மீண்டும் விட்ட இடத்திற்கு வருவோம்.

எங்களின் பயணச் சுமைகளை ஒரு ரோபோ போல இறக்கி வைத்து விட்டு, கார் பறந்து மறைந்தது.

எங்களது பயணச்சுமைகளை எடுத்துக் கொண்டு நான்கைந்து இளைஞர்கள் ஓடினர்.

புனித மெக்காவில் திருட்டா?

அவர்களைத் துரத்திக் கொண்டு ஓடினோம்.

ஒரு காரின் முன் போய் நின்றனர்.

மூச்சு வாங்கினோம்.

‘என்ன பயந்து விட்டீர்களா? உங்களுக்கு உதவுவதற்காக உங்களின் பயணச் சுமைகளை தூக்கி வந்தோம். இந்தக்காரில் நீங்கள் உங்களின் ஹோட்டலுக்கு போகலாம். காபாவிற்குள் நுழையும் போது எங்கள் நால்வரின் நலனுக்காகவும் வேண்டிக் கொள்ளுங்கள்!’ அவர்கள் பேசிய மொழி புரியவில்லை ஆனால் அவர்கள் சொல்ல வந்த விஷயம் புரிந்தது.

காரில் ஏறி அமர்ந்தோம்.

“அஸ்ஸலாமு அலைக்கும். நீங்கள் எந்த ஹோட்டலுக்கு போக வேண்டும்?”


“அல் அஜீஜிசியா, 24243 மெக்கா!”

“காபாவிலிருந்து எட்டு கிமீ தூரம்!”

ஐந்து சௌதி ரியால் வாங்கிக் கொண்டு ஹோட்டலின் முன் இறக்கி விட்டார் டாக்ஸி டிரைவர். இறங்கி வரவேற்பறைக்கு நடந்தோம்.

பிரமாண்டமான ஹோட்டல்.

நூற்றுக்கணக்கான நான்கு சக்கர வாகரங்கள் வந்த வண்ணம் போன வண்ணம் இருந்தன.

வரவேற்பறையின் முன் இஹ்ராம் ஆடை அணிந்த ஆடவர்கள் குழுமி அறை விசாரணை செய்து கொண்டிருந்தனர்.

இஹ்ராம் அணிந்து கொண்டு ஆர்னிகா நடந்து வரும் விதத்தை பத்து பக்கத்திற்கு வர்ணிக்கலாம். ஆனால், அப்படி வர்ணிக்க கூடாது என மனதை அடக்கிக் கொண்டேன்.

ஆர்னிகா புக்கிங் டாட் காமின் மூலம் அறை பதிவு பண்ணின பிரிண்ட் அவுட்டை நீட்டினார்.

அழகிய முகமன்கள் பரிமாற்றம்.

“ஜனவரி 23, 2025 மாலை நான்கு மணியிலிருந்து இரவு 11: 30 மணிக்குள் செக்கின். ஞாயிற்றுக்கிழமை ஜனவரி 26, 2025 மதியம் 12 மணியிலிருந்து மதியம் 2 மணிக்குள் செக் அவுட். மூன்று இரவுகள் தங்கல். க்யூன்ரூம். நானும் என் துணைவியாரும். அறை தயாராக இருக்கிறதா?”

நாங்கள் அறை முன் பதிவுக்கு பணம் ஏதும் கட்டவில்லை.

வரவேற்பாளர் வாங்கி வாசித்தார். அவருக்கு ஆங்கிலம் தெரியுமா என்பது சந்தேகமே. பிரிண்ட் அவுட் தாள்களை புரட்டிப்புரட்டிப் பார்த்தார்.

கணினியில் எதைஎதையோ தட்டிப் பார்த்தார்.

எங்களை உட்காரச் சொன்னார்.

எங்களது தாளை எடுத்துக் கொண்டு யாரிடமோ ஓடினார். அவரும் இவரும் வந்து எங்களை ஒரு முறை உறுத்தனர்.

எங்களுக்கு ஒரே குழப்பம்.

