்வோர் நீதிமன்றம் விசாரித்து பல் மருத்துவருக்கு இரண்டு லட்சம் அபராதமும் விதித்தது. அத்துடன் பல் மருத்துவக் கட்டணத்தை முழுமையாக திருப்பித் தர உத்தரவிட்டது.

வெள்ளிக் குவியல்கள் “அன்னையின் கருணையது சிரிப்பினில் விளங்கும்! அழகும் பொலிவும் பொழிந்திடும் தூறலாய் அன்பான சொற்கள் மகிழ்விக்கும் சாரலாய் அனைத்தையும் தகர்த்திடும் வல்லமை சிறு சிரிப்பிற்குண்டு மனதிற்கு பிடித்தமானவர்களின் புன்னகை பரவசப்படுத்தும் மீளாவழகு மீண்டும் உதயமாகும் வெள்ளிச் சிரிப்பினில் பால் பற்கள் முளைத்த சிறு குழந்தையின் சிரிப்பு நட்சத்திரங்களாய் மின்னும் வெள்ளிக் குவியல்கள்.” --கவிஞர் செந்தாமரை

* வேர் சிகிச்சையின் போது மருத்துவ உபகரணத்தின் சிறு பகுதி சிக்கிக் கொள்ளுதல்

வேர் சிகிச்சை செய்யும் போது பல் மருத்துவர்கள் மறதியாய் அல்லது கவனக்குறைவாய் வேர் கால்வாய் சிகிச்சை ரீமர்கள் அல்லது ஊசிகளை ஈறுகளில் விட்டு விடுகின்றனர். அப்படி விட்டு விடுதலால் சில மருத்துவ பிரச்சனைகள் ஏற்பட்டன என்பதனை நுகர்வோர் நீதிமன்றம் முன் பல் நோயாளி நிரூபிக்க வேண்டும். புகார் மனுவை குறிப்பிட்டத் தேதிக்குள் நீதிமன்றத்தில் சமர்ப்பித்திருக்க வேண்டும். இக்குற்றம் நிரூபிக்கப்பட்டால், ஒரு பெரிய தொகை பல் மருத்துவருக்கு அபராதமாய் விதிக்கப்படும்.

* பல் பிடுங்கும் போது அலட்சியத்தால் நோயாளி மரணம்

மதுரையில் உள்ள ஒரு மருத்துவமனையில் ஒரு நோயாளிக்கு சொத்தைப்பல் பிடுங்கப்பட்டது. நுகர்வோர் நீதிமன்ற விசாரணையில் தொடர்புடைய பல் மருத்துவர் பல் பிடுங்கும் முன் நோயாளிக்கு தேவையான மருத்துவ சோதனைகளைச் செய்யவில்லை என கண்டறிந்தது. இறந்தவரின் மனைவிக்கு நீதிமன்றம் 10 லட்சம் ரூபாய் நஷ்ட ஈடு வழங்கியது.


* தகுந்த கல்வித்தகுதி இல்லாமல் பல்மருத்துவம் பார்த்தல்

ஒரு பல் மருத்துவர் இளங்கலை பல்மருத்துவம் மட்டும் படித்திருந்தால் போதாது. அவர் நோயாளிக்கு எவ்வகை சிகிச்சை செய்கிறாரோ அதன் தொடர்பான முதுகலைப் பட்டமும் பெற்றிருக்க வேண்டும். பல் சீரமைப்பு மருத்துவம் செய்வதற்கு ஒரு மருத்துவர் முதுகலை பல் சீரமைப்பு மருத்துவம். படித்திருத்தல் வேண்டும். அதனால்தான் சில பல் மருத்துவமனைகளில் அந்த மருத்துவர் படிக்காத பிரிவுகள் சார்ந்த நோயாளி சிகிச்சைக்கு வந்தால் ஒரு சிறப்பு மருத்துவரை அழைத்து சிகிச்சை தரச் சொல்லுவார். நோயாளி தரும் கட்டணத்தை இரு மருத்துவர்களும் அவர்களுக்குள் ஏற்படுத்திக் கொண்ட உடன்பாட்டின்படி பகிர்ந்து கொள்வர்.

