துபாயில் பயணத்தைத் தொடங்கும் முன்பாக, துபாய் தொடர்பான சில சுவையான தகவல்களைத் தெரிந்து கொள்ளலாம்.

* துபாய் காவல்துறை சாலைப் போக்குவரத்தைக் கண்காணிக்க, மேம்படுத்த ஹோவர் பைக் எனும் கருவியைக் கண்டுபிடித்துள்ளது. ஹோவர் சர்ப் தொழில்நுட்பம் தரைக்கு ஐந்து மீட்டர் உயரத்தில் மணிக்கு 70 கி.மீ வேகத்தில் பறக்கும். இது மின்சக்தியால் இயங்கும். ஒரு தடவை மின்னூட்டம் செய்தால் 25 நிமிடம் வரை பறக்கும்.

* துபாய் அரசு 35 பில்லியன் அமெரிக்கன் டாலர் செலவில் 400 வாசல்களுடன் கூடிய ஒரு புதிய பிரமாண்டமான விமான நிலையத்தைக் கட்டுமான செய்ய இருக்கிறது.

* துபாயில் உள்ள ஒரு நபரின் போர்ஷே காரின் டேஷ்போர்டில் தங்கத்தில் அல்ஹம்துல்லில்லாஹ் என செதுக்கப்பட்டுள்ளது. இந்த வார்த்தை காருக்குள் யாரும் தீய வார்த்தை பேசாமல் பாதுகாக்கும். இதனால், இந்த காரை ஒரு ஹலால் போர்ஷே கார் என அழைக்கின்றனர்.

* துபாயின் ஜிடிபி 117 பில்லியன் அமெரிக்கன் டாலர்கள். மும்பையின் ஜிடிபி 278 பில்லியன் அமெரிக்கன் டாலர்கள்.

* யுனைடெட் அரபு எமிரேட்ஸ் 145 ஜிபிஎஸ் வேகத்தில் 6ஜி இணைப்புகளை விரைவில் தர இருக்கிறது. இதன் மூலம் 9 சினிமாக்களை ஒரே நொடியில் பதிவிறக்கம் செய்யலாம்.

* துபாய் அரசாங்கம் துபாய் தெருக்களில் இலவச உணவு குளிர்சாதனப் பெட்டிகளை நிறுவுகிறது. இதனால் ஆயிரக்கணக்கான ஏழைகள் பயனடைவர்.

* துபாய் அரசு கடல் நீரைக் குடிநீராக்கி தினம் 20 லட்சம் பேருக்கு குடிநீர் வழங்க இருக்கிறது.


* துபாயில் இந்த ஆண்டு இறுதியில் திறக்கப்பட உள்ள Ciel Dubai Marina என்கிற ஹோட்டலின் 76 ஆவது மாடியில் Tattusky Pool எனும் நீச்சல் குளம் அமைய இருக்கிறது. இந்த 310 மீட்டர் உயரக் குளம் உலகின் உயரமான முடிவிலிக் குளம் (Infinity Pool) என்று சொல்லலாம்.


* துபாயில் அதிவிரைவில் நிழலான குளிர் பதனமூட்டப்பட்ட நடைபாதைகளை அமைக்க உள்ளனர். அபுதாபியில் ஏற்கனவே அமைத்திருக்கின்றனர்.

* துபாய் காவல்துறை ஒரு பயோமெட்ரிக் சுரங்கப்பாதை அமைக்க இருக்கிறது. அந்தச் சுரங்கப்பாதையில் யார் நடந்தாலும் ஐந்தே நொடிகளில் அந்த மனிதரின் அடையாளத்தைக் கண்டுபிடித்து விடலாம். செயற்கையறிவையும் இயந்திர அறிவையும் வைத்து நகரும் கைரேகையைத் துல்லியமாக கணிக்கலாம். இது தடயவியல் விசாரணைக்கும் துபாயின் ஒட்டுமொத்தப் பாதுகாப்புக்கும் உதவும்.

* துபாயில் 81 ஆயிரம் கோடீஸ்வரர்கள், 237 மில்லியனர்கள், 20 பில்லியனர்கள் உள்ளனர்.

* நீண்ட நாட்களுக்குப் பின் எத்திஹாத் ரயில் பயணிகள் சேவை 2026 ஆம் ஆண்டில் தொடங்க இருக்கிறது. இது ஐக்கிய அரபு எமிரேட்ஸ் நாடுகளின் தேசியத் தொடருந்துத் திட்டத்தின் ஒரு முக்கிய மைல்கல். மொத்தம் 900 கி.மீ நீளம். அல்சிலா முதல் ஃபுஜைரா வரை ஏழு எமிரேட்ஸ்களின் 11 நகரங்களை இந்தத் தொடருந்துப் பாதை இணைக்கிறது. அபுதாபி, துபாய், ஷார்ஜா, அல்தெய்த், அல்மிர்பா மற்றும் அல் குவைஸ் நகரங்களின் போக்குவரத்துடன் இணையும்.

