முதன்மைப் பயணக் கட்டுரைக்குள் போகும் முன் ஓர் இடைச் செருகல்.

உலகம் முழுவதிலும் இருந்து ஆண்டுதோறும் இலட்சக்கணக்கான இஸ்லாமியர்கள் மக்கா எனும் ஆன்மிக வேடந்தாங்கலில் பக்திப் பறவைகளாய் வந்து இளைப்பாறுகின்றனர்.

எல்லா முஸ்லிம்களும் நினைத்த மாத்திரத்தில் ஹஜ்ஜுக்குச் சென்று விட முடியாது.

கூட்ட நெரிசலைத் தவிர்க்கவும், பாதுகாப்பை உறுதிப்படுத்தவும் ஒவ்வொரு நாட்டுக்கும் ஒரு குறிப்பிட்ட கோட்டா சவூதி அரேபியாவால் வழங்கப்படுகிறது.

2026 ஆம் ஆண்டிற்கான (ஹிஜ்ரி 1447) ஹஜ் பயணத்திற்கான கோட்டா மற்றும் ஒப்பந்தங்கள் ஏற்கனவே பல நாடுகளுடன் அதிகாரப் பூர்வமாக கையெழுத்தாகி விட்டன.

இந்தக் கோட்டா முறை எவ்வாறு வேலை செய்கிறது?

எந்த நாட்டுக்கு எவ்வளவு வாய்ப்பு என்பதனைப் பார்ப்போம்.

ஒரு நாட்டிற்கு இவ்வளவு இஸ்லாமியர்கள்தான் ஹஜ்ஜுக்கு வர வேண்டும் என்கிற வரையறையை ‘இஸ்லாமிய ஒத்துழைப்பு அமைப்பு’ (OIC) 1987 ஆம் ஆண்டில் ஒரு தீர்மானமாக நிறைவேற்றியது.

இதன்படி ஒரு நாட்டில் வாழும் ஒவ்வொரு பத்தாயிரம் முஸ்லிம்களுக்கு ஒரு நபர் என்கிற அடிப்படையில் ஹஜ் கோட்டா கணக்கிடப்படும்.

உதாரணமாக ஒரு நாட்டில் ஒரு கோடி முஸ்லிம்கள் இருந்தால் அந்த நாட்டுக்கு ஆயிரம் பேர் என்கிற கோட்டா வழங்கப்படும்.

இது தவிர, ஒவ்வொரு ஆண்டும் சௌதி அரேபியா அந்தந்த நாடுகளுடன் மேற்கொள்ளும் இருதரப்பு ஒப்பந்தங்கள் (Bilateral Hajj Agreements) மூலமாகவும் சில கூடுதல் இடங்கள் ஒதுக்கப்படுவதும் உண்டு.


2026 ஏப்ரல் நிலவரப்படி உலக அளவில் அதிக இஸ்லாமியர்களைக் கொண்ட நாடுகளே ஹஜ் கோட்டாவிலும் வழக்கம் போல முன்னிலை வகிக்கின்றன.

இந்தோனேசியா உலகின் அதிக முஸ்லிம்களைக் கொண்ட நாடு என்பதால் அவர்களுக்குத்தான் ஹஜ் கோட்டாவில் முதலிடம் வழங்கப்படுகிறது.

அதாவது இந்தோனேசியாவுக்கு 2, 21, 000 இடங்கள் ஒதுக்கப்படுகின்றன.

இவ்வளவு இடங்கள் ஒதுக்கப்பட்டிருந்தாலும் இந்தோனேசியாவில் ஹஜ் செல்ல விண்ணப்பித்து விட்டு 11 முதல் 40 ஆண்டுகள் வரை காத்திருப்போர் ஏராளம். ஹஜ் கோட்டா பிரச்சனைகளை இறைமை நிதியங்கள் மூலம் அவர்கள் நிர்வகிக்கிறார்கள்.

ஹஜ் கோட்டாவில் பாகிஸ்தானுக்கு இரண்டாவது இடம்.

அவர்களுக்கு 1,79,210 இடங்கள் ஒதுக்கப்படுகின்றன.

இந்தியா 2025 நவம்பர் மாதத்திலேயே சவுதி அரேபியாவுடன் ஜித்தாவில் இருதரப்பு ஒப்பந்தம் செய்து கொண்டது.

அந்த ஒப்பந்தப்படி 2026 ஆம் ஆண்டுக்கான இந்தியாவின் ஹஜ் கோட்டா 1,75,025 ஆக நிர்ணயிக்கப்பட்டுள்ளது.

வங்க தேசத்துக்கு 1,27,197 ஹஜ் கோட்டா.

