மெக்காவிற்கு அனுமதிக்கப்படாத டாக்ஸி பயணம்!

நடந்ததை ரீவைன்ட் பண்ணிப் பார்த்தோம்.

ஜெத்தாவில் இறங்கினோம்.

ரயில் பயணத்தைத் தவிர்த்து, பேருந்துப் பயணத்திற்கு வருகிறோம்.

எங்கள் பாஸ்போர்ட்டை வாங்கி எங்கள் பெயர்களை குறித்துக் கொண்டு காத்திருக்கச் சொல்கின்றனர்.

காத்திருக்கிறோம்.

ஒரு மணி நேரத்திற்குப் பிறகு ஒரு பெண் பயண ஏற்பாட்டாளர். “நீங்கள் பேருந்தில் போய் சிரமப்பட வேண்டாம். மூத்தக் குடிமக்களுக்கு இலவச டாக்ஸி பயணம் இருக்கிறது. அதில் போங்கள்!” என்கிறார்.

ஆர்னிகா 20 முறை அது முறையான இலவச பயணம்தான் என்பதனை உறுதி செய்கிறார். டாக்ஸியில் மெக்கா போனோம்.

இப்போது அது பூதமாய்க் கிளம்பி நிற்கிறது.

பத்தாயிரம் அபராதம் உண்மையா, அக்பர் ட்ராவல் ஏஜென்ஸியின் சுரண்டல் பொய்யா?

மகளுடன் வாட்ஸ்அப் மூலம் தொடர்பு கொண்டோம்.


“அஸ்ஸலாமு அலைக்கும்!”

“வஅலைக்கும ஸலாம்!”

‘இப்படி ஒரு அபராதம் இருப்பதாக எனக்குத் தெரியவில்லை. அபராதம் அறிவித்து சவூதி அரசு ஒரு கடிதம் அனுப்பியிருக்கும் அல்லவா? அதனை அனுப்புங்கள். அதனை ஆங்கிலத்தில் மொழிபெயர்த்து உண்மையைத் தெரிந்து கொள்ளலாம்!’

அதற்குள் அக்பர் ட்ராவல் ஏஜென்ஸியிடமிருந்து பத்து நினைவூட்டல்கள்.

‘சௌதி அரசாங்கத்தின் ஓலையை அனுப்புங்கள்’

‘உங்கள் ஆராய்ச்சியை எல்லாம் அப்புறம் வைத்துக் கொள்ளுங்கள். பணத்தை உடனடியாக அனுப்புவது உங்கள் எகிப்து டூருக்கு நல்லது. இனிமேலாவது கவனமாக இருங்கள். இலவசம் என்றால் போய் பாய்ந்து மாட்டிக் கொள்ளாதீர்கள்’

ஆர்னிகா இடுங்கிய கண்களுடன் யோசித்தார்.

“ரிஸ்க் எடுக்க வேண்டாம் வகிதா. நமக்கு எகிப்து பயணம் முக்கியம். அத்துடன் பயணங்களைப் பத்திரமாக முடித்து ஊர் திரும்ப வேண்டும். 10, 000 கட்டி விடுவோம்!”

“பணத்தை எப்படி அனுப்புவீர்கள்?”

ஜிபே வொர்க் பண்ணுகிறதா என செக் பண்ணினார் ஆர்னிகா.

பத்தாயிரம் ரூபாய் ஜிபே பண்ணி ஸ்கிரீன் ஷாட் எடுத்துக் கொண்டார் ஆர்னிகா.


மூன்று நாடுகள் டூர் முடித்து இத்தனை நாளாகியும் எங்களுக்கு பத்தாயிரம் கட்டினது - சௌதி அரசின் அபராதமா அல்லது மூத்த குடிமக்களை ஏமாற்றிய ஆன்லைன் மோசடியா எனத் தெரியாது.

3170. ரெய்ஹானத் அல் ஜெஸிரா, அல் பைசில்யா மாவட்டம் ஜெத்தா 23442 முகவரியில் இருக்கும் அல் தெய்பாட் அருங்காட்சியகத்திற்குள் பிரவேசித்தோம்.

கிபி1999ல் இந்த அருங்காட்சியகம் ஆரம்பிக்கப்பட்டது.

நான்கு மாடிக்கட்டிடம்.

365 அறைகள்.

அறைகளில் பழைமையான மண்பாண்டப் பொருட்கள், நாணயங்கள், பழங்காலக் கையெழுத்துப் பிரதிகள், பழைய வரைபடங்கள், சௌதி பாரம்பரிய ஆடைகள் மற்றும் ஆயுதங்கள் நிறைந்திருந்தன.

பாரம்பரிய ஹிஜாஸி கட்டிடக்கலையைப் பற்றியக் காட்சிப் பொருட்களும் இருந்தன.

மொத்தம் 60000 கலை பொருட்கள்.

ஏறக்குறைய நான்கு மணி நேரம் அந்த அருங்காட்சியகத்தைச் சுற்றிப் பார்த்தோம். தலைக்கு ரூபாய் 2400 கட்டணம் செரித்தது.

அறைக்குத் திரும்பினோம்.



மாலை 3.30 மணிக்கு டாக்ஸி பிடித்து ஜெத்தா விமான நிலையம் பறந்தோம். டாக்ஸியை ஓட்டியது ஒரு இலங்கைத் தமிழர்.