* நுகர்வோர் நீதிமன்றம் ஒரு வழக்கு விசாரணையில் கவனிக்கும் செயல்பாடுகள்

ஒரு குறிப்பிட்ட மருத்துவச் சிகிச்சை அளிக்கும் முன் பல் மருத்துவர் நோயாளியிடம் கீழ்க்கண்ட செயல்களைப் பற்றி விவாதித்திருக்க வேண்டும்.

* சிகிச்சை அளிக்கப்படும் முறைக்கு நோயாளியின் ஒப்புதல்.

* சிகிச்சையில் ஏற்படக்கூடிய பின் விளைவுகள் பற்றி அறிவுறுத்தல் மற்றும் கலந்துரையாடல்.

* மாற்று சிகிச்சை முறை பற்றி அலசுதல்

இவை அனைத்தும் செய்யப்பட்டாமல் அவசரமாக ஒரு சிகிச்சையை மேற்கொள்ளுதல், சிகிச்சை குறைபாடாகக் கருதப்படும்.

* ஆவணப்படுத்துதல்

நோயாளி தொடர்பான தகவல்களை முழுமையாக ஆவணப்படுத்துதல்.

* நோயாளியின் பெயர் / பாலினம்/ தொழில்/ கல்வி / முகவரி / திறன்பேசி எண் விவரம்.

* சிகிச்சை திட்ட வரைகள்.

* ரேடியோகிராப்ஸ்

* சிகிச்சைக்கு நோயாளி ஒப்புதல் தெரிவித்த கடிதம்

* நோயாளியின் உயர்இரத்த அளவு, சர்க்கரை அளவு. ஆவணப்படுத்துதல் (இவை முறையாக இருந்தால் ஒரு மருத்துவருக்கு நுகர்வோர் நீதிமன்றப் பிரச்சனைகள் வராது)

* வல்லுநர் கருத்து - ஒரு பல்மருத்துவரின் மீது புகார் வந்தால் நுகர்வோர் நீதிமன்றம், மருத்துவக்குழு, மாநில பல் மருத்துவர் குழு வல்லுநர்களின் கருத்துகளைக் கேட்டறியும்.

* ஆதாரங்களின் அடிப்படையில்தான் தீர்ப்பு

ஒரு பல் மருத்துவரின் மீது புகார் தரப்பட்டால் புகாரை நிரூபிக்க வேண்டிய கட்டாயம் புகார்தாரரின் மீதுதான். சிகிச்சைக்கு பின் ஏற்பட்ட மருத்துவச் சிக்கல்களுக்கு காரணம் பல் மருத்துவரின் அலட்சியம் அல்லது கல்வித்தகுதிக் குறைவு என்பதனை நோயாளி நிரூபிக்க வேண்டும்.

* நுகர்வோர் பாதுகாப்புச் சட்டம்

பல் மருத்துவச் சிகிச்சைகளில் (இந்தியாவிற்குள் செய்யப்பட்டவை) உள்ள குறைபாடுகளை நுகர்வோர் பாதுகாப்புச் சட்டம் முழுமை செய்கிறது. நோயாளிகளுக்கான மாற்று வழிமுறைகளை நுகர்வோர் நீதிமன்றம் வழங்கும்.