மேற்கத்திய நாடுகளுக்கான பிரிட்டனுக்கு 12, 000.

அமெரிக்காவுக்கு 20, 000

இலங்கைக்கான ஹஜ் பயணத்தை மேலும் ஒழுங்குபடுத்துவதற்கும் முகவர்களின் செயல்பாடுகளைக் கண்காணிப்பதற்கும் புதிய ஹஜ் சட்டம் கொண்டு வர இலங்கை அரசாங்கம் முடிவு செய்துள்ளது.

தற்போதுள்ள பொருளாதாரச் சூழலில் இலங்கையில் ஒரு நபருக்கான ஹஜ் பேக்கேஜ் செலவு தோராயமாக 19 இலட்சம் மூலம் 25 லட்சம் வரை என கணக்கிப்பட்டுள்ளது.

சௌதி அரேபியா ஒவ்வொரு ஆண்டும் ஹஜ் நடைமுறைகளை NUSUK போன்ற டிஜிட்டல் தளங்கள் மூலம் மிகத்துல்லியமாக மாற்றி வருகிறது.

2026 ஆம் ஆண்டு ஹஜ் பயணத்திற்கான தங்குமிடம் மற்றும் போக்குவரத்து ஒப்பந்தங்களை உறுதி செய்வதற்காக, தனியார் முகவர்கள் 2026 ஜனவரி 15 ஆம் நாளுக்குள் அனைத்து முன் பதிவுகளையும் முடிக்க வேண்டும் என கடுமையான காலக்கெடு விதிக்கப்பட்டிருந்தது. இதன் மூலம் கடைசி நேரக் குழப்பங்கள் தவிர்க்கப்பட்டு ஹாஜிகளுக்கு சிறந்த சேவைகள் கிடைக்க வழிவகை செய்யப்பட்டுள்ளன.

உலக முஸ்லிம்கள் ஜனத்தொகை 215 கோடி. அவர்களில் ஹஜ் பயணம் செய்யும் வாய்ப்பை வெறும் 15 முதல் 20 இலட்சம் பேர் மட்டுமே பெறுகின்றனர்.


சரி, ஹஜ் கமிட்டி என்றால் என்ன? அதன் பணி என்ன?

இந்திய ஹஜ் கமிட்டி என்பது சிறுபான்மையினர் விவகாரங்கள் அமைச்சகத்தின் கீழ் இயங்கும் ஒரு சட்டப்பூர்வ அமைப்பாகும்.

இது இந்திய முஸ்லிம்களுக்கான வருடாந்திர ஹஜ் யாத்திரையை நிர்வகிக்கவும் ஒழுங்கமைக்கவும் எளிதாக்கவும் 2002ஆம் ஆண்டின் ஹஜ் குழு சட்டத்தின் மூலம் நிறுவப்பட்டது.

இது மாநில அளவிலான குழுக்களுடன் இணைந்து செயல்பட்டு சௌதி அரேபியாவில் பயணம் தங்குமிடம் மற்றும் தளவாடங்களை ஒருங்கிணைக்கிறது.

ஹஜ் கமிட்டியின் பணிகள் மற்றும் பொறுப்புகள்.

* பல்வேறு புறப்படும் இடங்களில் இருந்து விமானப் பயண ஏற்பாடுகள், மக்கா / மதீனாவில் தங்குமிட வசதிகள் மற்றும் பயணிகளுக்கான மருத்துவ வசதிகள் ஆகியவற்றை மேற்பார்வையிடுகிறது.

* விண்ணப்ப மேலாண்மை : ஹஜ் விண்ணப்பங்களை வரவேற்றுப் பரிசீலிக்கிறது. விண்ணப்பத்தார்களின் எண்ணிக்கை ஒதுக்கீட்டை மீறினால் ‘குர்ரா’ எனும் குலுக்கல் முறையில் ஹஜ் பயணிகள் தேர்ந்தெடுக்கப்படுகின்றனர். உதாரணமாக, 13. 08. 2025ல் ஹஜ் பயணிகளுக்கான டிஜிட்டல் குலுக்கல் நடைபெற்றது. அதில் 30000 பேர் தேர்ந்தெடுக்கப்பட்டனர். 95,336 பேர் காத்திருப்பு பட்டியலுக்குப் போயினர்.