சரி நம் சுற்றுப் பயணத்தைப் பற்றிப் பார்க்கலாம்.

- ஓட்டல் வரவேற்பாளரைத் தீர்க்கமாகப் பார்த்தார் ஆர்னிகா.

“நீ கேரளாக்காரன் தானே? உனக்கு தமிழ் தெரியும் தானே?”

“சொல்பம் சொல்பம்…”

“நான் பத்திரிக்கை எழுத்தாளர். என் பெயர் ஆர்னிகா நாசர். 40 வருடங்களாக எழுதி வருகிறேன்… எங்களை நீ ஏமாற்ற விட மாட்டோம்…”

“ஞான் யாரையும் ஏமாத்திட்டில்லா…”

அக்பர் ட்ராவல்ஸ் அறை புக் பண்ணியதையும் புக்கிங்குக்கு எங்கள் வங்கிக் கணக்கில் இருந்து பணம் எடுக்கப்பட்ட விவரங்களையும் எடுத்துக் காட்டினார்.

“இதோ இப்போதே அக்பர் டிராவல்ஸ் ஃபோன் பண்றேன்!”


திறன்பேசியை ஆர்னிகா எடுத்ததும் வரவேற்பாளன் அடக்கி வாசித்தான். “ஏன் இவ்வளவு கோபப்படுறீங்க? ரூம் தானே? கொடுத்திடலாம். எனக்கு டிப்ஸ் நூறு திர்ஹாம் கொடுத்திடுங்க!”

“நான் தரமாட்டேன்!”

“ஹோட்டல்ல சாப்பிட்டா சர்வருக்கு டிப்ஸ் தர மாட்டீங்களா? நான் உங்களுக்குப் பக்கத்து மாநிலச் சகோதரன். எனக்கு ஒரு நூறு திர்ஹாம் கொடுத்தால் குறைந்தாப் போய் விடுவீர்கள்?”

“இந்தப் பணத்திற்கு பில் தருவாயா?”

“அதெப்படி தர முடியும்? எனக்கு டிப்ஸ் கொடுத்தால் உங்களைச் சிறப்பாகக் கவனித்துக் கொள்வேன்!”

“எங்களைத் தொட்டிலில் போட்டு தாலாட்டுவாயா? பீடிங்பாட்டிலிலில் பால் தருவாயா?”

“கிண்டல் பண்ணாதிங்க சாரே!”

நான் குறுக்கிட்டேன். “துபாய்க்கு வந்தும் உங்க சண்டைக்கோழி சுபாவத்தை விடலையா நீங்க? கொஞ்சம் பேசாம இருங்க!”

75 திர்ஹாம் நீட்டினேன்.

“இந்தாங்க… ரூமைக் கொடுங்க!”

பணத்தை வாங்கிக் கொண்டு அறைச்சாவியை கொடுத்தான். ஒரு மாதிரி ஆர்னிகாவைப் பார்த்துச் சிரித்தான்.

குளித்துப் புத்தாடைக்கு மாறினோம்.

மெதுவாக டாக்ஸிகள் நிற்கும் இடத்துக்கு வந்தோம்.

அதிகம் ஆப்பிரிக்கர்கள் உலவினர்.

ஒரு டாக்ஸி டிரைவர் முகம் பார்த்து கை நீட்டினோம். தலை நீட்டினான்.

“தமிழா?”

“ஆம்… நீங்க?”

“நானும் தமிழ்தான். எங்க போகனும்?”

“குளோபல் வில்லேஜ் போகனும்?”

“டிக்கெட் எடுத்தாச்சா?”

“எடுத்தாச்சு…”

“குளோபல் வில்லேஜ் இங்கிருந்து 36 கிலோ மீட்டர். காசு அதிகம் கேட்பேன். பரவாயில்லையா?”

“எவ்வளவு ஒரு கோடி கேப்பியா?”

“நூற்றியைம்பது திர்ஹாம். ரிட்டர்ன் வரனுமா?”

“வேண்டாம்.. நாங்கள் பார்த்துக் கொள்கிறோம்!” டாக்ஸி கிளம்பியது.

“உன் பேரென்னப்பா?”