“இலங்கைக்கு டூர் வாருங்கள். எங்கள் வீட்டில் தங்கி ஊர் சுற்றலாம்!” என்றார்.

மிக மகிழ்ந்தோம்.

ஜெத்தா விமான நிலையத்தில் பாஸ்போர்ட் காட்டி ஐந்து லிட்டர் ஜம்ஜம் நீர் விலைக்கு வாங்கிக் கொண்டோம்.

டெர்மினல் ‘என்’னில் ஜெத்தாவிலிருந்து கெய்ரோ செல்லும் ஏர் கெய்ரோ எஸ். எம் 480 நின்றிருந்தது.

விமானம் ஏறினோம்.

வெறும் ஒண்ணேகால் மணி நேரப் பயணம்.

ஆர்னிகாவிற்கு எகிப்து என்றாலே தனி மயக்கம்தான். ‘முற்பிறவி என்று ஒன்று இருந்திருந்தால் நான் ஒரு எகிப்தியனாக பிறந்திருப்பேன்’ எனக் கூறுவார் ஆர்னிகா.

எகிப்து சுற்றுலா ஐந்து நாட்கள் என வடிவமைத்திருந்தோம்.

ஒரிஜினல் திட்டத்தில் லக்ஸார் ஒருநாள் சுற்றுலா இருந்தது.

ஆனால் நாட்கள் குறைவு என்பதாலும் போக்குவரத்து சிரமங்கள் அதிகம் என்பதாலும் லக்ஸார் சுற்றுலாவை நிகழ்ச்சி நிரலிருந்து நீக்கினார் ஆர்னிகா.

மொத்தம் எகிப்தில் பார்க்க வேண்டிய இடம் 32 என குறித்தார் ஆர்னிகா.

எகிப்தில் நாங்கள் இருக்கப் போவது ஐந்து நாட்கள்.

28.01.2025 இரவு 10 மணிக்கு ஹோட்டலுக்கு போய் தங்குதல்.

(அப்னான் கெய்ரோ ஏர்போர்ட், கெய்ரோ கவர்னரேட் 4473006)

29.01.2025- ஆறு இடங்கள் பார்த்தால்

* கிஸா பிரமாண்ட பிரமிட்

* காஃப்ரே பிரமிடு

* மென்கர் பிரமிடு

* ஸ்பின்க்ஸ்

* மெம்பிஸ்

* சாக்குரா

30.01.2025 - ஆறு இடங்கள் பார்த்தல் (அலெக்ஸான்ட்ரியா)

* பிபிலிகா புதிய நூலகம்

* பாம்பே தூண்

* ரோமன் ஆம்பி தியேட்டர்

* கைட்பே கோட்டை

* அபு அல் அப்பாஸ் அல் முர்ஸி மசூதி

* ராயல் ஜுவல்லரி

* மான்டஸா தோட்டம், அரண்மனை

* ரோமன் தியேட்டர் மற்றும் அருங்காட்சியகம்

* கோம் அல் சோகபா கல்லறை

31.01.2005 வெள்ளிக்கிழமை ஆறு இடங்கள்

* கிராண்ட் எஜிப்திசியன் அருங்காட்சியகம்

* ஓபேரா ஹவுஸ்

* காப்டிக் கெய்ரோ அருங்காட்சியகம்

* பாயில் அல் சுகாமி அருங்காட்சியகம்

* எகிப்திய நாகரீகம் பற்றிய தேசிய அருங்காட்சியகம்

* கான் அல் கலிலி சந்தை

01.02.2025 சனிக்கிழமை ஆறு இடங்கள்

* இஸ்லாமியக் கலை வடிவங்களின் அருங்காட்சியகம்

* அப்தீன் அரண்மனை அருங்காட்சியகம்

* குகை தேவாலயம்

* மானியல் அரண்மனை

* காயர் ஆன்டர்ஸன் அருங்காட்சியகம்

* நைல் நதி கப்பல் பயணம் (நடனம் மற்றும் விருந்து)

02.02.2025 ஞாயிற்றுக்கிழமை ஆறு இடங்கள்

* சுல்தான் ஹசன் மசூதி மற்றும் மதரஸா

* கெய்ரோ சிட்டாடல்

* அபு துலன் மசூதி

* அல் ஹக்கீம் மசூதி

* அல் அச்சார் மசூதி

* மூஸ் தெரு

எங்கள் மகள் ஜாஸ்மின் ஏறக்குறைய 32 இடங்களை ஐந்து நாட்களில் பார்ப்பது போலப் பிரித்து, எங்கள் பாஸ்போர்ட் பெயர்களில் டாலர்களில் பணம் கட்டி டிக்கெட் எடுத்து பிடிஎப் அனுப்பி இருந்தாள்.

“இது பேராசை அப்பா. ஐந்து நாட்களில் 32 இடங்கள். இம்பாஸிபிள். டிக்கெட் எடுத்த பணம் வீணாகப் போகிறது. அத்துடன் டென்ஷன் டென்ஷன் டென்ஷன்…”

விமானம் கெய்ரோ விமான நிலையத்தின் முதல் டெர்மினலில் இறங்கியது.

(பயணிப்போம்...!)

*****

இது முத்துக்கமலம் இணைய இதழின் படைப்பு.