பல் மருத்துவமும் நுகர்வோர் பாதுகாப்பும் மஞ்சுளா கிருஷ்ணன், மதுரை. பல் மருத்துவர் சேவைக் குறைபாட்டிற்காக, நுகர்வோர் நீதிமன்றங்களில் அபராதம் உள்ளிட்ட சில தண்டனைகளைப் பெற வேண்டியிருக்கும் நிலையில், புதிதாகப் படிப்போர் பல் மருத்துவம் படிப்பதற்கு பதில் வேறு ஏதாவது படிக்கலாமே? மருத்துவர்கள் ஆ. நிலாமகன் மற்றும் பஹிமா: நுகர்வோர் பாதுகாப்புச் சட்டமென்பது நுகர்வோர் பிரச்சனைகள், சேவை குறைபாடு, வணிக நடைமுறை, நேர்மையற்ற வணிகமுறை போன்றவற்றிற்கு தீர்வு தரும் சட்டமாக உள்ளது. இதே போன்று மருத்துவக் குறைபாடுகள், வங்கிகள், வீடு கட்டிக் கொடுப்பவர் பிரச்சனைகள் மற்றும் பொருள்கள் தரத்தில் உள்ள குறைபாடுகள் போன்றவற்றை உள்ளடக்கிய சிக்கல்களுக்கு நீதி பெற நுகர்வோர் நீதிமன்றத்தை அணுகலாம். இதனடிப்படையில் பெரும்பான்மையான பணிகள் நுகர்வோர் பாதுகாப்புச் சட்டத்தின் கீழ் நடவடிக்கைகளுக்குள் இடம் பெற்றிருக்கின்றன. இலவசமாக பெறும் சேவை மற்றும் தனிப்பட்ட சேவை ஒப்பந்தத்தின் கீழ் உள்ள சேவைக்கும் பொருந்தாது. எந்தவொரு தொழிலையும் தவறின்றி செய்து வந்தால், எந்தவொரு பயமும் தேவையில்லை என்பதை நினைவில் கொண்டு செயல்பட வேண்டும்.

ஒரு பொது மருத்துவர் அல்லது சிறப்பு மருத்துவர் ஒரு சிறிய அறையில் நோயாளிகளைப் பார்த்து, மருந்துகளைப் பரிந்துரைக்கலாம். ஆனால், ஒரு பல்மருத்துவரின் மருத்துவச் சேவை கடினமானது. ஒரு பல் நோயாளிக்குத் தேவையான வலி தீர்வு, பல் நோயிலிருந்து விடுபடச் செய்தல் போன்றவைகளைச் சிறப்பாக செய்யத் தெரிந்த பல் மருத்துவர்களே தங்கள் தொழிலில் வெற்றி பெறுகின்றனர். ஒரு நோயாளியின் அவசரத்துக்கு ஒரு பல் மருத்துவர் கவனமின்றி செயல்பட்டுவிடக் கூடாது.

ஐம்பது வயதுக்கு மேற்பட்ட எடை அதிகமுடைய ஒருவர் பல் மருத்துவரிடம் சிகிச்சைக்கு வந்தால், அவரின் இரத்த அழுத்தத்தையும், சர்க்கரையையும் கண்டறிந்து அவருக்குச் சிகிச்சை அளிக்க வேண்டும். நோயாளிக்குச் சிகிச்சை தரும் முன்பு அவரது முழு உடல் நலம் குறித்தும் முழுமையாக அறிந்து கொள்ள வேண்டும். சில வேளைகளில், அப்பகுதியில் பல் மருத்துவத் தொழில் செய்து வருபவர்கள், தங்களது மருத்துவமனைக்கு ஒரு நோயாளியை அனுப்பி, அவரின் வழியாகத் தங்களுக்கு அச்சுறுத்தலை ஏற்படுத்தக்கூடும். நோயாளியின் உடல் மொழியை உள்நோக்கத்தை கணிக்கத் தெரிந்திருக்க வேண்டும்.

ஒரு நோயாளி உங்களிடம் வருவதற்கு முன் வரவேற்பாளர், மருத்துவ உதவியாளர் ஆகியோரைக் கொண்டு முழுமையாக அவரைப் பற்றி விசாரித்துத் தெரிந்து கொள்ள வேண்டும்.

(தொடரும்...)

*****

இது முத்துக்கமலம் இணைய இதழின் படைப்பு.