“என் பேரு முருகன். சொந்த ஊர் ராம்நாடு. இங்க 12வருஷமா டாக்ஸி ஓட்றேன். நாங்க எட்டு பேர் ஒண்ணு சேந்து ஒரு ரூம்ல தங்கி இருக்கிறோம். சமையல் ரொட்டேஷன் முறையில் செய்வோம். துபாயில் மனித உயிர்களுக்கு மதிப்பு அதிகம். துபாயில் வரி மிக மிகக் குறைவு. அரசு அனுமதி இல்லாமல் டாக்ஸி ஓட்டினால் ஓட்டினவருக்கும் பயணித்தவருக்கும் அபராதம். உங்களுக்கு ஒரு முக்கியமான விஷயம் சொல்றேன். கேளுங்க. இங்கு செலவழிக்கும் ஒவ்வொரு திர்ஹாமையும் இந்திய ரூபாய்க்கு மாற்றிப் பார்த்து பதைபதைக்கக் கூடாது!”

“சரி!”


நான் எங்கள் மருமகன் அலாவுதீனின் சித்தப்பா சித்தி எண்ணுக்கு தகவல் அனுப்பினேன். ‘அஸ்ஸலாமு அலைக்கும். நாங்கள் குளோபல் வில்லேஜ் போய்க் கொண்டிருக்கிறோம். குளோபல் வில்லேஜ்ஜை பார்த்து முடித்ததும் நாம் சந்திப்போமா?’

சித்தப்பா பெயர் கே. ரஹமத்துல்லா, சித்தியின் பெயர் கே.பஷீர் மீரா. அவர்களின் ஒரே மகன் பெயர் ஆர். ஆகில்.

‘வஅலைக்கும் ஸலாம். கட்டாயம் சந்திப்போம்.’ பதில் வந்தது.

17. 2 மில்லியன் சதுர அடியில் இருந்த பூமிக் கிராமம் வரவேற்றது. 1996 ஆம் ஆண்டில் இந்த பூமி கிராமத்தைத் திறந்திருக்கிறார்கள். இதுவரை 100 மில்லியன் பார்வையாளர்கள் வந்து பூமிக் கிராமத்தைக் கொண்டாடி இருக்கிறார்கள்.


குளோபல் வில்லேஜின் தொடர்பு எண் 971 4 362 4114, நுழைவுக் கட்டணம் நபருக்கு 700 ரூபாய்.

ஒவ்வொரு வருடமும் அக்டோபரில் இருந்து மே மாதம் வரை மட்டுமே இந்த குளோபல் வில்லேஜ் திறந்திருக்கும். 90 நாடுகளின் பெவிலியன்கள். 3500 கடைகள். 250 உணவு ஸ்டால்கள். ஏடிஎம் கவுண்டர்கள். கழிவறைகள்.

ஆணோ பெண்ணா முழு உடலையும் மூடிசாடி தான் ஆடை அணிந்திருந்தனர்.

அரபிகள் பொதுவாக நறுமணக் காதலர்கள். சென்ட், அத்தர் விற்காத கடைகள் இல்லை.

பிஸ்ஸா பிரஷ், காஷ்மீரி அவுத், முகாலத் அவுத், பைனாப்பிள் கிக், ஒயிட் அவுத் அத்தர்கள்.

ஆங்காங்கே நாட்டு ஸ்டால்களில் முன் ஒவ்வொரு நாட்டுப் பாரம்பரிய நடனமும் பாடலும் அரங்கேறின.

ஒவ்வொரு நாட்டு ஸ்டாலிலும் மக்கள் அந்தந்த நாட்டு பாரம்பரிய ஆடைகளுடன் அமர்ந்திருந்தனர்.


“ஆர்னிகா! பிரேசிலின் ரியோ டி ஜெனிரோ போக வேண்டும். சம்பா நடனம் பார்க்க வேண்டும் என்பாயே… இதோ பிரேசிலின் ஸ்டால். ‘ஸ்லாம்’ நடனம் ஆடுகிறார்கள்… பார்!”

“வகிதா! சிறுவயதில் நாங்கள் மதுரை தமுக்கம் மைதானத்தில் சித்திரைப் பொருட்காட்சி பார்க்கப் போவோம். அந்த மகிழ்ச்சியை குளோபல் வில்லேஜ் தராது. மச் அடோ எபவுட் நத்திங்!”

ஒரு மிகப்பெரிய அரங்கத்தில் அரபிக் நடனங்களும் பாடல்களும் அரங்கேறிக் கொண்டிருந்தன.

ரக்ஸ் பாலாடி நாட்டுப்புற இசை வழிந்தது. ஆர்னிகா அமர்ந்தபடி குதியாட்டம் போட்டார். ஓர் உல்லாசப் பயணி ஸ்டேஜ்க்கு முன் போய் ஆட்டம் போட்டார்.

அவ்வளவு துபாய் காவல் துறை அவரை அள்ளிக் கொண்டு போனது. குதியாட்டம் போடும் ஆர்னிகா பக்கம் ஒரு துபாய் போலீஸ் திரும்பியது.

(பயணிப்போம்...!)

*****

இது முத்துக்கமலம் இணைய இதழின் படைப்பு.