“வகிதா! உன் ஃப்ரெண்ட் சூராக்கா வீட்ல நம்ம மியூவை ஒரு பதினைஞ்சு நா வச்சுக்க மாட்டாங்களா?”

“மாட்டாங்க சான்ஸே இல்லை!”

“தான்யா வீட்ல திரும்பக் கொடுத்து 15 நாள் பாத்துக்கச் சொல்வோமா?”

“தான்யாவுக்கு மியூவை கூண்டுல வச்சு வளர்க்கிறது பிடிக்கல. நாங்க குடுத்த பூனையை ஜெயில்ல வச்சிட்டீங்கன்னு புகார் பண்ரா!”

யோசித்தார் ஆர்னிகா.

“நம்ம வீட்ல வேலை செய்யுதே ஒரு அம்மா அந்த அம்மா பேரென்ன?”

“ஜீனத்!” சொன்னேன்.

“அந்தம்மாகிட்டக் குடுத்துப் பாத்துக்கச் சொல்வோமா?”

“நீங்க கேக்றதுக்கு முன்னாடியே நானே அந்தம்மாகிட்டக் கேட்டேன். வாய்ப்பில்லைன்னு சொல்லிருச்சு!”

“கோயம்புத்தூர்ல பூனைகள் காப்பகம் ஏதாவது இருக்கா?”

“நெட்லதான் தேடி பாருங்க”

தேடி பார்த்து உதடு பிதுக்கினார் ஆர்னிகா.

“கிழவன் ஆனவுடன் அய்யாவுக்கு மிருகாபிமானம் பொத்துக்கிட்டு ஊத்துதுதோ? அண்ணாமலை பல்கலைக்கழகத்தில சுகாதார அதிகாரியா பணி புரிஞ்சப்ப வருஷாவருஷம் நூத்துக்கணக்கான தெரு நாங்களை பிடிச்சு விஷ ஊசி போட்டு புதைச்சவர் தானே நீங்க?” பரிகசித்தேன்.


“அது முப்பது வருடங்களுக்கு முன் இப்ப தெரு நாய்களுக்குச் சட்டப் பாதுகாப்பு வந்திருச்சு”

“ஓஹோ!”

“உனக்குத் தெரியாது. பூனைகள் மீது இனம் புரியாத ஈர்ப்பு எனக்கு உள்ளது. அவைகளுக்குள் மர்மமும் காதலும் வசீகரமும் ஒளிந்துள்ளன. இஸ்லாம் பூனைகள் வளர்ப்பதை ஆதரிக்கிறது!”

“அதான் கறுப்பு பூனைக்கூட்டம்னு ஒரு திகில் நாவல் எழுதுனீங்களே..” என்றேன்.

சிரித்தார் ஆர்னிகா.

“தீர்வு இல்லாத பிரச்சனைகளே இவ்வுலகத்தில் இல்லை. நான் கதை எழுதும் போது வேலைக்கார அம்மாவை என் கிட்டப் பேச அனுப்பு… ஒரு டீலிங் பேசுறேன்!”

“சரி!”

ஆர்னிகா கதை எழுதிக் கொண்டிருக்கும் பொழுது வேலைக்கார அம்மா அறைவாசலுக்குப் போய் நின்றார்.

“வாங்கம்மா.. நாங்க உம்ரா போறது உங்களுக்குத் தெரியும்தானே?”

“தெரியும்!”

“வரும் போது உங்களுக்குத் தொழுகை விரிப்பு தஸ்பீஹ் மணிமாலை, பேரீச்சம்பழம் எல்லாம் வாங்கிட்டு வரம்!”

“நன்றி!”


“அம்மா! நான் உங்களுக்கு ஒரு யோசனை சொல்றேன். ஒத்து வருதான்னு பாருங்க!”

“சொல்லுங்க!”

“எங்க மியூவை நீங்க வீட்ல வச்சுப் பாக்க வேணாம். அது இரண்டாவது மாடிப் படிக்கட்டுலேயே இருக்கும். நீங்க தினம் வேலைக்கு வரும் போது அதுக்கு சாப்பாடு, தண்ணீர், பால் கொடுங்க. உங்களால முடிஞ்சப்பக் கூண்டைச் சுத்தம் செய்யுங்க. என் மருமகள் பள்ளபட்டிக்கு போகும் போது மியூ கூண்டை போர்டிகோல வைக்கச் சொல்றேன். தினம் வெளிகேட்டைத் திறந்திட்டு வந்து மியூவை கவனிச்சிக்கங்க. ஒரு நாளைக்கு 25 ரூபாய் வீதம் 15 நாளைக்கு 400 ரூபாய் கொடுத்திடுறேன்… ப்ளீஸ்!”