ஆர்னிகா புலம்ப ஆரம்பித்தார்.

“புக்கிங்கில் ஏதேனும் பிரச்சனையோ? ஜாஸ்மின் சரியாத்தானே பண்ணி இருந்தா? இவங்க நம்பள பாக்ற பார்வையே சரி இல்லையே? எனக்கு இஹ்ராமோட உட்கார்ந்திருக்றது கொஞ்சம் அன்ஈஸியா இருக்கு!”

“புருஷ்! லட்சக்கணக்கான இஹ்ராம் ஆண்களில் நீ ஒருவன். அல்லாஹ்வை நினை. தேவையற்ற எண்ணங்களை விரட்டு!”


மீண்டும் ரூம் புக் பண்ணிய ஹோட்டலின் முகவரியை உன்னித்தார் ஆர்னிகா

HOLIDAY IN MAKKAH AL AZIZIAH
8324 MASJID ASH SHAIKH BIN BAZ
AL AZIZIYAH DISTRICT. 2900
MAKKAH 24243. SAUDI ARABIA
966 12 556 9999 / 966 59530 5299 / 966 56 958 1755

நான் ஆர்னிகாவிடம், “ஏங்க உங்க முகநூல் நண்பர் பைரோஸ்கானை தொடர்பு கொண்டு அவரை இங்கு வர சொல்லுங்கள்!”

“வாட்ஸ் அப்பில் நாம் மெக்கா இறங்கி விட்டதை தெரிவித்தேன். பதில் இல்லை!”

“பைரோஸ்கான் என்ன செய்கிறார்?”

“அவர் ஒரு இமாம். இளம் வயது தான். மெக்காவில் ஆன்மிக வழிகாட்டியாக இருக்கிறார் என நினைக்கிறேன்…”

“இதே நீங்கள் ஒரு பணக்கார விஐபியாக இருந்தால் ஓடோடி வந்திருப்பார் இல்லையா?”

“அப்படிச் சொல்ல முடியாது. அவர் எங்கு வேலை செய்கிறாரோ? அங்கு பணிநேரக் கட்டுப்பாடுகள் எக்கச்சக்கமாய் இருக்குமோ என்னவோ?”

“ஒரு விஷயம். நீங்களும் நானும் பைரோஸ்கானை நம்பிதான் உம்ரா வந்துள்ளோம்...”

“திருத்திக்கொள் குட்டிம்மா… அல்லாஹ்வை நம்பிதான் உம்ரா வந்துள்ளோம்…”

“பார்ரா… நொடிக்கு 100 அல்லாஹ் சொல்ற….”

சிரித்தார் ஆர்னிகா.

“இமாம் பைரோஸ்கானோட நேரடியா பேச முடியாதா?”

“போட்டிங் ஆப் மூலம் பேசலாம்….”

“அவர் எண் என்ன?”

“00 966 56 080 44 96 (வாட்ஸ் அப் எண்)”

“மீண்டும் இப்போது அவருடன் பேசி பார்க்கிறீர்களா?”

“யாரையும் சார்ந்திருப்பது எனக்குப் பிடிக்காது!”

“என்ன அப்படி சொல்கிறீங்க? மக்கா மதீனா பார்க்க அவர் வழிகாட்டல் தேவைதானே? எல்லாவற்றையும் விட முக்கியம் நம்மோட ‘கடவுளுக்கு ஆயிரம் பெயர்கள்’ இஸ்லாமிய நீதிக்கதைகள் தொகுப்பை அவர்தானே காபா முன் வெளியிடப் போகிறார்…”

“அவரிடம் நான் இப்போது பேசுகிறேன். அவர் இல்லாவிட்டாலும் நம் புத்தக வெளியீடு நடக்கும்!”

போட்டிம் செயலி மூலம் பைரோஸ்கானை தொடர்பினோம்.

“அஸ்ஸலாமு அலைக்கும்!”

“வஅலைக்கும் ஸலாம். ஹோட்டலுக்கு வந்து விட்டீர்களா?”