பயணிகளுக்கான ஆதரவு : ஹஜ் வழிகாட்டியை விநியோகித்தல், வழிகாட்டிகளுக்குப் பயிற்சி அளித்தல் மற்றும் தடுப்பூசி முகாம்களை அமைத்தல். பயிற்சியாளர்கள் மாநிலத்தின் ஒவ்வொரு மாவட்டத்திலிருந்தும் சம்பந்தப்பட்ட மாநில ஹஜ் குழுக்கள் மூலம் தேர்ந்தெடுக்கப்படுகிறார்கள். இந்தப் பயிற்சியாளர்களுக்கு ஆறு மண்டலங்களிலும் தலா இரண்டு நாட்கள் பயிற்சி அளிக்கப்படுகிறது.

முதல் ஹஜ் பயணம் செய்யும் ஒவ்வொருவருக்கும் இந்திய அரசு 25000 ரூபாய் நிதியுதவி மானியமாகத் தந்தது. இந்த மானியத்தை 2018 ஆம் ஆண்டு உச்சநீதிமன்றத் தீர்ப்பின்படி மத்திய அரசு ரத்து செய்தது. ஆனாலும் சில மாநிலங்கள் ஹஜ் மானியங்களைத் தொடர்கின்றன. தமிழக அரசு, 2024- 2025 ஆம் நிதியாண்டில் தகுதியுள்ள யாத்திரீகர்களுக்கு 25000 ரூபாய் வழங்க 5650 பயனாளிகளுக்கான பதினான்கே கால் கோடி ரூபாயை ஒதுக்கியது.


ஹஜ் குலுக்கல் நடைபெறும் விதம்

* பதிவு மற்றும் சரிபார்ப்பு : விண்ணப்பத்தார்கள் ஹஜ் கமிட்டியின் அதிகாரப்பூர்வ இணையதளத்தில் (Hajcommitte.gov.in) விண்ணப்பிக்கின்றனர். விண்ணப்பிக்கப்படும் விண்ணப்பங்கள் சரி பார்க்கப்பட்டு கவர் எண் (Cover number) வழங்கப்படுகிறது.

* டிஜிட்டல் முறை (ருர்ரா) எண்ணிம தற்செயல் தேர்வு (Digital Random selection) மூலம் ஹஜ் பயணிகள் தேர்ந்தெடுக்கப்படுகின்றனர்.

* நேரலை ஒளிபரப்பு : இந்தக் குலுக்கல் மும்பையில் உள்ள ஹஜ் ஹவுஸில் நடத்தப்படுகிறது. இது பொதுமக்களின் பார்வைக்கு அதிகாரப்பூர்வ இணையதளத்தில் நேரடியாக ஒளிபரப்பப்படுகிறது.

* முடிவுகள் அறிவிப்பு : தேர்ந்தெடுக்கப்பட்டவர்களுக்குக் குறுந்தகவல் (S.M.S) மூலமாகவும் இணையதளம் மூலமாகவும் முடிவுகள் தெரிவிக்கப்படுகின்றன.

* குலுக்கலில் தேர்ந்தெடுக்கப்படுபவர்கள் தங்களின் பாஸ்போர்ட் மற்றும் முன்பணத்தை சமர்ப்பித்து பயணத்தை உறுதி செய்ய வேண்டும்.

ஹஜ் விமானங்கள் இந்தியாவின் 21 புறப்படுm இடங்களிலிருந்து புறப்படுகின்றன. உலகs சுகாதார அமைப்பின் விதிமுறைகளின்படி ஹஜ் பயணிகளுக்கு மூளைக்காய்ச்சலுக்கு எதிரான மற்றும் போலியோவுக்கு எதிரான தடுப்பூசியும் போடப்படுகின்றன.

ஹஜ் புனிதப் பயணிகளுக்கான குழு விபத்து இழப்பீட்டு திட்டம் 2004 ஆம் ஆண்டு முதல் அமுல்படுத்தப்பட்டுள்ளது.

1995 ஆம் ஆண்டில் ஹஜ்ஜுக்கான கப்பல் பயணம் நிறுத்தப்பட்டது.

ஹஜ் பயணிகளை மக்காவுக்கு அழைத்துச் செல்லும் பணியை ஏர் இந்தியாவும், சௌதி அரேபியன் ஏர்லைன்ஸும் சிறப்பாகச் செய்கின்றன.

ஹஜ் கமிட்டி (மும்பை முகவரி)

பைத்துல் ஹஜ்ஜாஜ், 7.A. எம்ஆர்ஏ மார்க் (பால்டன் சாலை) மும்பை. 400 001. மகாராஷ்டிரா இந்தியா. (022-22 71 71 100/ 101/ 102 , 022 -22620920 / 22630461

Ceo/hajcommittee@nic.in (திங்கள் - வெள்ளி 10-6 )

(பயணிப்போம்...!)

*****

இது முத்துக்கமலம் இணைய இதழின் படைப்பு.