வேலைக்காரம்மா முப்பது நொடி யோசித்தார்.

“சரிங்க சார்!”

“இய்யா…” என உற்சாகக் கூச்சலிட்டார் ஆர்னிகா.

இரட்டைப் படுக்கையில் அமர்ந்தவாறே திறன்பேசியை நோண்டிக் கொண்டிருந்தார் ஆர்னிகா.

“எப்பா!”

“என்ன?”

“ஏர் டிக்கெட்டுகள் எடுத்தாச்சு. மீதிப்பணம் இருபதாயிரம் கொச்சம் வங்கிகணக்கில வச்சிருப்பீங்க!”

“ஆமாம்!”

“மூணு நாடுகளுக்கும் பாத்துப்பாத்துச் செலவு பண்ணினாலும் ஆறு ஏழு லட்சம் ஆகும்! என்ன பண்ணப்போறீங்க?”

“எனக்கு முகநூல் நண்பர்கள் அய்யாயிரம் பேர் உள்ளனர். அதில் நூறு இருநூறு பேராவது துபாயில் இருப்பாங்க!”

“அவ்வளவு தூரம் ஏன் போறீங்க? நம்ம சுமிகிட்ட பேசுங்க. சுமி துபாய் பயண நிரலைக் கச்சிதமா வடிவமைச்சுக் கொடுத்திரும்!”

“இப்ப சுமிகிட்டப் பேசலாமா?”

“ஓஎஸ்! நேரடியா பேசமுடியாது வாட்ஸ்அப் மெஸேஜ் அனுப்பலாம்!”

‘வணக்கம் நான் ஆர்னிகா நாசர் மாமா. நல்லாருக்கியாம்மா?’

பதில் வந்து விழுந்தது.

‘நல்லாருக்கேன் மாமி எப்படி இருக்காங்க?’

‘மாமி பக்கத்திலதான் உக்காந்திருக்கா.’ துபாய் உம்ரா எகிப்துப் பயணத்தை எழுத்தில் விவரித்தார் ஆர்னிகா.

எதிர்முனையில் நீண்ட நேரம் பதில் இல்லை.

‘உங்கப் பயணத்துக்கு நீண்ட நாள் அவகாசம் இருக்குது. அடுத்த மாதம் நான் மாமா பையன் கல்யாணத்துக்குக் கேரளா வருகிறேன். அப்ப பேசிக்குவம்’

‘முதலில் துபாய் விசா எடுக்கலாம்னு இருக்கம்!’

‘உங்கப் பயணத்துக்கு ஒரு மாதத்துக்கு முன்னாடி விசா எடுத்தாப் போதும். விசா எடுப்பதில் ஏராளமான ஃபார்மாலிட்டீஸ் இருக்கு. கவனமா எடுக்கனும்!’

‘ஏர் டிக்கெட்டுகள் எல்லாம் எடுத்திட்டோம்!’


‘ஏன் இவ்வளவு அவசரம்?’

‘இருபது முப்பதாயிரம் மிச்சம் பண்ணலாமேன்னு…’

‘துபாய் ரொம்ப ரொம்ப காஸ்ட்லி. மூணு ராத்திரி வாடகையே 25000 ரூபாய் வரும். பாத்து ரூம் புக் பண்ணனும்!’

‘ஆன்லைன்ல பண்ணலாமா?’

‘துபாயைப் பற்றி ஒரு சிறு அறிமுகம் செய்கிறேன் கேளுங்க. ஏழு எமிரேட்ஸ்களின் கூட்டமைப்புதான் ஐக்கிய அரபு அமீரகம் என்பது. ஐக்கிய அரபு அமீரகத்தில் ஏழு அரபு அமீரகங்கள் உள்ளன.

1. அஜ்மான் – ஏழை அமீரகம்

2. துபாய்

3. புஜைரா

4. ராஸ் அல் கைமா

5. ஷார்ஜா

6. உம் அல் குவைன்

7. அபுதாபி (தலைநகரம்) பணக்கார அமீரகம்!’

‘அப்படியா?’ என்றேன்.