“வந்துவிட்டோம்… ஆனால் சிறு பிரச்சனை… உட்கார வைத்திருக்கிறார்கள்!”

“ஒரு பிரச்சினையும் இல்லை. சரி செய்து கொடுத்து விடுவார்கள்!”

“நீங்கள் வந்தால் பேருதவியாக இருக்கும்!”


“மன்னிக்க வேண்டும் நான் என் பணியைச் செய்யும் நிறுவனம் சார்பாக தாயிப் போய்க் கொண்டிருக்கிறேன்!”

“நீங்கள் தானே இஸ்லாமிய நீதிக்கதைத் தொகுப்பை வெளியிட வேண்டும் என்றிருந்தேனே…”

“நாளை மறுநாள் காலை வந்து விடுவேன். வெளியிடலாம்!”

“சரி!”

“நீங்கள் அறைக்குப் போய் ஓய்வெடுத்து விட்டு பஜ்ரு தொழுகைக்கு முன் காபாவுக்கு வந்து விடுங்கள். என் உதவியாளர் கிங் அப்துல் அஜீஸ் கேட்டில் உங்களுக்காக காத்திருப்பார். மூன்றரை நாட்களும் உங்களுடன் இருந்து உதவுவார்!”

“மகிழ்ச்சி!”

திறன்பேசியை அமர்த்தினார் ஆர்னிகா.

வரவேற்பாளர் அழைத்தார்.

“நீங்கள் ரூம் புக் பண்ணிய ஹோட்டல் இதுவல்ல… மன்னிக்கவும்…”

விக்கித்தோம்.

“தெளிவான முகவரி கொடுத்திருக்கிறோமே...”

“இங்குள்ள ஹோட்டல்களின் பெயர்கள் அவ்வப்போது மாறும்…”

“நாங்கள் என்ன செய்ய?”

“உங்களின் ஹோட்டல் இதுவாக இருக்கும் என யூகித்து அந்த ஹோட்டலின் புகைப்படத்தை உங்களுக்கு அனுப்பி இருக்கிறேன்… அதனை டாக்ஸி டிரைவரிடம் காட்டுங்கள்… அவர் உங்களை புதிய ஹோட்டலுக்கு அழைத்துச் செல்வார்!”

“ஜஸாக்கல்லாஹ் ஹைரன்!”

“உங்களுக்கு எங்கள் ஹோட்டலில் அறை கொடுக்க முடியாமைக்கு அல்லாஹ் எங்களை மன்னிக்கட்டும்….’

டாக்ஸி டிரைவர் ஹோட்டல் ஒளிப்படத்தை வாங்கி பார்த்தார்.

இருவரும் பயணச்சுமைகளுடன் காரில் ஏறினோம்.


கார் பல ஹோட்டல்களின் வாசல்களுக்கு போய் வந்தது. அடுத்த ஒரு மணி நேரத்தில் ஒரு ஹோட்டலின் முன் நிறுத்தினார்.

ஹோட்டல் AZZARIN HOTEL 2 (AL AZIZIYAH NORTH. AL ZAMZAMI ST. IN FRONT OF AL FATH MOSQUE)

நாங்கள் தேடிய ஹோட்டல் அதுதான்.

வரவேற்பறையில் வரவேற்றனர். தரைத்தளத்தில் அறை ஒதுக்கினர்.

நோ தூக்கம்.

இருவரும் குளித்துவிட்டு காபா நோக்கி விரைந்தோம். “இஸ்லாமிய நீதிக் கதைகள் எழுதும் தம்பதியினரே! அஸ்ஸலாமு அலைக்கும்! வாருங்கள்! புனித காபா உங்களை வரவேற்கிறது!”

புனிதகாபா பிரம்மாண்டமாய் விஸ்வரூபித்து இரு கை நீட்டி எங்களை வரவேற்றது! 

(பயணிப்போம்...!)

*****

இது முத்துக்கமலம் இணைய இதழின் படைப்பு.