‘ஐக்கிய அரபு அமீரகம் 1971 டிசம்பரில் ஐக்கிய இராச்சியத்திலிருந்து விடுதலை பெற்றது. ஐக்கிய அரபு அமீரகத்தில் மொத்தமாக 47.5 லட்சம் இந்தியர்கள் பணி புரிகின்றனர். துபாயின் ஜனத்தொகை 40 லட்சம். துபாய் நகரத்தை உபைத் பின் ஸைத் மற்றும் மக்தூம் பின் புட்டி அல் மக்தூம் நிறுவினர். ஏழு அமிரேட்ஸ் கூட்டமைப்பில் துபாய் இரண்டாவது பெரியது. அராபிய தீபகற்பத்தின் அரேபிய வளைகுடாவின் தெற்கே அமைந்துள்ளது துபாய்’

‘துபாயில் மக்களாட்சியா, மன்னராட்சியா?’

‘சந்தேகமில்லாமல் மன்னர் ஆட்சி தான். ஷேக் முஹம்மது பின் ஜாயத் அல் நயன் என்கிற மன்னர்தான் ஆள்கிறார்!’

‘துபாயில் புழங்கும் நாணயத்தின் பெயர் என்ன?’

‘திர்ஹாம்!’

‘திர்ஹாம் மதிப்பு கூடவா இந்திய ரூபாய் மதிப்பு கூடவா?’

‘திர்ஹாமின் மதிப்புதான் கூட. இந்தியபணம் 23.79 ரூபாய் கொடுத்தால்தான் ஒரு திர்ஹாம் கிடைக்கும்!”

‘காஸ்ட் ஆப் லிவ்லிங் எப்படி?’


‘அமெரிக்காவை விட 22சதவீதம் காஸ்ட் ஆப் லிவ்லிங் குறைவுதான். ஆனால் இந்தியாவுடன் ஒப்பிடும்போது துபாய் காஸ்ட் ஆப் லிவ்விங் மிகமிக அதிகம். டெல்லியை விட துபாயில் வாடகை பல மடங்கு அதிகம். உணவு, பொழுதுபோக்கு, போக்குவரத்து எல்லாமே யானை விலை குதிரை விலைதான்!’

‘துபாயின் போக்குவரத்து எவற்றை நம்பி உள்ளன?’

‘ரோட்ஸ் அண்ட் டிரான்ஸ்போர்ட் அத்தாரிட்டி துபாயின் போக்குவரத்தைக் கவனித்துக் கொள்கிறது. 193 வழித்தடங்களில் வாரம் 33 மில்லியன் மக்கள் ஆர்டிஏ வில் பயணிக்கின்றனர். ஆர்டிஏ 1616 பேருந்துகளை இயக்குகிறது!’

‘மெட்ரோ டிரைன்?’

‘மெட்ரோ ரயில் போக்குவரத்து சிவப்பு பாதை பச்சைப் பாதை என இரு பாதைகளில் இயங்குகிறது. 09.09.2009 மெட்ரோ ரயிலை துபாயில் தொடங்கினர். வருடத்துக்கு 25 கோடி பேர் துபாய் மெட்ரோவில் பயணிக்கின்றனர்!’

‘டாக்ஸி சர்வீஸ்?’

‘பத்து டாக்ஸி சர்வீஸ்கள் உள்ளன.’

1. துபாய் மெட்ரோ டாக்ஸி அண்ட் ஸட்டில்

2. துபாய் டாக்ஸி

3. ஒஸன் ஏர்ட்ராவல்ஸ்

4. கொய் ரைடு

5. பேக்கேஜ் டாக்ஸி

6. துபாய் நா ரோட்டா

7. சஹாரா அட்வென்ச்சர்

8. ரிமோ டூர்ஸ் துபாய்

9. நபிதா டூர்ஸ்

10. டிமேக்ஸ் துபாய் ரென்டல்.

துபாய் டாக்ஸி கார்ப்பரேஷன் ஆஃப், கரீம் ஆப், துபாய் நவ் ஆப் பொருத்தி டாக்ஸிகளைக் கூப்பிடலாம்… ஒரு நிமிடம் கட் பண்ணிட்டு மீண்டும் கூப்பிடுகிறேன்!’ தொடர்பு அறுந்தது.

(பயணிப்போம்...!)

*****

இது முத்துக்கமலம் இணைய இதழின் படைப்பு.